မၢၵ်ႇတႅၵ်ႇၼိူဝ်သဵၼ်ႈတၢင်း ၼႂ်းၸႄႈဝဵင်းမိူင်းၵိုင် ၵႃးၵူၼ်းမိူင်း 2 လမ်းတိူဝ်ႉၸၢၵ်ႇမၢၵ်ႇသေ မီးလွင်ႈမၢတ်ႇၸဵပ်းလူႉသုမ်း။
ၼိူဝ်သဵၼ်ႈတၢင်း ၼႂ်းၵႄႈဝၢၼ်ႈပၢင်ၵေႇတု လႄႈ ဝၢၼ်ႈတူင်ႇလၢဝ်း မီးလွင်ႈမၢၵ်ႇတႅၵ်ႇလႄႈ ၵႃးၵူၼ်းမိူင်းသွင်လမ်း တိူဝ်ႉၸၢၵ်ႇမၢၵ်ႇသေ မီးလွင်ႈမၢတ်ႇၸဵပ်းလူႉသုမ်း မိူဝ်ႈဝၼ်းတီႈ 8/5/2023 ယၢမ်းၵၢင်ဝၼ်း 12 မူင်း။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸၢၵ်ႇမၢၵ်ႇတႅၵ်ႇသဵၼ်တိူဝ်ႉသႂ်ႇ ၵႃးလႄႈ မၢၼ်ႇၵႃးပေႃးၸတ်ႉတႅၵ်ႇဢေႃႈ။ ၵူၼ်းၸၢႆး ၶီႇမႃးၸွမ်းၼၼ်ႉၵေႃႈ မၢတ်ႇၸဵပ်းဢေႃႈ။တိူဝ်ႉတီႈၶေႃးမၼ်းၼၼ်ႉဢေႃႈ။ မၢၵ်ႇၼႆႉ တႅၵ်ႇမွၵ်ႈ 3 ႁူၺ်ႇၼႆႉဢေႃႈ။ၵႃးၵူၼ်းမိူင်းၵႂႃႇၵႂႃႇမႃးမႃးႁေ လိူၵ်ႈလိူၵ်ႈသမ်ႉ မႃးၺႃးသႂ်ႇၼၼ်ႉၼႃႇ တေပဵၼ်ၽီမိုဝ်းၽႂ်ဢမ်ႇႁူႉ” -ဝႃႈၼႆ။
ဢွင်ႈတီႈမၢၵ်ႇတႅၵ်ႇၼႆႉ ပဵၼ်တီႈ ၸုမ်းသိုၵ်း SSPP တင်း RCSS တူင်ႉၼိုင်ၵႂႃႇမႃးသေ ၶဵင်ႈၶႅင်ၵၢၼ်သိုၵ်းတေႃႇၵၼ် – ၵူၼ်းပိုၼ်ႉတီႈလၢတ်ႈၼင်ႇၼႆ။
ဢိင်ၼိူဝ်လွင်ႈၼႆႉ ၵူၼ်းၸၢႆးၼႂ်းပိုၼ်ႉတီႈဢႃယု 40 ၵေႃႉၼိုင်ႈ လၢတ်ႈဝႃႈ – “ သိုၵ်း SSPP တင်း RCSS 2 ၸုမ်း ၵႂႃႇမႃးယူႇ ဢေႃႈ သဵၼ်ႈတၢင်းၸိူဝ်းၼႆႉ။ပၢင်တိုၵ်းၵေႃႈ ပဵၼ်ယူႇတၢင်းၾၢႆႇဢွၵ်ႇလၢႆးၶႃႈပုၼ်ႉၼၼ်ႉၼႃႇ ၵူၼ်းမိူင်းၸိူဝ်းလႆႈပၢႆႈၵေႃႈ မီးဢေႃႈ မိူဝ်ႈလဵဝ်ဢွၼ်ၵၼ်ၵူဝ် မၼ်းမႃးပဵၼ်တၢင်းႁဝ်းၼႆႉထႅင်ႈၵူၺ်းယဝ်ႉ လွမ်မႆႈၸႂ်ဝႆႉယူႇ” – ဝႃႈၼႆ။
မိူဝ်ႈဝၼ်းတီႈ 11 လိူၼ်ဢေႊပရီူဝ်ႊ ပူၼ်ႉမႃးၼႆႉၵေႃႈ ယွၼ်ႉသိုၵ်း SSPP တင်း RCSS ပဵၼ်ပၢင်တိုၵ်းၵၼ်လႄႈ ၵူၼ်းမိူင်းလႆႈ ၶၢႆႉပၢႆႈ သွၼ်ႈယူႇၸွမ်းတီႈလွတ်ႈၽေး ဢမ်ႇယွမ်း 500 ။
ၸွမ်းၼင်ႇသဵၼ်ႈမၢႆ ၾၢႆႇလူလွမ်လဵပ်ႈႁဵၼ်းမၢၵ်ႇမႅင်းၾင်လီမိူင်းႁူမ်ႈတုမ်(မြန်မာနိုင်ငံ မြေမြှုပ်မိုင်း စောင့်ကြည့်လေ့လာရေးအဖွဲ့) တၢင်ႇဝႆႉ မိူဝ်ႈ 2020 ၼၼ်ႉၼႆၸိုင် မီးၵူၼ်းမၢတ်ႇၸဵပ်းလူႉတၢႆယွၼ်ႉမၢၵ်ႇမႅင်း 368 ၵေႃႉသေ ၼႂ်းမိူင်းတႆးၼႆႉ ၵူၼ်းမိူင်းတိူဝ်ႉမၢတ်ႇၸဵပ်းၼမ်သုတ်း မီး 121 ၵေႃႉၼႆယဝ်ႉ။
ပေႃးတူၺ်းသဵၼ်ႈမၢႆၵူၼ်းမိူင်းယဵပ်ႇၺႃးမၢၵ်ႇမႅင်း ၸွမ်းထုင်ႉလႂ် ထုင်ႉၼၼ်ႉၼႆၸိုင် မိူင်းတႆး မီး 42 % ၊ တိူင်းၸႄႈၵႅင်း 12 % ၊ မိူင်းရၶႅင်ႇ 11 % ၊ မိူင်းၶၢင် 10 % လႄႈ မိူင်းယၢင်း 7 % သေ လႆႈဝႃႈ မိူင်းတႆး ၼမ်သုတ်းၼႆယဝ်ႉ။
