ၾၢႆႇမိူင်းၶႄႇ ၵိုင်ႉၵင်ႉပိၵ်ႉဢိုတ်းၽၵ်းတူင်လူင်ၸၢင်ႉၽိူၵ်ႇ လႅၼ်လိၼ်တႆး-ၶႄႇ ဢမ်ႇပၼ်ၵူၼ်းၶဝ်ႈဢွၵ်ႇသေဢမ်ႇၵႃး ႁၢမ်ႈတေႃႉၵုၼ်ႇၵူႈသႅၼ်း။

မိူဝ်ႈဝႃး ဝၼ်းတီႈ 29/4/2023 ယၢမ်းၵၢင်ၼႂ်ၼၼ်ႉ ၾၢႆႇမိူင်းၶႄႇ ဢဝ်ၶေႃႈဢၢင်ႈ ၵူတ်ႇထတ်းသွၵ်ႈႁၼ်ၵုၼ်ႇ ဢမ်ႇမႅၼ်ႈ ၸွမ်းပၵ်းပိူင်ၼႆသေ ၵိုင်ႉၵၢင်ႉသင်ႇပိၵ်ႉဢိုတ်းၽၵ်းတူလူင်ၸၢင်ႉၽိူၵ်ႇ လႅၼ်လိၼ်တႆး-ၶႄႇ ဢမ်ႇႁႂ်ႈၵူၼ်းၶဝ်ႈဢွၵ်ႇ သေဢမ်ႇၵႃး ႁၢမ်ႈတေႃႉသူင်ႇၵုၼ်ႇၵူႈသႅၼ်း ၼႆယဝ်ႉ။

ၼၢင်းယိင်းၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်သွၵ်ႈႁၼ် ၶူဝ်းၶွင်ဢၼ်မိူင်းၶႄႇၶဝ် ႁၢမ်ႈဝႆႉ ၼၼ်ႉ လႄႈၼႆဢေႃႈ။ ဢၼ်ၶဝ်သွၵ်ႈႁၼ်ၼႆႉ ပဵၼ်လႅၼ်းယႃႈၼႆဢေႃႈ။ လႅၼ်းယႃၸိူဝ်းၶဝ်ႁၢမ်ႈဢဝ်ၶဝ်ႈမိူင်းၶႄႇၼႆႉ ပဵၼ်လၢႆသႅၼ်းယူႇ။ ဢၼ်ၶဝ်သွၵ်ႈႁၼ်ၼႆႉ ပဵၼ် လႅၼ်းယႃႈ မိၵ်ႈ ၶပွင်း(ခပေါင်း) ၸိူဝ်းၼႆႉဢေႃႈ ႁဵတ်းၼၼ်သေ ၸင်ႇပိၵ်ႉဢိုတ်းၽၵ်းတူၶိုၼ်း” – ဝႃႈၼႆ။

ၽၵ်းတူလူင်ၸၢင်ႉၽိူၵ်ႇ ဢၼ်ၾၢႆႇမိူင်းၶႄႇသင်ႇပိၵ်ႉဢိုတ်းၵႂႃႇၼႆႉ တေပိုတ်ႇၶိုၼ်းမိူဝ်ႈလႂ်ဢၼ်ဝႃႈၼၼ်ႉ ပႆႇမီးၸုမ်းလႂ်ယိုၼ်ယၼ်။

ၼၢင်းယိင်းၵူၼ်းၼႂ်းပိုၼ်ႉတီႈၵေႃႉၼိုင်ႈသိုပ်ႇလၢတ်ႈဝႃႈ – “ ၶဝ်တေပိုတ်ႇၶိုၼ်းမိူဝ်ႈလႂ်တႄႉ ဢမ်ႇႁူႉယဝ်ႉၶႃႈ ႁၼ်ၵူၼ်းတၢင်ႇၵုၼ်ႇၶဝ်တႄႉ လွမ်မႆႈၸႂ်ၽႂ်မၼ်းဝႆႉယူႇၶႃႈဢေႃႈၼၼ်ႉ” – ဝႃႈၼႆ။

ၾၢႆႇၵဵတ်ႉၵျိၼ်ႊသၢၼ်ႊၵျေႃႉၼႆႉၵေႃႈ ၵႃးတၢင်ႇၵုၼ်ႇမိူင်းၶႄႇ ၶဝ်ႈမိူင်းတႆးၸိူဝ်းၼႆႉ ၺႃးၸုမ်းသိုၵ်းမၢၼ်ႈတင်ႈလၢၼ်ႇ ၵူတ်ႇထတ်းၶူဝ်းၵုၼ်ႇႁၢဝ်ႈႁႅင်းသေဢမ်ႇၵႃး ၵဵပ်းၶွၼ်ႇၵႃးတၢင်ႇၵုၼ်ႇၼမ်လိူဝ်မႃးလႄႈ ႁဵတ်းႁႂ်ႈၵူၼ်းၵႃႉ ၵူၼ်းၶၢႆၶဝ် ယၢပ်ႇၽိုတ်ႇတင်းၼမ်ၼႆ ၸဝ်ႈပၢႆးမၢၵ်ႇမီးၵေႃႉၼိုင်ႈလၢတ်ႈၼင်ႇၼႆ။

ၽၵ်းတူလႅၼ်လိၼ်တႆး – ၶႄႇၼႆႉပိၵ်ႉဢိုတ်းမႃး ၶၢဝ်းတၢင်းၸမ် 3 ပီ တႄႇဢဝ် ဝၼ်း တီႈ 1/4/2020 တေႃႇထိုင် 8/1/2023 ၼႆႉ လူင်ပွင်ၸိုင်ႈၶႄႇ ပိုၼ်ၽၢဝ်ႇ ပိုတ်ႇၶိုၼ်းပဵၼ်တၢင်းၵၢၼ်သေ ၾၢႆႇမိူင်းႁူမ်တုမ် ပၼ်ၶႂၢင်ႉၵူၼ်းပိုၼ်ႉတီႈၶဝ်ႈဢွၵ်ႇၵႂႃႇမႃးလႆႈ တီႈၽၵ်းတူလူင်ၸၢင်ႉၽိူၵ်ႇ ၼႂ်းဝၼ်းတီႈ 26/1/2023။