ၵႃးပိၼ်ႈၶွမ်ႈၼိူဝ်သဵၼ်ႈတၢင်းလူင် တႃႈၶီႈလဵၵ်း – ၵဵင်းတုင် ၼႂ်းဝူင်ႈလဵဝ်ၵူၺ်း ဢမ်ႇယွမ်း 2 ပွၵ်ႈသေ မီးၵူၼ်းမၢတ်ႇၸဵပ်းလူႉတၢႆၼမ်။
ၼႂ်းလိူၼ်ဢေႊပရိူဝ်ႊ ပီ 2023 ၼႆႉ ဝူင်ႈလဵဝ်ၵူၺ်း ၵႃးပဵၼ်ၽေးၵိုင်ႉၵၢင်ႉ ပိၼ်ႈၶွမ်ႈ ဢမ်ႇယွမ်း 2 ပွၵ်ႈ ၼိူဝ်သဵၼ်ႈတၢင်းလူင် တႃႈၶီႈလဵၵ်း – ၵဵင်းတုင် မီးၵူၼ်းမၢတ်ႇၸဵပ်းလူႉတၢႆတင်းၼမ်။
ၵူၼ်းၼႂ်းပိုၼ်ႉတီႈဝဵင်းတႃႈၶီႈလဵၵ်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၵမ်ႈၼမ်ၼႆႉ – ၵႃးၵေႃႈလီ ၶူၼ်တၢင်းၵေႃႈလီၼႆသေ ႁေႃႈဝႆးဝႆးၼၼ်ႉၼႃႇ။ ၸဝ်ႈၵႃးမၢင်ၵေႃႉ ပေႃးပရိၵ်ႈဢမ်ႇၶၢတ်ႇ ဢမ်ႇဢွၼ်ၵၼ် မႄးထႃႈဢွၼ်တၢင်း ပေႃးပဵၼ်မႃးၵေႃႈ ထိုင်တီႈဢမ်ႇၵုမ်းသင်လႆႈၼၼ်ႉယဝ်ႉ။တီႈတႄႉမၼ်း ပရိၵ်ႈၼႆႉ ဢၼ်လႂ်လူဝ်ႇလႅၵ်ႈလူဝ်ႇလၢႆႈၼႆ တေလႆႈၸႅတ်ႈတူၺ်းပၼ်ၵူႈၵမ်းယဝ်ႉပေႃးဢွၵ်ႇတၢင်း။ ၵႃးမၢင်လမ်းသမ်ႉ ၶႂ်ႈၸဵဝ်းႁွတ်ႈၸဵဝ်းၽႅဝ်လႄႈ ႁေႃႈဝႆးဝႆး ထိုင်တီႈ ၵုမ်းဢမ်ႇလႆႈႁေ ပဵၼ်ၽေးၵိုင်ႉၵၢင်ႉၸိူင်ႉၼႆၼၼ်ႉၼႃႇ ဢၼ်လႆႈမွင်ၸႂ်ၸွမ်းၼႃႇၵေႃႈ ၵူၼ်းဢွၵ်ႇၶၢဝ်းတၢင်းၸွမ်းၸိူဝ်းၼႆႉယဝ်ႉ ပဵၼ်သိပ်းပဵၼ်သၢဝ်း ဢွၼ်ၵၼ်ၸဵပ်းသႅပ်ႇ တိၼ်ႁၢၵ်းမိုဝ်းႁၢၵ်း မၢင်ၵေႃႉၵေႃႈ ဢမ်ႇလွတ်ႈတၢႆ ” – ဝႃႈၼႆ။
ၵႃးဢၼ်ပဵၼ်ၽေးၵိုင်ႉၵၢင်ႉၼိူဝ်သဵၼ်ႈတၢင်း တႃႈၶီႈလဵၵ်း-ၵဵင်းတုင် ၼႂ်းဝူင်ႈၼႆႉ ပိၼ်ႈတူၵ်းၼႂ်းၵႄးၼမ်ႉ ႁိမ်းဝၢၼ်ႈတႃႈၵႅဝ်ႈ ၸႄႈဝဵင်းမိူင်းၽျၢၵ်ႈလမ်းၼိုင်ႈ ၵူၼ်းမၢတ်ႇၸဵပ်းႁၢဝ်ႈႁႅင်း 22 ၵေႃႉ လူႉတၢႆ 3 ၵေႃႉသေ ထႅင်ႈလမ်းၼိုင်ႈသမ်ႉ ပိၼ်ႈတူၵ်းႁူၺ်ႈ ႁိမ်းဝၢၼ်ႈၼမ်ႉၼၢင်း ၸႄႈဝဵင်းမိူင်းၽျၢၵ်ႈၼၼ်ႉသေ မီးၵူၼ်းမၢတ်ႇၸဵပ်းႁၢဝ်ႈႁႅင်း 1 ၵေႃႉ လူႉတၢႆထင်တီႈ 3 ၵေႃႉ ၵူၼ်းလူႉတၢႆတင်းသဵင်ႈႁူမ်ႈၵၼ် မီး 6 ၵေႃႉ။
ၵူၼ်းၼႂ်းပိုၼ်ႉတီႈဝဵင်းမိူင်းၽျၢၵ်ႈၵေႃႉၼိုင်ႈလၢတ်ႈဝႃႈ – “ တီႈဢၼ်ၵႃးၵႆႉပိၼ်ႈၼႆႉ ပဵၼ်ႁိမ်းၼၼ်ႉၵမ်ႈၼမ်ယဝ်ႉ မိူဝ်ႈဢွၼ်တၢင်းၵေႃႈ ပဵၼ်တီႈၼၼ်ႈယဝ်ႉ။ၵွပ်ႈၼၼ်လႄႈ လီႁွင်ႉ ၸဝ်ႈသင်ႇၶႃႇၶဝ်မႃး လွတ်ႈႁေႃးသူတ်ႇမူၼ်းပၼ်ယူႇ ” – ဝႃႈၼႆ။
မိူဝ်ႈဝၼ်းတီႈ15/3/2023 ၼၼ်ႉၵေႃႈ ၵႃးသင်ၶၸဝ်ႈ လမ်းၼိုင်ႈ ပဵၼ်ၽေးၵိုင်ႉၵၢင်ႉ ပိၼ်ႈၶွမ်ႈ တီႈဝၢၼ်ႈ လႅတ်ႉပၼ်ႇ တၢင်းၶဝ်ႈဝဵင်းယႂႃႇငၢၼ်ႇ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း လွင်ႈၵူၼ်းမၢတ်ႇၸဵပ်းလူႉတၢႆ ဢမ်ႇမီး ရူတ်ႉၵႃးတႄႉ မီးလွင်ႈလူႉၵွႆပႅတ်ႈတင်းလမ်း။
