ၶၢဝ်းမႆႈပီၼႆႉ ၵူၼ်းမိူင်းၼႂ်းၸႄႈဝဵင်းတူၼ်ႈတီး  ဢမ်ႇမီးၼမ်ႉၵိၼ်ၼမ်ႉၸႂ်ႉ ၵႃႈၼမ်ႉၵေႃႈ ပုင်ႈၶိုၼ်ႈသုင်။

တႄႇဢဝ်ႁူဝ်လိူၼ် ဢေႊပရိူဝ်ႊ ပီ 2023 ၼႆႉမႃး ၵူၼ်းမိူင်း တီႈၸႄႈဝဵင်းတူၼ်ႈတီး ထူပ်းတၢင်းယၢပ်ႇၽိုတ်ႇယွၼ်ႉၼမ်ႉႁႅင်ႈ   ၵူၼ်းသင်ႇသိုဝ်ႉၼမ်ႉၼမ်မႃးလႄႈ ၵႃႈၶၼ်ၼမ်ႉၵေႃႈ ၵိုင်ႉၵၢင်ႉပုင်ႈၶိုၼ်ႈသုင် ၼႆယဝ်ႉ ။

ၵူၼ်းၼႂ်း ဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “ ပီၼႆႉ ၼမ်ႉၵေႃႈ ၸဵဝ်းႁႅင်ႈၼႃႇ မိူဝ်ႈပီၵၢႆတႄႉ လိူၼ်ႁႃႈၼႆ ၾူၼ်တူၵ်းပၼ်ၼႆ ၶႅၼ်းယူႇ။ပီၼႆႉ ၾူၼ်ဢမ်ႇတူၵ်း။ရႃႇသီႇဢုတုၵေႃႈ သမ်ႉမႆႈႁႅင်းၼႃႇၼေႃႈ။ မိူဝ်ႈပီၵၢႆ ၵႃႈၼမ်ႉထေႃႈလႃႈၵီႈၼိုင်ႈလမ်းၼႆႉ 4-5 ႁဵင်ပျႃး  ႁဝ်းဝႃႈၵႃႈၼႃႇယဝ်ႉ။ပီၼႆႉသမ်ႉ ၶိုၼ်ႈထိုင် 9 ႁဵင်ယဝ်ႉဢေႃႈၼႆႉ။ဢၼ်ၼႆႉ ၶၢႆတေႃႇ ၵူၼ်းၸမ်ၼမ်ႉၵွၼ်ႇဢေႃႈၼႆႉ ပေႃးပဵၼ်ႁိူၼ်းဢၼ်ယူႇတီႈသုင် တီႈဢၼ်ၵႆၼမ်ႉၸိူဝ်းၼၼ်ႉတႄႉ ၵႃႈၼမ်ႉ ၼိုင်ႈထေႃႈလႂ် တေမီးမွၵ်ႈ 14000-15000 ၼႆႉဢေႃႈ” – ဝႃႈၼႆ။

ၼမ်ႉဢၼ် ၵူၼ်းၵိၼ်ၸၢင်ႈတေႃႉၼမ်ႉ ၼႂ်းဝဵင်းတူၼ်ႈတီး တေႃႉသူင်ႇၶၢႆပၼ်ၼႆႉ ပဵၼ်ၼမ်ႉတႃႇၸႂ်ႉသွႆသုၵ်ႈလၢင်ႉ၊  ၼိုင်ႈထေႃႈလႂ် မီးတႃႇ 6 ပုင်း(ပေႇပႃႇ) ။ ထေႃႈၼိုင်ႈလမ်း ၼိုင်ႈဝၼ်းလႂ် တေႃႉသူင်ႇၶၢႆလႆႈ 30 ပွၵ်ႈ။တႃႇတေ သိုဝ်ႉၼမ်ႉၸႂ်ႉ ၵေႃႈ ၵူၼ်းမိူင်းလႆႈသင်ႇဝႆႉလူင်ႈၼႃႈ(ဢဝ်ၶိဝ်း)ဝႆႉ ၼႆယဝ်ႉ။

ဢိင်ၼိူဝ်လွင်ႈၼႆႉသေ ၵူၼ်းၼႂ်းပိုၼ်ႉတီႈဝဵင်းတူၼ်ႈတီးသိုပ်ႇလၢတ်ႈဝႃႈ – “ ၵူၼ်းတေႃႉၶၢႆၼမ်ႉၶဝ်ၼႆႉ ၼိုင်ႈဝၼ်းလႂ် ၶဝ်တေႃႉၶၢႆလႆႈ မွၵ်ႈ 30 ပွၵ်ႈၼႆႉဢေႃႈ။ၶဝ်လုၵ်ႉ ၵၢင်ၼႂ်ၸဝ်ႉ 4 မူင်းသေ တေႃႉၶၢႆ တေႃႇပေႃးထိုင် ၵၢင်ၶမ်ႈ 10 မူင်းပုၼ်ႉဢေႃႈ ၶဝ်တႄႉလႆႈဝႃႈ ပဵၼ်ၵၢၼ်ပဵၼ်ငၢၼ်းလီၼႃႇ။တႃႇတေလႆႈၼမ်ႉၵေႃႈ လႆႈဢဝ်ၶိဝ်းမၼ်းဝႆႉဢေႃႈ သင်ႇသိုဝ်ႉႁႂ်ႈလႆႈၵမ်းလဵဝ်တႄႉ ဢမ်ႇလႆႈ ၵူၼ်းသင်ႇမၼ်းၼမ်ၼႃႇ တႃႇၶဝ်တေၵႂႃႇတၵ်းၼမ်ႉမႃးၵေႃႈ ဢမ်ႇငၢႆႈငၢႆႈၼေႃႈ လႆႈၵႂႃႇႁႃၵႆဝႆႉၵႂႃႈ  “ – ဝႃႈၼႆ။

ၵူၼ်းတေႃႉၼမ်ႉၶၢႆၼႆႉ ၵမ်ႈၽွင်ႈဢဝ်တီႈၼမ်ႉမေႃႇ၊ ၵမ်ႈၽွင်ႈဢဝ်တီႈၼမ်ႉၼွင် ဢၼ်မီးတီႈဝဵင်းတူၼ်ႈတီး 2-3 ၼွင်။ ၵမ်ႈၽွင်ႈလႆႈၵႂႃႇဢဝ် ၸွမ်းဝၢၼ်ႈဢၼ်မီးႁိမ်းႁွမ်းဝဵင်းတူၼ်ႈတီးမႃးၶၢႆပၼ်ၶိုၼ်း။  

ၵူၼ်းမိူင်းၸိူဝ်းလႆႈထူပ်းတၢင်းယၢပ်ႇၼမ်ႉႁႅင်ႈၼႆႉ လိူဝ်သေ ဝဵင်းတူၼ်ႈတီးယဝ်ႉ မိူၼ်ၼင်ႇ ဝဵင်းယႂႃႇငၢၼ်ႇ ၊ ဝဵင်းပၢင်လႃႈ(ပၢင်းတလႃႉ) ၸိူဝ်းၼႆႉၵေႃႈယၢပ်ႇၵိၼ်းဢမ်ႇမီးၼမ်ႉၸႂ်ႉသွႆၵုမ်ႇထူၼ်ႈ ၼႆယဝ်ႉ။

မိူၼ်ၼၼ်ၼင်ႇၵဝ်ႇ တႄႇဢဝ်ႁူဝ်လိူၼ်ၾႅပ်ႊပိဝ်ႊရီႊ ပီ 2023 ၼႆႉမႃး တေႃႇထိုင်ဝၼ်းမိူဝ်ႈၼႆႉ ၵူၼ်းဝၢၼ်ႈႁွင်ႈလိုၵ်ႉ(ဝၢၼ်ႈႁွင်ႇ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၼၼ်ႉၵေႃႈ  ထူပ်းတၢင်းယၢပ်ႇၽိုတ်ႇၼမ်ႉႁႅင်ႈ ဢမ်ႇမီးၼမ်ႉၸႂ်ႉသွႆၵုမ်ႇထူၼ်ႈ ၵူၼ်းမိူင်းမုင်ႈမွင်းႁႂ်ႈၾူၼ်တူၵ်းဝႆးဝႆး ဝႃႈၼႆ။