မုၼ်ၸဝ်ႈ ၸၢဝ်းမၢၼ်ႈ တူၼ်ၼိုင်ႈ ထုၵ်ႇၵူၼ်းဢမ်ႇႁူႉၾၢႆႇ ပေႃႉထုပ်ႉၶႃႈႁႅမ်သေလူႉလွၼ်ႇၵႂႃႇ တီႈၵွင်းမူးၼွင်ႁူး ဝဵင်းပၢင်လူင် ၊ ၵူၼ်းၸုမ်းၼၼ်ႉ ၸူင်ၵွင်းမူး လႆႈ ၵႂႃႇၶူဝ်းငိုၼ်းၶမ်း တင်းၼမ်။
ပူၼ်ႉမႃး ၵၢင်လိူၼ်ဢေႊပရိူဝ်ႊ 2023 ၼႆႉ မုၼ်ၸဝ်ႈ ၸၢဝ်းမၢၼ်ႈ တူၼ်ၼိုင်ႈ ဢၼ်တိုၵ်ႉၶၢႆႉမႃးယူႇမႂ်ႇ တီႈၵွင်းမူးၼွင်ႁူး ၾၢႆႇ ၸၢၼ်းဝဵင်းပၢင်လူင် ၼႂ်းၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း ထုၵ်ႇၵူၼ်းဢမ်ႇႁူႉၾၢႆႇ ပေႃႉထုပ်ႉ ၶႃႈႁႅမ်လႄႈလူႉလွၼ်ႇၵႂႃႇ တီႈ ၵွင်းမူးၼၼ်ႉ ။
ၵူၼ်းပိုၼ်ႉတီႈ ဝဵင်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မုၼ်ၸဝ်ႈမၢၼ်ႈ တိုၵ်ႉမႃးယူႇမႂ်ႇၵူၺ်း တီႈၵွင်းမူးၼၼ်ႉ မီးမၼ်း ၸဝ်ႈယူႇဝႆႉ ပႃးလဵဝ်ၵူၺ်း။ ထုၵ်ႇၵူၼ်းႁၢႆႉပေႃႉထုပ်ႉသေ လွၼ်ႇၵႂႃႇ တီႈၵွင်းမူးၼၼ်ႉ လႆႈႁူႉဝႃႈၵူၼ်းႁၢႆႉ ၼၼ်ႉ ၸူင်ဢဝ်သွၵ်ႈဢဝ်ၶူဝ်းငိုၼ်းၶမ်းတီႈၵွင်းမူးၼၼ်ႉၵႂႃႇပႃး။ ၵႃႈႁိုဝ်တႄႉ ဢမ်ႇႁူႉ လႆႈငိၼ်းဝႃႈ လႆႈၵႂႃႇၼမ်ဝႆႉ။ ၵူႈပွၵ်ႈ တီႈၵွင်းမူးၼၼ်ႉ ပဵၼ်ဢွင်ႈတီႈၵဝ်ႇ ပိုတ်ႇပၢင်တေႃႇလွင်းမႃး ၵွၼ်ႇၶဝ်တေၶၢႆႉမႃးပိုတ်ႇတီႈဝၢၼ်ႈဢႅၼ်ႇ ဝဵင်းပၢင်လူင်ၼႆႉ”- ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 14/4/2023 ယၢမ်းၵၢင်ၼႂ် ၵူၼ်းၶဝ်ႈလၵ်ႉ ငိုၼ်းၶမ်းလႄႈ ၶူဝ်းၶွင်ၸဝ်ႈ ၶူး ၸဝ်ႈသၢင်ႇဢွၼ်ႇ တီႈဝတ်ႉပိတၵၢတ်ႇၵႂႃႇ မႅၼ်ႈၶၼ်ငိုၼ်း ဢမ်ႇယွမ်း 100 သႅၼ်ပျႃး ၼႆယဝ်ႉ။
“မိူဝ်ႈၽွင်းၼၼ်ႉ ပဵၼ်ၶၢဝ်းသၢင်းၵျၢၼ်ႇ ၶၢဝ်းပိူၼ်ႈၵၼ်ႇတေႃးႁူဝ်ၵျွင်းၵွၼ်ႇၶႃႈဢေႃႈၼၼ်ႉ။ ၵူၼ်းႁၢႆႉၼၼ်ႉ ၶဝ်တေ ဢဝ် တိုဝ်ႉတၢင်းဢၼ်ၼၼ်ႉသေ ၶဝ်ႈလၵ်ႉႁိုဝ် ဢမ်ႇႁူႉ။ တီႈႁွင်ႈၼွၼ်း ၸဝ်ႈၶူးၶဝ်ၼၼ်ႉ သမ်ႉလပ်ႉပိူၼ်ႈဝႆႉ ႁူးပွင်ႇ / ပႃႈလႅင်းသမ်ႉ ဢမ်ႇၵႆႉဢိုတ်း ႁဵတ်းၼၼ်ႉၵေႃႈပႃးႁိုဝ် ဢမ်ႇႁူႉ လႆႈၵႂႃႇငိုၼ်းၶမ်း ဢမ်ႇယွမ်း 100 သႅၼ်ၼႆၶႃႈဢေႃႈ”- ၵူၼ်းပိုၼ်ႉတီႈ ဝဵင်း ပၢင်လူင် သိုပ်ႇလၢတ်ႈၼႄၼင်ႇၼႆ။
လွင်ႈၼႆႉ ပဵၼ်ၽွၼ်းတုမ်ႉယွၼ်ႈ ယွၼ်ႉပၢင်တေႃႇလွင်း ဢၼ်ပိုတ်ႇဝႆႉတီႈ ၾၢႆႇတူၵ်းဝဵင်းပၢင်လူင် တီႈဝၢၼ်ႈ ဢႅၼ်ႇၼၼ်ႉ။ ပိုတ်ႇမႃးၶၢဝ်းတၢင်းၸမ် 4 လိူၼ်ယဝ်ႉ ပႆႇပိၵ်ႉဢိုတ်းၵိုတ်းလိုဝ်ႈ တေႃႇထိုင်ယၢမ်းလဵဝ်။ သဵင်ၽဵင်းၵႂၢမ်း တီႈၼႂ်းပၢင်တေႃႇလွင်းၼၼ်ႉ လင်ႁႅင်းၵူႈၶိုၼ်း ႁဵတ်းႁႂ်ႈတုမ်ႉယွၼ်ႈ ၵူၼ်းပိုၼ်ႉတီႈ ဝဵင်းပၢင်လူင် ဢမ်ႇလႆႈၼွၼ်းလပ်းလီ ၵၼ်မႃး ၼႆယဝ်ႉ။
ၵူၼ်းပိုၼ်ႉတီႈ ဝဵင်းပၢင်လူင် ၽူႈယိင်း ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ်ၼႆႉ ဢမ်ႇဝႃႈၵူၼ်း မိူင်းၵူၺ်း လႆႈမႆႈၸႂ် တွၼ်ႈတႃႇ သင်ၶၸဝ်ႈယင်းလႆႈမႆႈၸႂ် ယွၼ်ႉဝၢၼ်ႈမိူင်းႁဝ်းၶႃႈၼႆႉ ဢမ်ႇမီးၸဝ်ႈ ဢမ်ႇမီးၸွမ် ဢမ်ႇမီးၽႂ် ၽွင်းငမ်းတႄႉတႄႉ။ ပၢင်တေႃႇလွင်းၵေႃႈ ပိုတ်ႇမႃးၶိူဝ်းယႂ်း ယူႇတီႈ ၽူႈမီးပုၼ်ႈၽွၼ်းၶဝ်ၵေႃႈ ဢမ်ႇၵႂႃႇႁၢမ်ႈသီး တူၺ်းသင် ပၼ်လႆႈၵူၼ်းမိူင်း လွင်ႈႁူမ်ႇလူမ်ႈဢၼ်ဝႃႈၼၼ်ႉ တိုၼ်းဢမ်ႇမီးသင်ဢိတ်းၼၼ်ႉယဝ်ႉ တီႈဝဵင်းပၢင်လူင်ၼႆႉ”- ဝႃႈၼႆ။
မိူဝ်ႈႁူဝ်လိူၼ်ၼႆႉ ယွၼ်ႉၾႆးၾႃႉမွတ်ႇ 2-3 ၶိုၼ်းထပ်းၵၼ် ၼႂ်းဝဵင်းပၢင်လူင် မီးၵူၼ်းၶဝ်ႈလၵ်ႉ ႁၢၼ်ႉၶၢႆၾူၼ်း 2 ႁၢၼ်ႉတိတ်းၵၼ် ဢၼ်ပိုတ်ႇၶၢႆဝႆႉ တၢင်းၼွၵ်ႈၵၢတ်ႇၼၼ်ႉ လႆႈၵႂႃႇၾူၼ်း မွၵ်ႈ 90 ၶိူင်ႈ ၼႆယဝ်ႉ။
ပူၼ်ႉမႃး မိူဝ်ႈဝၼ်းတီႈ 31/10/2022 ယၢမ်းၵၢင်ဝၼ်း 12:37 မူင်းၼၼ်ႉၵေႃႈ ထူပ်းႁၼ်တူဝ်တၢႆ ပႃႈၼၢင်းၺူဝ်ႇ ဢႃယု 59 ပီ ၵူၼ်းပွၵ်ႉ 4 ႁၼ်ၺႃးယိုဝ်းတၢႆသေ ပႅတ်ႈဝႆႉ တီႈတၢင်းၶဝ်ႈဝၢၼ်ႈၼမ်ႉလိၼ်း ဢိူင်ႇၼွင်လႅင် ဝဵင်းပၢင်လူင် ၼၼ်ႉၵေႃႈ ပဵၼ်ၼမ်ႉမိုဝ်းၽႂ်ႁဵတ်း ဢၼ်ဝႃႈၼၼ်ႉ ႁၢၼ်ႉတေႃႇထိုင်ယၢမ်းလဵဝ် ပႆႇႁူႉၵေႃႉ ပႆႇတီႉၺွပ်းလႆႈတူဝ်ၵူၼ်း ႁၢႆႉ ၼႆယဝ်ႉ။
