ပီႈၼွင်ႉၽူႈတၢႆ ပိုၼ်ၽၢဝ်ႇႁႃ ၸၢႆးထေႃႇၵျွၵ်ႉမႄး ၵေႃႉၶႃႈႁႅမ်လုၵ်ႈမေး – လူၺ်ႈၵႃႈႁူဝ် သႅၼ်ဝၢတ်ႇပၢႆ

ၸိူဝ်ႉၶိူဝ်းပီႈၼွင်ႉ ၼၢင်းဢုင်ႇ (ႁႅင်းၵၢၼ်တႆး ဢၼ်ၺႃးၵေႃႉပဵၼ်ၽူဝ်ၶႃႈႁႅမ်တၢႆၶိုၼ်းၼၼ်ႉ) ႁူမ်ႈၵၼ် တင်ႈၵႃႈႁူဝ် ၸၢႆးထေႃႇ ၵေႃႉပူၼ်ႉပႅၼ်ၶႃႈႁႅမ် သေပၢႆႈလွတ်ႈဝႆႉၼၼ်ႉ သင်ဝႃႈၽႂ်ၽူႈလႂ်တီႉၺွပ်းလႆႈ တူဝ်မၼ်းၸၢႆးၸိုင် တေမီးငိုၼ်းသူးရၢင်းဝၼ်း တွၼ်ႈပၼ် 130,000 ဝၢတ်ႇ ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 8/4/2023 ယၢမ်းႁူဝ်ၼႂ် 2 မူင်းၼၼ်ႉ ၸၢႆးထုၼ်း (ႁွင်ႉ) ၸၢႆးထေႃႇ ဢႃယု 37 ပီ ႁႅင်းၵၢၼ်တႆး မၼ်းၸၢႆးၶႃႈႁႅမ် ၵေႃႉပဵၼ်မေး ၼၢင်းဢုင်ႇ ဢႃယု 30 ပီလႄႈ လုၵ်ႈၸၢႆး ၸၢႆးမိူင်း ဢႃယု 4 ၶူပ်ႇပၢႆ တၢႆၵိုၵ်းဝႆႉၼႂ်းႁွင်ႈသဝ်း တီႈဝၢၼ်ႈႁူဝ်ၾၢႆ ဢိူင်ႇၼွင်ၸၢင်ႉၶိုၼ်ႊ ၸႄႈဝဵင်းလမ်းပုၼ်း ၸိုင်ႈထႆးၼၼ်ႉသေ ယၢမ်းလဵဝ် မၼ်းၸၢႆးပၢႆႈလွတ်ႈဝႆႉ ပႆႇတီႉၺွပ်းလႆႈ ဝႃႈၼႆ။

ၸၢႆးတႆးထိူၼ်ႇ ၽူႈၸွႆႈထႅမ်ႁႅင်းၵၢၼ် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ယူႇတီႈ ၸိူဝ်ႉၶိူဝ်းပီႈၼွင်ႉ ၼၢင်းဢုင်ႇ ၵေႃႉ ထုၵ်ႇၶႃႈႁႅမ်တၢႆၼႆႉ ဢွၼ်ၵၼ် တင်ႈၵႃႈႁူဝ် ၸၢႆးထေႃႇဝႆႉ သင်ဝႃႈ ၸုမ်းလႂ်မူႇလႂ် ၽႂ်တီႉၺွပ်းလႆႈတူဝ်မၼ်းၸၢႆးသေ သူင်ႇမႃး ၸိုင် တေတွၼ်ႈငိုၼ်းသူးရၢင်းဝလ်း 130,000 ဝၢတ်ႇ။ တၢင်းၾၢႆႇ ၸဝ်ႈၼႃႈတီႈထႆး ၸွမ်းလႅၼ်လိၼ်တႆး – ထႆး ၸိူဝ်းၼႆႉ ၸႅင်ႈဝႆႉမူတ်းယဝ်ႉ။ သင်ဝႃႈ တီႉလႆႈသေ မႃးဢၢပ်ႈပၼ် ၸွမ်းလႅၼ်လိၼ်ထႆး လႆႈၵမ်းလဵဝ်။ ယွၼ်ႉဝႃႈ ပိူင်ပဵၼ်ၼႆႉ ပဵၼ်ၼႂ်းပိုၼ်ႉတီႈမိူင်းထႆးလႄႈ ယူႇတီႈ ၸဝ်ႈၼႃႈတီႈ၊ ပီႈၼွင်ႉၼၢင်းဢုင်ႇၶဝ် ပိူၼ်ႈပိုတ်ႇလိူင်ႈၸွႆးတြႃး မၼ်းၸၢႆးဝႆႉ တီႈၼႂ်းမိူင်းထႆး ၼႆႉယဝ်ႉ။ ၵႃးဢၼ်မၼ်းၸၢႆး ႁေႃႈပၢႆႈၵႂႃႇၼၼ်ႉ ယၢမ်းလဵဝ် ၸဝ်ႈၼႃႈတီႈၶဝ် ၵႂႃႇတီႉလႆႈတၢင်းမိူင်းၾၢင်သေ ဢဝ်မႃးဝႆႉ တီႈ ႁူင်းပလိၵ်ႈယဝ်ႉ”- ဝႃႈၼႆ။

ၼၢင်းဢုင်ႇ ဢႃယု 30 ပီလႄႈ တင်းလုၵ်ႈၸၢႆးၼႆႉ ပဵၼ်ၵူၼ်းၸႃႇတိ ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း ထုၵ်ႇ ၸၢႆးထေႃႇ ၵေႃႉပဵၼ်ၸဝ်ႈၽူဝ် ဢႃယု 37 ပီ ၵူၼ်းၸႃႇတိ ဝဵင်းၵျွၵ်ႉမႄး ၼၼ်ႉၶႃႈႁႅမ်တၢႆ။ ၵေႃႉပဵၼ်လုၵ်ႈၸၢႆး ၸၢႆးမိူင်း ထုၵ်ႇၶွၼ်ႉ ၸွၵ်းထုပ်ႉသႂ်ႇ ၼႃႈၽၢၵ်ႇပေႃးလူမ်ႇမူမ်ႈ ။

“ၽိူဝ်ႇႁူႉသွင်မႄႈလုၵ်ႈ ၺႃးၸၢႆးထေႃႇၼႆႉ ၶႃႈႁႅမ်တၢႆယဝ်ႉၼႆ ယူႇတီႈ ၸိူဝ်ႉၶိူဝ်းပီႈၼွင်ႉလႄႈ ႁဝ်းၶႃႈ ၵႂႃႇၸႅင်ႈၵႂၢမ်းတီႈႁူင်း ပလိၵ်ႈ။ ယူႇတီႈ ႁူင်းပလိၵ်ႈ ၼႅတ်ႈၸႅင်ႈၸူးပၼ် ၸဝ်ႈၼႃႈတီႈ ၸွမ်းလႅၼ်လိၼ်တင်းမူတ်း။ ၵူၺ်းၵႃႈ တူၵ်းလိုၼ်းၵႂႃႇ ဢိတ်းၼိုင်ႈ မၼ်းၸၢႆး တၼ်းပၢႆႈလွတ်ႈၵႂႃႇယဝ်ႉ။ ပူၼ်ႉမႃး လၢႆဝၼ်းၼႆႉ ပိူၼ်ႈၸွပ်ႇႁၼ်မႃး မီးဝႆႉတီႈၵျွၵ်ႉမႄး ဝၢၼ်ႈၼွင်ၵၢင်။ ယူႇဢမ်ႇလႆႈသေ ၶၢႆႉၵႂႃႇယူႇၸွမ်း ပီႈဢၢႆႈမၼ်း တီႈဝၢၼ်ႈၵွင်းလၢင်း။ ပူၼ်ႉမႃး 2-3 ဝၼ်း ၼႆႉ ႁၼ်မၼ်းထႅင်ႈၵမ်ႉ တီႈတၢင်း ၽႄၼွင်ပိင်။ တေႃႈလဵဝ် မၼ်းၸၢႆး မီးဝႆႉတီႈၵျွၵ်ႉမႄး”- ၸၢႆးတႆးထိူၼ်ႇ သိုပ်ႇလၢတ်ႈၼႄၼင်ႇၼႆ။

ၵွပ်ႈသင်လႄႈ ဢၢၼ်းလမ်းတီႉႁႂ်ႈလႆႈၼႆၸိုင် ဢိင်ၼိူဝ်ပၵ်းပိူင်ဝၢၼ်ႈမိူင်းၸိုင်ႈထႆးမီးဝႆႉသေ တၵ်းလႆႈဢဝ်မႃးပၼ်တူတ်ႈတၢမ်ႇ ။ ၶၢဝ်းတၢင်းၼႃႈမိူဝ်းၼႃႈမႃး ၼင်ႇႁိုဝ် ႁႅင်း ၵၢၼ် ပေႃးတေဢမ်ႇသိုပ်ႇပဵၼ်ၸိူင်ႉၼႆၵႂႃႇထႅင်ႈ ၼႂ်းမိူင်းပိူၼ်ႈ တၵ်းလႆႈပၼ်တူတ်ႈတၢမ်ႇႁႂ်ႈလႆႈ ဝႃႈၼႆ။

“သင်ဢမ်ႇမႃးပၼ်တူတ်ႈတၢမ်ႇၸိုင် ၵမ်ႉမႃး ႁႅင်းၵၢၼ်ႁဝ်း ၶႃႈႁႅမ်ၵၼ်တၢႆသေ ပၢႆႈၶဝ်ႈမိူဝ်းၼႂ်းမိူင်းတိၵ်းတိၵ်းတႄႉ တေဢမ်ႇတူၵ်းထုၵ်ႇ။ ပၼ်ႁႃၼႃႈႁိူၼ်းၶဝ် မီးၸိူင်ႉႁိုဝ်တႄႉ ႁဝ်းဢမ်ႇႁူႉ ပေႃးႁဵတ်းၽိတ်းၵေႃႈ လူဝ်ႇမႃးႁပ်ႉတၢင်းၽိတ်းၵူၺ်း။ ဢၼ်လီဢေးလူထႅင်ႈတႄႉ လုၵ်ႈဢွၼ်ႇၼႆႉ ဢမ်ႇႁူႉလွင်ႈသင်သေ လႆႈတၢႆယွၼ်ႉ ၸိူင်ႉၼႆ ဢမ်ႇထုၵ်ႇလီပဵၼ်သေဢိတ်းၶႃႈ”- ၸၢႆးတႆးထိူၼ်ႇ သိုပ်ႇလၢတ်ႈၼႄၼင်ႇၼႆ။

ၶၢပ်ႈတူဝ်တၢႆ ၼၢင်းဢုင်ႇတင်း လုၵ်ႈၸၢႆး ၸၢႆးမိူင်းၼႆႉ လုမ်းလႃးတီႈဝတ်ႉၵူႇတဝ်ႈ ဢိူင်ႇသီႇၽုမ်း ဝဵင်းၵဵင်းမႆႇ ၸိုင်ႈထႆးသေ ထိုင်မႃးဝၼ်းတီႈ 18/4/2023 ယၢမ်းဝၢႆးဝၼ်း ၸင်ႇပူၼ်ႉၶၢပ်ႈတူဝ် သွင်မႄႈလုၵ်ႈ တီႈပႃႇႁဵဝ်ႈသၼ်တီႇထမ်းၵႂႃႇ ၼႆယဝ်ႉ။