ပႃႇတီႇႁူဝ်သိူဝ် SNLD ဢမ်ႇမီးမၢႆၾၢင်ယဝ်ႉသေတႃႉ လုၵ်ႈၸုမ်းၸိူဝ်းယူႇၸွမ်းလႅၼ်လိၼ်တႆး-ယၢင်းလႅင် ႁူမ်ႈၵၼ်ၵႂႃႇၸွႆႈထႅမ်ၵူၼ်းပၢႆႈၽေးသိုၵ်း 2 တီႈ တၢင်းၵိၼ်တၢင်းယႅမ်ႉလႄႈၶူဝ်းၼုင်ႈတၢင်းဝႆ ဢိၵ်ႇငိုၼ်းတွင်း တူၵ်းမႅၼ်ႈ 37 သႅၼ်ပျႃး။

တႄႇဢဝ် ဝၼ်းတီႈ 2-4/4/2023 ၼႂ်းၶၢဝ်းတၢင်း 3 ဝၼ်းမႃးၼႆႉ ယူႇတီႈ ငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး (ပႃႇတီႇ ႁူဝ်သိူဝ်) SNLD လူင်းပိုၼ်ႉတီႈ ၸွႆႈထႅမ်ၵူၼ်းပၢႆႈၽေးသိုၵ်း ၼႂ်းၸႄႈမိူင်းယၢင်းလႅင် တႃႇငိုၼ်း 15 သႅၼ်ပျႃးလႄႈ တီႈဝဵင်းပၢင်လွင်း မိူင်းတႆးပွတ်းၸၢၼ်း တႃႇ 15 သႅၼ်ပျႃးဝႃႈၼႆ။

ၸၢႆးတၢၼ်းထုၼ်း ႁူဝ်ပဝ်ႈ ပႃႇတီႇႁူဝ်သိူဝ် ၸႄႈဝဵင်းပၢင်လွင်း လၢတ်ႈတီႈၽူႈတွႆႇႁွၵ်ႈဝႃႈ – “ယူႇတီႈငဝ်ႈငုၼ်းႁဝ်းၶႃႈ ၵမ်ႉၸွႆႈ လူင်းမႃးသေ ႁဝ်းၶႃႈ ဢဝ်ပုၼ်ႈၽွၼ်း မိူဝ်းၸွႆႈထႅမ်ပၼ် ၵူၼ်းပၢႆႈၽေး တီႈမိူင်းယၢင်းလႅင် ဝၼ်းတီႈ 2-3 သိုဝ်ႉၶဝ်ႈသၼ် ၶွင် ၵိၼ်ႁႅင်ႈ ၸိူဝ်းၼႆႉမိူဝ်းၸွႆႈထႅမ် တႃႇငိုၼ်း 15 သႅၼ်ပျႃး ႁူဝ်ၵူၼ်း 1,800 ပၢႆ။ ဝၼ်းတီႈ 4 သမ်ႉ ႁဝ်း ၶႃႈ မႃးၵမ်ႉၸွႆႈထႅမ် တီႈ ဝဵင်းပၢင်လွင်းၼႆႉ မႅၼ်ႈငိုၼ်း 15 သႅၼ်ပျႃးလႄႈ တီႈၵူၼ်းပၢႆႈၽေး ၵျွင်းၶရိတ်ႉယၢၼ်ႇထႅင်ႈ 305,000 ပျႃး တႃႇႁူဝ်ၵူၼ်း 1,000 ပၢႆ။ ဢွင်ႈတီႈ ဢၼ်ႁဝ်းၶႃႈ ဢမ်ႇၸၢင်ႈၶဝ်ႈထိုင်လႆႈၼၼ်ႉၵေႃႈ ဢူၼ်းငိုၼ်းပၼ် ၵႂႃႇ ၸိူင်ႉၼႆၶႃႈ”- ဝႃႈၼႆ။

ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ တီႈၸႄႈဝဵင်းပၢင်လွင်းၼႆႉ တေမီးႁူဝ်ၵူၼ်းဢမ်ႇယွမ်း 10,000 ။ ပဵၼ် ၵူၼ်းတၢင်းဝဵင်းၾၢႆၶုၼ်၊ မိူင်းပၢႆးလႄႈ ဝဵင်းပၢင်လွင်း ၸိူဝ်းၼႆႉ။ ယဝ်ႉၵေႃႈ မိူင်းတီးမူဝ်းသူဝ်ႇ၊ လွႆၶေႃ (လွႆၵေႃႇ) ၼႂ်းမိူင်းယၢင်း လႅင် ၸိူဝ်းၼႆႉထႅင်ႈ။

တင်ႈတႄႇ သိုၵ်းမၢၼ်ႈ ယိုတ်းမိူင်းမႃး တေႃႇထိုင်ယၢမ်းလဵဝ်ၼႆႉ ႁႅၼ်းသိုၵ်းလေႃႇတိုၵ်း ၸုမ်းၵႅတ်ႇၶႄၵူၼ်းမိူင်း PDF လႄႈ သိုၵ်းယၢင်းလႅင် မႃးႁၢဝ်ႈႁႅင်း ၼႂ်းၸႄႈမိူင်းတႆး ပွတ်းၸၢၼ်းတၢင်းမိူင်းပၢႆး၊ ၾၢႆၶုၼ်လႄႈ ပၢင်လွင်း ၸိူဝ်းၼႆႉ ယဝ်ႉၵေႃႈ တၢင်း မိူင်းယၢင်းလႅင် ၸိူဝ်းၼၼ်ႉထႅင်ႈ။ ႁဵတ်းႁႂ်ႈၵူၼ်းပိုၼ်ႉတီႈ ပၢႆႈယၢၼ်ႁိူၼ်းယေး ၼပ်ႉႁူဝ်မိုၼ်ႇ။ ႁိူၼ်းယေး ၵူၼ်းဝၢၼ်ႈ ထုၵ်ႇ ၾႆးမႆႈ ထုၵ်ႇယႃႉ/ လူႉၵွႆ သွၵ်ႈတဝ်ထႅင်ႈ တင်းၼမ်။

မိူဝ်ႈဝၼ်းတီႈ 11/3/2023 ၼၼ်ႉ သိုၵ်းမၢၼ်ႈ ၶဝ်ႈဝၢၼ်ႈၼမ်ႉၼဵင်ႈသေ ၵႂႃႇၼႂ်းဝၢင်းၵျွင်းမုၼ်ၸဝ်ႈ၊ ႁူပ်ႉၵူၼ်းဝၢၼ်ႈ ၸိူဝ်း ပၢႆႈၽေးသိုၵ်း မႃးသွၼ်ႈဝႆႉတီႈၵျွင်းမုၼ်ၸဝ်ႈၼၼ်ႉသေ ၶႃႈႁႅမ်ၵူၼ်းဝၢၼ်ႈပၢႆႈၽေးသိုၵ်း 30 ပၢႆ ၼႂ်းၼၼ်ႉ ပႃးသင်ၶၸဝ်ႈ 3 တူၼ် ၼႆယဝ်ႉ။

ပူၼ်ႉမႃး မိူဝ်ႈဝၼ်းတီႈ 28/3/2023 ၼၼ်ႉ သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇ တီႈဝၢၼ်ႈၸလူင်ႈႁွင်ႇ လွင်ႈတုမ်ႉတိူဝ်ႉ ၵူၼ်းမၢတ်ႇၸဵပ်းဢမ်ႇမီး။ ၼႂ်းလိူၼ်မၢတ်ႊၶျ်ၼၼ်ႉ သိုၵ်းမၢၼ်ႈဢဝ်ၶိူင်ႈမိၼ်မႃး လဵပ်ႈၸွမ်း ဢွင်ႈတီႈ ပဵၼ်ပၢင်တိုၵ်းတီႈ ၸႄႈဝဵင်းပၢင်လွင်းၼႆႉ ၵူႈဝၼ်း။

ပႃႇတီႇႁူဝ်သိူဝ် SNLD ၼႆႉ ဢမ်ႇၵႂႃႇသိုပ်ႇတၢင်ႇမၢႆၾၢင်ပႃႇတီႇ ၸွမ်းၼင်ႇသိုၵ်းမၢၼ်ႈပိုၼ်ၽၢဝ်ႇမႃးလႄႈ ပူၼ်ႉမႃးဝၼ်းတီႈ 28/03/2023 ၼၼ်ႉ သိုၵ်းမၢၼ်ႈပိုၼ်ၽၢဝ်ႇယႃႉပႃႇတီႇယဝ်ႉပဵၼ်တၢင်းၵၢၼ်။

SNLD ၼႆႉ မိူဝ်ႈပီ 2021-2022 ၽွင်းသိုၵ်းတႆးယိုဝ်းၵၼ် တၢင်းၸိုင်ႈတႆးပွတ်းႁွင်ႇလူင်းမႃးထိုင်ပွတ်းၸၢၼ်းၼၼ်ႉၵေႃႈ ၶွၼ်ႈႁႅင်းၵၼ်သေ လူင်းပိုၼ်ႉတီႈၸွႆႈထႅမ်ၵူၼ်းပၢႆႈၽေးသိုၵ်း တႃႇၵႃႈၶၼ်ၼပ်ႉႁူဝ်ႁဵင်သႅၼ်ပျႃး။