ႁႅင်းၵၢၼ်ယၢၼ်မိူင်း ၸၢဝ်းတႆး ယိုမ်လူတ်ႉၶိူင်ႈပိူၼ်ႈ ဢဝ်ၵႂႃႇၶၢႆၵိၼ်ယဝ်ႉပၢႆႈပႅတ်ႈ၊ ၸဝ်ႈၶွင်လူတ်ႉၶိူင်ႈ မႃးႁၼ်တူၵ်ႇယွၼ်းၶိုၼ်း၊ ဝႅၼ်တူၵ်းၼမ်ႉပိင်းပၢႆႈၼီႈ ထုၵ်ႇၸဝ်ႈၼႃႈတီႈထႆး တီႉၺွပ်းပၼ်တူတ်ႈတၢမ်ႇ ၸွမ်းၼင်ႇပၵ်းပိူင်မၢႆမီႈ ဝၢၼ်ႈမိူင်းမီး။

သိုဝ်ႇၶၢဝ်ႇၵဵင်းမႆႇၼိဝ်ႊသ် ဢွၵ်ႇၶၢဝ်ႇၵႂႃႇဝႃႈ- မိူဝ်ႈဝၼ်းတီႈ 08/04/2018 ယၢမ်းၵၢင်ၼႂ် 7 မူင်း ၸဝ်ႈၼႃႈတီႈပလိၵ်ႈထႆးလႄႈ ၽူႈၵဵဝ်ႇၶွင်ႈ တီႉၺွပ်းႁႅင်းၵၢၼ်ယၢၼ်မိူင်း ၸိုဝ်ႈၸၢႆးသၢႆး တီႈၾင်ႇၼမ်ႉပိင်း ႁိမ်းၶူဝ်ၼၶွၼ်းၽိင်း၊ ၼိူဝ်သဵၼ်ႈတၢင်းၵႅဝ်ႈၼဝရတ်ႉ ဢိူင်ႇဝတ်ႉၵဵတ်ႇ မိူင်းၵဵင်းမႆႇ။ တီႉၺွပ်းၼႂ်းၶေႃႈႁႃ တၢင်းၽိတ်း လၵ်ႉလူတ်ႉၶိူင်ႈတၢင်ႇၵေႃႉသေ ဢဝ်ၶၢႆၵိၼ်ပႅတ်ႈ-ၼႆယဝ်ႉ။

ၸၢႆးသၢႆးၼႆႉ ဢႃႇယု 16 ပီ၊ ၸၢဝ်းၶိူဝ်းတႆး၊ ၶဝ်ႈမိူင်းထႆး ႁဵတ်းၵၢၼ်ၵေႃႇသၢင်ႈ တီႈၼႂ်းၵဵင်းမႆႇ။ ပူၼ်ႉမႃးမိူဝ်ႈ လိူၼ်မၢတ်ႊၶျ် ဝၼ်းတီႈ 11 ၼၼ်ႉ မၼ်းၸၢႆးယိုမ်ဢဝ်လူတ်ႉၶိူင်ႈ တီႈၼၢင်းယိင်းၵူၼ်းႁူႉၸၵ်းၵၼ်သေ ဢဝ်ၵႂႃႇလႆႈသွင်ဝၼ်းယဝ်ႉၵေႃႈ ဢမ်ႇမႃးသူင်ႇၶိုၼ်း၊ ၼၢင်းယိင်းၵေႃႉပဵၼ် ၸဝ်ႈၶွင်လူတ်ႉၶိူင်ႈၼၼ်ႉ လႆႈၵႂႃႇတၢင်ႇလၢတ်ႈဝႆႉတီႈႁူင်းပလိၵ်ႈ-ၼႆယဝ်ႉ။

ထိုင်မႃးၶမ်ႈၶိုၼ်းဝၼ်းတီႈ 7 လိူၼ်ဢေႊပရိူဝ်ႊၼႆႉ မွၵ်ႈယၢမ်း 7 မူင်းၶိုင်ႈ၊ ၼၢင်းယိင်းၸဝ်ႈၶွင်လူတ်ႉၶိူင်ႈ ႁၼ်မၼ်းၸၢႆးမႃးမီးယူႇတီႈ ၶူဝ်ၼမ်ႉပိင်း (ၼၶွၼ်းၽိင်း)ႁိမ်းၵၢတ်ႇမိူင်းမႂ်ႇသေ  လႆႈၵႂႃႇတူၵ်ႇလၢတ်ႈ ယွၼ်းၶိုၼ်း။ ၸၢႆးသၢႆးလႅၼ်ႈပၢႆႈဝႅၼ်လူင်းၼမ်ႉပိင်း၊ ၸဝ်ႈၶွင်လူတ်ႉၶိူင်ႈ ႁွင်ႉသႅၼ်ႇယွၼ်းတၢင်းၸွႆႈထႅမ်သေ ၾၢႆႇၸဝ်ႈၼႃႈတီႈပလိၵ်ႈ ဢိၵ်ႇၽူႈၵဵဝ်ႇၶွင်ႈၶဝ် မႃးႁႄႉၵႅတ်ႇဝႅတ်ႉလွမ်ႉမၼ်းၸၢႆးဝႆႉ၊ ၶိုၼ်းၼၼ်ႉ မၼ်းၸၢႆးၵႂႃႇမူၵ်းသေႃႉတူဝ် တီႈႁိူဝ်းလမ်းၼိုင်ႈ ၼႂ်းမႄႈၼမ်ႉပိင်း၊ ထိုင်ၵၢင်ၼႂ်မႃး ၸင်ႇလုၺ်းၵၢၼ်းဢွၵ်ႇမႃး သေထုၵ်ႇတီႉၺွပ်း-ၼႆယဝ်ႉ။

ၸၢႆးသၢႆးယွမ်းႁပ်ႉလၢတ်ႈဝႃႈ- လူတ်ႉၶိူင်ႈလမ်းၼၼ်ႉ လႆႈၵႂႃႇၶၢႆၵိၼ်ပႅတ်ႈယဝ်ႉ။ ၵႂႃႇၶၢႆတီႈၼိူဝ်လွႆသေ လႆႈငိုၼ်းမႃးၼိုင်ႈမိုၼ်ႇဝၢတ်ႇ၊ မႅင်ႇပၼ်တႆးၵေႃႉမၼ်းသွင်ၵေႃႉသေ တႃႇမၼ်းလႆႈသီႇႁဵင်ဝၢတ်ႇ။ ဢႅဝ်ႇလၢဝ်းသၢဝ်းၼၢဝ်းတႂ်ႈၼိူဝ်သေ ငိုၼ်းၼၼ်ႉၵေႃႈ ၸၢႆႇၵိၼ်ပႅတ်ႈမူတ်းယဝ်ႉ-ဝႃႈၼႆ။

မိူဝ်ႈၸဝ်ႈၼႃႈတီႈၶဝ် ထဵတ်ႈထၢမ်လွင်ႈ ဢူၺ်းၵေႃႉမၼ်းသွင်ၵေႃႉ ပိူဝ်ႈတႃႇတိတ်းတၢမ်တီႉၺွပ်းၼၼ်ႉ ၸၢႆးသၢႆးတွပ်ႇဝႃႈ ၶႃသွင်ၵေႃႉၼၼ်ႉၵေႃႈ ၵွပ်ႈလၵ်ႉၶူဝ်းၶွင်ပိူၼ်ႈလႄႈ ၺႃးတီႉၺွပ်းၵႂႃႇဢွၼ်ၼႃႈၼႆႉယဝ်ႉ၊ ၵူၺ်းၵႃႈ ၺႃးတီႉၺွပ်းတီႈလႂ်ၼၼ်ႉ ဢမ်ႇလႆႈႁူႉ-ဝႃႈၼႆ။

ၼၢင်းယိင်း ၸဝ်ႈၶွင်လူတ်ႉၶိူင်ႈလၢတ်ႈဝႃႈ- ႁူႉၸၵ်းၵၼ်တင်း ၸၢႆးသၢႆးၼႆႉမႃးႁိုင်ယဝ်ႉ၊ ႁၼ်ဝႃႈမၼ်းၸၢႆး ပဵၼ်ၵူၼ်းတူဝ်လဵၵ်ႉၵေႃႈပိူင်ၼိုင်ႈ၊ သမ်ႉတူၺ်းၾၢင်ႁၢင်ႈၼႃႈတႃၵေႃႈ လႅပ်ႈပဵၼ်ၵူၼ်းသိုဝ်ႈယူဝ်းဝႆႉလႄႈ ၸင်ႇပၼ်ယိုမ်လူတ်ႉၶိူင်ႈၵႂႃႇ- ဝႃႈၼႆ။