ၵႃးလူင်ၽႃႇၵၼ် 3 လမ်းသွၼ်ႉၵၼ်ၶႂၢင်တၢင်းဝႆႉလႄႈ ၵႃးၵႂႃႇမႃးၸွမ်းတၢင်း တီႈႁူၺ်ႈၵိုတ်ႈ ၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၊ သဵၼ်ႈတၢင်းပိၵ်ႉတၼ် ရူတ်ႉၵႃးတိတ်းၶမ်သွင်ၾင်ႇ တၢင်းၶိုၼ်ႈလႄႈတၢင်းလူင်း ဢမ်ႇယွမ်း 300 လမ်း။
မိူဝ်ႈၼႆႉ ဝၼ်းတီႈ 30/3/2023 ၵၢင်ၼႂ် 9 မူင်းၼၼ်ႉ ၵႃးလမ်းၼိုင်ႈ ပရိၵ်ႈ(ပရဵၵ်ႇ)ပွင်ႇ လေႃႈလူင်းလွႆ ၽွင်းထိုင်တီႈ သဵၼ်ႈတၢင်းငွၵ်းၼၼ်ႉ တင်ႈၸႂ်ႁေႃႈၶဝ်ႈၵႂႃႇၶမ်ၼႂ်းၵႄႈ ၵႃးဢၼ်လုၵ်ႉတၢင်းဝဵင်းလိူဝ်ႇၶိုၼ်ႈမႃးလႄႈ ၵႃးဢၼ်တေလူင်းၵႂႃႇဝဵင်းလိူဝ်ႇ ။ ရူတ်ႉၵႃး 3 လမ်းၶွင်ႉၶမ်ၵၼ်ဝႆႉတဵမ်တၢင်း ႁဵတ်းႁႂ်ႈသဵၼ်ႈတၢင်းတိတ်းၶမ် ဢမ်ႇၸၢင်ႈၶိုၼ်ႈလူင်း တၼ်တင်းဝၼ်း။
ၽူႈတူင်ႉၼိုင်ၼႂ်းၸုမ်းၸွႆႈတူင်ႇဝူင်းၵူၼ်းၵျွၵ်ႉမႄး( ကမ်းလင့်လက်များ)လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ တီႈၶဝ်ပဵၼ်ၼၼ်ႉသမ်ႉ ပဵၼ်တီႈတၢင်းငွၵ်းငႅၵ်းဝႆႉဢေႃႈ ၵႆဝဵင်းၵျွၵ်ႉမႄးမွၵ်ႈ 20 လၵ်းၼႆႉ။ သင်ပွႆႇၽႃႇသိုဝ်ႈသိုဝ်ႈတႄႉ ၵူၼ်းႁေႃႈမၼ်းတေၶႂ်ႈၵိၼ်းၸႂ်ဝႆႉ။ ၼႆႉတႄႉ လွင်ႈမၢတ်ႇၸဵပ်း ဢမ်ႇပေႃးမီးသင် လိူဝ်သေဝႃႈ ၼိူဝ်ႉၼင်လွၵ်ႈဢိတ်းဢွတ်း ။ သဵၼ်ႈတၢင်းတႄႉတၼ်ၵႂႃႇမွၵ်ႈ 2 ၸူဝ်ႈမူင်းၼႆႉဢေႃႈ။ ၵႃးဢၼ်လႆႈၵိုတ်းပႂ်ႉ တၢင်းၼိူဝ်လႄႈတၢင်းတႂ်ႈ မီးမွၵ်ႈ 300 လမ်းၼႆႉ ” – ဝႃႈၼႆ။
ၵႃးလူင်ဢၼ် ပရိၵ်ႈပွင်ႇၼႆႉ ပဵၼ်ၵႃးတၢင်ႇထၢၼ်ႇႁိၼ် လုၵ်ႉတၢင်း ၸႄႈဝဵင်းသီႇပေႃႉသေ တေဢၢၼ်းၵႂႃႇ ဝဵင်းလိူဝ်ႇ ၵႃးလူင်ထႅင်ႈသွင်လမ်းၼၼ်ႉသမ်ႉ ပဵၼ်တၢင်ႇၵုၼ်ႇ လမ်းၼိုင်ႈတေလူင်းဝဵင်းလိူဝ်ႇ လမ်းၼိုင်ႈတေၶိုၼ်ႈမူႇၸေႊ လွင်ႈ တုမ်ႉတိူဝ်ႉမၢတ်ႇၸဵပ်းႁၢဝ်ႈႁႅင်းတႄႉဢမ်ႇမီး။
ပူၼ်ႉမႃး မိူဝ်ႈဝၼ်းတီႈ 19/3/2023 ၼႆႉၵေႃႈ ၵူၼ်းဝၢၼ်ႈပွၵ်ႉၸၢၼ်း ၼႂ်းဢိူင်ႇမိူင်းၶိူဝ်း ၶီႇရူတ်ႉၵႃး ပႃႊၵျႄႊရူဝ်ႊ ဢွၵ်ႇၶၢဝ်းတၢင်း တေၵႂႃႇပွႆးလွႆပၢင်ၽြႃး ႁိမ်းပဵင်းၽင်ႇဝၢၼ်ႈၼွင် ၼၼ်ႉၼႆသေ ဢဝ်ၵႃးၵႂႃႇပဵၼ်ၽေးၵိုင်ႉၵၢင်ႉပိၼ်ႈၶႂမ်ႈ ၼႂ်းၵႄႈမိူင်းၶိူဝ်း – ဝၢၼ်ႈၸၢၼ်း (ပွၵ်ႉမူၺ်ႇတေႃႇ ) ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၊ ယွၼ်ႉႁေႃႈဝႆးသေ ဢမ်ႇၵုမ်းလႆႈႁႅင်းရူတ်ႉ လုၵ်ႈဢွၼ်ႇယိင်းၵေႃႉၼိုင်ႈလႄႈ ၵူၼ်းႁေႃႈၵႃး မၢတ်ႇၸဵပ်းႁႅင်း လူႉတၢႆ ။
