ႁၢၼ်ႉၶၢႆၶူဝ်းၵုၼ်ႇ ဝဵင်းမူႇၸေႊ ထုၵ်ႇၸုမ်းဢမ်ႇႁူႉၾၢႆႇ လွၵ်ႇငိုတ်ႈယွၼ်းငိုၼ်း ၼပ်ႉႁူဝ်ပၢၵ်ႇသႅၼ်   

ႁၢၼ်ႉၶၢႆၶူဝ်းၵုၼ်ႇ (ၵေႃႇသၢင်ႈႁိူၼ်း) တီႈဝဵင်းမူႇၸေႊ ႁၢၼ်ႉၼိုင်ႈ ထုၵ်ႇၸုမ်းဢမ်ႇႁူႉၾၢႆႇ လွၵ်ႇငိုတ်ႈယွၼ်းငိုၼ်း 250 သႅၼ်ပျႃး သင်ဢမ်ႇပၼ်ၸိုင် တေဢဝ်မၢၵ်ႇမႃးပွႆႇတႅၵ်ႇ တီႈႁၢၼ်ႉလူႉၵွႆပႅတ်ႈ ဝႃႈၼႆ။

ႁၢင်လိူၼ်မၢတ်ႊၶျ် 2023 ၼႆႉမႃး မီးၸုမ်းဢမ်ႇႁူႉၾၢႆႇ သူင်ႇလိၵ်ႈတင်း ႁၢင်ႈမၢၵ်ႇပွမ်း ၸူးၸဝ်ႈၶွင်ႁၢၼ်ႉၶၢႆ ၶူဝ်းၵုၼ်ႇ တီႈပွၵ်ႉၸၢၼ်း ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇသေ ႁႂ်ႈသႂ်ႇငိုၼ်းပၼ်ၶဝ် တႃႇ 250 သႅၼ်ပျႃး ၼႂ်းဝၼ်းတီႈ 25 ၼႆႉ ႁႂ်ႈပဵၼ်ဝၼ်းလိုၼ်းသုတ်း ဝႃႈၼႆ။

ၵူၼ်းပိုၼ်ႉတီႈ ဝဵင်းမူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸုမ်းဢမ်ႇႁူႉၾၢႆႇၼၼ်ႉ ၶဝ်ဝႃႈ ၶဝ်ပဵၼ်ၸုမ်းပွႆႇ မၢၵ်ႇ (ဖောက်ခွဲရေး) ၼႆဝႃႇ။ ၶဝ်သူင်ႇလိၵ်ႈယွၼ်းငိုၼ်း မႃးတီႈၼႂ်းၾူၼ်း ၸဝ်ႈၶွင်သႅင်ႇ/ ႁၢၼ်ႉၼၼ်ႉသေ ၶဝ်ယွၼ်းမႃး ငိုၼ်း 250 သႅၼ်။ ပေႃးဝႃႈ ဢမ်ႇပၼ် ၸွမ်းၼင်ႇၶဝ်ယွၼ်းၼႆၸိုင် ၶဝ်တေဢဝ်မၢၵ်ႇမႃးပွႆႇသႂ်ႇတီႈႁၢၼ်ႉလူႉၵွႆပႅတ်ႈ”- ဝႃႈၼႆ။

ၼႂ်းလိၵ်ႈ ဢၼ်ၸုမ်းဢမ်ႇႁူႉၾၢႆႇ လွၵ်ႇငိုတ်ႈ သူင်ႇၸူးၸဝ်ႈၶွင်ႁၢၼ်ႉၶၢႆၶူဝ်းၵုၼ်ႇၼၼ်ႉဝႃႈ ပေႃးဢမ်ႇပၼ်ၸွမ်းလႆႈ ၼႂ်း ဝၼ်းတီႈ 25 ယၢမ်းဝၢႆးဝၼ်း 2 မူင်းၼႆၸိုင် တေဢဝ်မၢၵ်ႇမႃးပွႆႇသႂ်ႇ တီႈႁၢၼ်ႉ သင်ၶႂ်ႈၵႂႃႇတိူင်ႇလၢတ်ႈ တီႈပလိၵ်ႈ/ သိုၵ်း မၢၼ်ႈ ၸိူဝ်းၼႆႉၵေႃႈ ၵႂႃႇတိူင်ႇလႃႈ ၵူၺ်းၼႃႇ ပေႃးဢမ်ႇႁဵတ်းၸွမ်းၼင်ႇ ဢၼ်လၢတ်ႈမႃးၸိူဝ်းၼႆႉၸိုင် တေ ၺႃးမၢၵ်ႇပွႆႇ သႂ်ႇ တီႈႁၢၼ်ႉလူႉလႅဝ်တႄႉ ဝႃႈၼႆ။

“ၶဝ်ဢဝ်ၶႅပ်းႁၢင်ႈမၢၵ်ႇပွမ်း/ မႅင်း သူင်ႇမႃးသေ လၢတ်ႈဝႃႈ ပေႃးဢမ်ႇပၼ် ၸွမ်းၶၢဝ်းယၢမ်းၸိုင် တေဢဝ်မၢၵ်ႇမႅင်း ၸိူင်ႉ ၼင်ႇ ၶဝ်ၼႄဝႆႉၼၼ်ႉ မႃးပွႆႇသႂ်ႇၼႆဝႃႇ။ မိူဝ်ႈလဵဝ် ၸဝ်ႈၶွင်ႁၢၼ်ႉ တိုၵ်ႉငူပ်ႉငီႉဢုပ်ႇတင်းၶဝ်ယူႇ။ တေဝႃႈ ၵႂႃႇတိူင်ႇလၢတ်ႈ ၸုမ်းၼၼ်ႉၸုမ်းၼႆႉ ၼႆၵေႃႈ ၸူဝ်ႈၶၢဝ်းသိုၵ်းမၢၼ်ႈ ယိုတ်ႈမိူင်းမႃးၼႆႉ ၸုမ်းလႂ်ၵေႃႈ ဢမ်ႇၸၢင်ႈၸႂ်ယႂ်ႇလႆႈသေၸုမ်း။ တေဝႃႈ ၸုမ်းယိပ်းၵွင်ႈၵၢင်ႇႁဵတ်းၼႆၵေႃႈ ဢမ်ႇႁူႉဝႃႈတေပဵၼ်ၸုမ်းလႂ်ႁဵတ်း ယွၼ်ႉမီးပဵၼ်လၢႆမူႇလၢႆၸုမ်း ၸိူင်ႉၼႆ။ ၸုမ်းဢၼ်ၶဝ်မႃးလွၵ်ႇငိုတ်ႈယွၼ်းငိုၼ်းၼႆႉ တေပဵၼ်ၵူၼ်းလႄႇႁႃလႅၼ်ၵိၼ်ပိူၼ်ႈႁႃႉ ဢမ်ႇၼၼ် ပဵၼ်ၸုမ်းယိပ်းၵွင်ႈ ၵၢင်ႉတႄႉႁႃႉ ဢၼ်ဝႃႈၼၼ်ႉ ပႆႇၸၢင်ႈလၢတ်ႈလႆႈ” – ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

ၼႂ်းႁူဝ်ပီ 2023 ၼႆႉမႃး ႁၢၼ်ႉၶၢႆၶူဝ်းၵုၼ်ႇ ၼႂ်းဝဵင်းမူႇၸေႊ ထုၵ်ႇၸုမ်းဢမ်ႇႁူႉၾၢႆႇ သူင်ႇလိၵ်ႈႁၢင်ႈမၢၵ်ႇပွမ်း လွၵ်ႇငိုတ်ႈ ၸိူင်ႉၼႆၼႆႉ မီးမႃး 4-5 ႁၢၼ်ႉ ဝႃႈၼႆ။

ၵူၼ်းၼုမ်ႇ ပိုၼ်ႉတီႈ ဝဵင်းမူႇၸေႊ လၢတ်ႈဝႃႈ – “သႅင်ႇၼမ်ႉၼဵင်ႈ၊ သႅင်ႇၶၢႆၶူဝ်း ၺႃးလွၵ်ႇငိုတ်ႈမႃး ဢၼ်တီႈၶႃႈႁူႉၼႆႉ တေ မီး 4-5 သႅင်ႇယဝ်ႉ။ ဢၼ်ၶႃႈဢမ်ႇႁူႉ တေမီးထႅင်ႈပဵၼ်လၢႆသႅင်ႇ။ ၵူၺ်းၼႃႇ ၶဝ်ဢမ်ႇပေႃးယွၼ်းၼမ်ႉပဵင်းထၢၼ်ႇၼႆႉ ၶဝ်ငူပ်ႉငီႉၵၼ်သေ ယဵၼ်ၵႂႃႇႁင်းၽႂ်မၼ်း ၸိူင်ႉၼၼ်ၵူၺ်း”- ဝႃႈၼႆ။

ယၢမ်းလဵဝ် ၵူၼ်းၶၢႆၶူဝ်းၼိူဝ်ဢွၼ်ႊလၢႆႊ (Online) ၸိူဝ်းၼႆႉၵေႃႈ ဢွၼ်ၵၼ် ၵိုတ်းလိုဝ်ႈၼမ် ယွၼ်ႉတီႈၾဵတ်ႉပုၵ်ႉၶဝ် ၼၼ်ႉ သႂ်ႇဝႆႉမၢႆၾူၼ်း တီႈၵပ်းသိုပ်ႇဝႆႉလႄႈ ၵူဝ်ၸုမ်းဢမ်ႇႁူႉၾၢႆႇ သူင်ႇလိၵ်ႈႁၢင်ႈမၢၵ်ႇၵွင်ႈ လွၵ်ႇငိုတ်ႈၸူး ၸိူင်ႉၼႆ။

ပူၼ်ႉမႃး မိူဝ်ႈဝၼ်းတီႈ 24/2/2023 ယၢမ်းၵၢင်ၼႂ် 5 မူင်းၼၼ်ႉ ၼၢင်းၶိၼ်ႇမႃႇဢူး ဢႃယု 37 ပီ ၸဝ်ႈၶွင်ႁၢၼ်ႉၶၢႆၶူဝ်း ၵုၼ်ႇ (ႁၢၼ်ႉလဵၵ်ႉ) ဢၼ်ပိုတ်ႇၶၢႆဝႆႉ တီႈပွၵ်ႉၼိူဝ် ဝဵင်းၼမ်ႉၶမ်း ၼၼ်ႉၵေႃႈ ထုၵ်ႇၽူႈၸၢႆး 2 ၵေႃႉ ၶီႇၵႃးမႃးလမ်းၼိုင်ႈသေ တီႉၺွပ်းဢဝ်တူဝ်မၼ်းၼၢင်း တီႈၼႂ်းႁိူၼ်းၵႂႃႇ ၵမ်းသိုဝ်ႈ။ ဝၢႆးတီႉၵႂႃႇယဝ်ႉ ၸုမ်းဢမ်ႇႁူႉၾၢႆႇၼၼ်ႉ ၵပ်း ၾူၼ်းၸူးတီႈႁိူၼ်းမၼ်းၼၢင်းသေ ယွၼ်းငိုၼ်း 600 သႅၼ်ပျႃး ႁႂ်ႈၵႂႃႇထုတ်ႇဢဝ်တူဝ်မၼ်းၼၢင်းၶိုၼ်း သင်ဢမ်ႇၵႂႃႇထုတ်ႇၸိုင် တေယိုဝ်းတၢႆပႅတ်ႈ။ ယူႇတီႈ ၵူၼ်းတီႈႁိူၼ်းမၼ်းၼၢင်း လႆႈယွၼ်းတွင်းပၢၼ်ႇတႄႉတႄႉဝႃႈဝႃႈသေ လႆႈပၼ်ငိုၼ်း 80 သႅၼ်ယဝ်ႉ ၸင်ႇပွႆႇတူဝ်ပၼ်ၶိုၼ်း။