သိုၵ်းမၢၼ်ႈ ယိုတ်းမိူင်း ဢဝ်ဢဵၼ်ႁႅင်းတင်းၼမ်လၢႆ ၶဝ်ႈသွၵ်ႈတဝ် ၼႂ်းႁိူၼ်းယေးၵူၼ်းဝၢၼ်ႈ ၽွင်ႈၸဝ်ႈ ႁိူၼ်းဢမ်ႇယူႇ တီႈဝဵင်းယႂႃႇငၢၼ်ႇ လႆႈၵႂႃႇငိုၼ်း 30 သႅၼ်လႄႈ သၢႆၶေႃးၶမ်း ၸိူဝ်းၼႆႉထႅင်ႈ။  

ပူၼ်ႉမႃး မိူဝ်ႈဝၼ်းတီႈ 25/3/2023 ၼႆႉ သိုၵ်းမၢၼ်ႈ ဢဵၼ်ႁႅင်း 100 ပၢႆ ၶဝ်ႈသွၵ်ႈတဝ် ၼႂ်းႁိူၼ်းယေး ၵူၼ်းဝၢၼ်ႈလေႇၶျွင်း (အလည်ချောင်း) ၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်းသေ သွၵ်ႈဢဝ်ၵႂႃႇ ၶူဝ်းၸႂ်ႉသွႆ ၼႂ်းႁိူၼ်းယေးသေဢမ်ႇၵႃး လႆႈၵႂႃႇထႅင်ႈငိုၼ်း 30 သႅၼ် လႄႈ သၢႆၶေႃးၶမ်း 2 သဵၼ်ႈ။  

ၵူၼ်းပိုၼ်ႉတီႈ ဝဵင်းယႂႃႇငၢၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုၵ်းမၢၼ်ႈ ၶဝ်မႃးသွၵ်ႈတဝ် ၼႂ်းႁိူၼ်းၵူၼ်းဝၢၼ်ႈလေႇၶျွင်းသေ မၢင်ႁိူၼ်း ၶဝ်သွၵ်ႈဢဝ် လႆႈၵႂႃႇငိုၼ်း 30 သႅၼ်ပျႃး။ သၢႆၶေႃးၶမ်း 2 သဵၼ်ႈ။ TV ၵေႃႈဢဝ်ၵႂႃႇ။ တိူၵ်ႈသႂ်ႇၶူဝ်း ၸိူဝ်းၼႆႉ ၶဝ်သွၵ်ႈတဝ်ယဝ်ႉ ပေႃႉၵွႆမူတ်း။ မၢင်ႁိူၼ်း ဢဝ်ၵႂႃႇ ၶူဝ်းၸႂ်ႉသွႆ ၼႂ်းႁိူၼ်းယေး ၸိူဝ်းၼႆႉထႅင်ႈ။ ဢၼ်ၶဝ်ႁဵတ်းၼၼ်ႉ ၽွင်းၸဝ်ႈႁိူၼ်းဢမ်ႇယူႇ တိုၵ်ႉၵႂႃႇႁဵတ်း ၵၢၼ်ယူႇၼၼ်ႉၶႃႈဢေႃႈ။ သိုၵ်းမၢၼ်ႈ ၸိူဝ်း ၼၼ်ႉ ၵမ်ႈၽွင်ႈပႆတိၼ်မႃး။ ၵမ်ႈၽွင်ႈၶီႇၵႃးမႃး။ ၸိူဝ်းယူႇၼိူဝ်ၵႃး ၼၼ်ႉ ယုၵ်ႉၵွင်ႈၼႄသေ ႁွင်ႉလၢတ်ႈၵူၼ်းဝၢၼ်ႈ ၸိူဝ်းတိုၵ်ႉမီးယူႇဝႆႉၼႂ်းဝၢၼ်ႈၼၼ်ႉ ယူႇယဵၼ်ယဵၼ်ဝႆႉ ဝႃႈၼႆဢေႃႈ မိူဝ်ႈၽွင်းၶဝ်သွၵ်ႈတဝ်ၼၼ်ႉ”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 26 ၼႆႉၵေႃႈ သိုၵ်းမၢၼ်ႈ ဢဵၼ်ႁႅင်းမွၵ်ႈ 30 ၵေႃႉ ၶဝ်ႈမႃးၼႂ်းဝၢၼ်ႈငႅတ်ႉတွၵ်ႉ (ငှက်သောက်ကျေးရွာ) ၼႂ်းၸႄႈဝဵင်း ယႂႃႇငၢၼ်ႇသေ မၢပ်ႇၼႄးၵူၼ်းဝၢၼ်ႈဝႃႈ ၵမ်ႉထႅမ်ၸုမ်း PDF ၼႆသေ ၸုတ်ႇၽဝ်ႁိူၼ်းယေး ၵူၼ်းဝၢၼ်ႈပႅတ်ႈ လင်ၼိုင်ႈ။

ၵူၼ်းပိုၼ်ႉတီႈ ဝဵင်းယႂႃႇငၢၼ်ႇ ၽူႈယိင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ၼႄးဝႃႈ ၵူၼ်းဝၢၼ်ႈ ၵပ်းသိုပ်ႇတင်း ၸုမ်း PDF ၼႆ သေ ဢဝ်ၾႆးၸုတ်ႇၽဝ် ႁိူၼ်းၵူၼ်းဝၢၼ်ႈပႅတ်ႈ လင်ၼိုင်ႈ။ ယဝ်ႉၵေႃႈ ထၢမ်ဝႃႈ ၸွင်ႇႁူႉၶၢဝ်ႉ PDF ႁႃႉ ၼႆၸိူဝ်းၼႆႉထႅင်ႈ လိူဝ်ၼၼ်ႉ ပၢႆ ယိုဝ်းၵွင်ႈ လွၵ်ႇငိုတ်ႈၵူၼ်းဝၢၼ်ႈထႅင်ႈ မွၵ်ႈ 5 ၵမ်း ၼႆႉဢေႃႈ”- ဝႃႈၼႆ။

ဢိင်ၼိူဝ် လွင်ႈသိုၵ်းမၢၼ်ႈ ယိုဝ်းၵွင်ႈလွၵ်ႇငိုတ်ႈၵူၼ်းဝၢၼ်ႈႁၢဝ်ႈႁႅင်း ၸိူင်ႉၼႆသေ ႁဵတ်းႁႂ်ႈၵူၼ်းဝၢၼ်ႈ ဢွၼ်ၵၼ်ၵူဝ် ဢမ်ႇမီးလွင်ႈႁူမ်ႇ လူမ်ႈလႄႈ ၵမ်ႈၽွင်ႈ ပၢႆႈဢွၵ်ႇယၢၼ်ႁိူၼ်းယေးသေ ၵႂႃႇသွၼ်ႈယူႇဝႆႉတီႈလွတ်ႈၽေးၵၼ် ၸိူဝ်းၼႆႉ ၵေႃႈမီးယဝ်ႉ ဝႃႈၼႆ။

တင်ႈတႄႇ သိုၵ်းမၢၼ်ႈ ယိုတ်းမိူင်းမႃး မိူဝ်ႈဝၼ်းတီႈ 1/2/2021 ၼၼ်ႉမႃး ႁၢၼ်ႉတေႃႇထိုင် ဝၼ်းတီႈ 28/2/2023 ၼႆႉ သိုၵ်းမၢၼ်ႈ ႁူမ်ႈတင်း ၸုမ်းယိပ်းၵွင်ႈ ဢၼ်ယူႇၾၢႆႇတႂ်ႈၶဝ်ၵုမ်းၵမ်ၼၼ်ႉ ၶဝ်ႈသွၵ်ႈတဝ် ၸုတ်ႇၽဝ်ႁိူၼ်းယေးၵူၼ်းမိူင်းတႆးမႃး မီးၵႂႃႇ 135 လင်ယဝ်ႉ ၼႂ်းၼၼ်ႉ ပႃးႁိူၼ်းယေးၵူၼ်းမိူင်း ၸႄႈဝဵင်းယႂႃႇငၢၼ်ႇ 18 ၼႆ ယူႇတီႈ Data For Myanmar ပိုၼ်ၽၢဝ်ႇ ဢွၵ်ႇမိူဝ်ႈဝၼ်းတီႈ 20/3/2023 ဝႆႉၼင်ႇၼႆ။