Friday, February 23, 2024

ၵူၼ်းပၢႆႈၽေးသိုၵ်း တီႈဝဵင်းပၢင်လွင်း 300 ပၢႆ လူဝ်ႇတၢင်းၸွႆႈထႅမ်

Must read

ၵူၼ်းပၢႆႈၽေးသိုၵ်း 300 ပၢႆ ဢၼ်မႃးမီးတီႈ ဝတ်ႉလွႆၸိင်း ဝဵင်းပၢင်လွင်း ၸိုင်ႈတႆးပွတ်းၸၢၼ်း ၼၼ်ႉ လူဝ်ႇတၢင်းၸွႆႈထႅမ်ၶဝ်ႈၼမ်ႉတၢင်းၵိၼ်ႁၢဝ်ႈႁႅင်း။

ၵူၼ်းပၢႆႈၽေးသိုၵ်း 320 ၵေႃႉၸိူဝ်းမႃးမီးတီႈဝတ်ႉလွႆၸိင်းၼႆႉ ပၢႆႈၽေးပၢင်တိုၵ်းသိုၵ်းမၢၼ်ႈလႄႈ သိုၵ်းၵႅတ်ႇၶႄၵူၼ်းမိူင်းမႃး ၸဵမ်မိူဝ်ႈႁူဝ်ပီ 2023 ၼႆႉ။ ဢိင်ၼိူဝ်ၶၢဝ်းယၢမ်းၵေႃႈႁိုင်မႃး လႄႈ ယၢမ်းလဵဝ်ၸဝ်ႈတႃႇၼ ၵေႃႈဢမ်ႇမီးၼမ်ပဵင်း ၵူႈပွၵ်ႈ ၊ ၵူၼ်းပၢႆႈၽေးသိုၵ်း ယၢပ်ႇၽိုတ်ႇၵိၼ်းၸႂ်လိူဝ်ႁႅင်း ဝႃႈၼႆ။

- Subscription -
ၵူၼ်းပၢႆႈၽေးသိုၵ်းဝဵင်းပၢင်လွင်း


ၼၢင်းယိင်းၵူၼ်းပၢႆႈၽေးသိုၵ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “လူဝ်ႇၶဝ်ႈသၢၼ် ၼမ်ႉမီႇ ၼမ်ႉမၼ်း ဢေႃႈ။ ၸဝ်ႈတႃႇၼ ဢမ်ႇမႃးၵမ်ႉၸွႆႈႁိုင်ယဝ်ႉ။ ႁဝ်းၶႃႈၵေႃႈလႆႈၵႂႃႇႁဵတ်းၵၢၼ် ႁႃငိုၼ်းသေမႃးလဵင်ႉၵၼ်ႁဵတ်းၼႆၶႃႈဢေႃႈ။ မၢင်ၵေႃႉ ဢႃယုယႂ်ႇယဝ်ႉ ဢမ်ႇၸၢင်ႈၵႂႃႇႁဵတ်းၵၢၼ်။ ၶဝ်ယိင်ႈၶႅၼ်းယၢပ်ႇလိူဝ်ႁဝ်းဢေႃႈ။ လႆႈပႂ်ႉဢၼ်မုၼ်ၸဝ်ႈၸုၼ်ႉ ၼၼ်ႉၶႃႈၼႃႇ ”- ဝႃႈၼႆ။

ဢၼ်ႁဵတ်းႁႂ်ႈ ၸဝ်ႈတႃႇၼ ဢမ်ႇၸၢင်ႈမႃးလူႇတၢၼ်းၶဝ်ႈၼမ်ႉတၢင်းၵိၼ်ၼႆႉ ပဵၼ်ယွၼ်ႉ ၶၢဝ်းတၢင်းတႃႇၵႂႃႇမႃးႁႃၵၼ်ယၢပ်ႇၽိုတ်ႇ၊ သိုၵ်းမၢၼ်ႈတင်ႈၵဵတ်ႉ/လၢၼ်ႇ ပႂ်ႉၵူတ်ႇထတ်းႁၢဝ်ႈႁႅင်း ။ ၼွၵ်ႈလိူဝ်ၵူၼ်းပၢႆႈၽေးသိုၵ်းတီႈဝၢၼ်ႈလွႆၸိင်းယဝ်ႉ ၵူၼ်းပၢႆႈၽေးသိုၵ်းတီႈဝၢၼ်ႈမွၵ်ႇ ဝဵင်းပၢင်လွင်း ၵေႃႈယၢပ်ႇၽိုတ်ႇမိူၼ်ၵၼ်။


“တီႈဝၢၼ်ႈမွၵ်ႇၼႆႉ ၼွၵ်ႈလိူဝ်ၶဝ်ႈၼမ်ႉတၢင်းၵိၼ်ယဝ်ႉ ၽႃႈႁူမ်ႇၶူဝ်းၼွၼ်းၵေႃႈလူဝ်ႇဢေႃႈ။ တီႈၶဝ်ယိင်ႈၶႅၼ်း ဢမ်ႇမီးၽႂ်ၵႂႃႇၸွႆႈ ”- ၸုမ်းၸွႆႈထႅမ်ၵူၼ်းပၢႆႈၽေးသိုၵ်းလၢတ်ႈၼင်ႇၼႆ။


ဝၢၼ်ႈလွႆၸိင်းၼႆႉ ယၢၼ်ၵႆၵၼ်တင်းဝဵင်းပၢင်လွင်းမွၵ်ႈ 25 လၵ်း၊ တေႃႇၼႃႈၶႅၼ်ႈလွႆလုၵ်ႈၼိုင်ႈ တင်းဝၢၼ်ႈၼမ်ႉၼဵင်ႈ ဢၼ်ၺႃးသိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇၼႂ်းဝၢၼ်ႈသေ ၶႃႈႁႅမ်ၵူၼ်းဝၢၼ်ႈလႄႈမုၼ်ၸဝ်ႈတၢႆ။

ၵူၼ်းပၢႆႈၽေးသိုၵ်းတီႈဝၢၼ်ႈမွၵ်ႇၼႆႉသမ်ႉ ပၢႆႈမႃးၸဵမ်မိူဝ်ႈႁၢင်ႈလိူၼ်ၾႅပ်ႉပိဝ်ႊရီႊ သိုၵ်းမၢၼ်ႈလႄႈ PDF ပိုတ်းယိုဝ်းၵၼ်။

ၵူၼ်းဝၢၼ်ႈၸိူဝ်းထူပ်းၽေးသိုၵ်းတီႈဝဵင်းပၢင်လွင်းၼႆႉ မီးလၢႆလၢႆဝၢၼ်ႈ မိူၼ်ၼင်ႇ ဝၢၼ်ႈၽြႃးလွႆ ၊ ဝၢၼ်ႈၵေႃမႆႉသၢင်း(တောင်မဲသင်း) ၊ ဝၢၼ်ႈပၢင်ပုမ်ႇ၊ ဝၢၼ်ႈသွင်းပျွင်း ၊ ဝၢၼ်ႈလူင်ပႅၼ်ႈ(လုံးပျဉ်ရွာ) ၊ ဝၢၼ်ႈၼမ်ႉၼဵင်ႈ(နန့်နိန်ရွာ) ၊ ၸလူင်ႈဝၢၼ်ႈၸၢၼ်း ၸဵမ်ၸိူဝ်းၼႆႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း