ႁေႃႇငိုၼ်း ဢၼ် တူၵ်းႁၢႆ တီႈၼႃႈလၢၼ်ႉ “လွႆသွင်ထဝ်ႈ” ဝဵင်းလၢႆးၶႃႈၼၼ်ႉ ၸဝ်ႈၶွင်မၼ်း မႃးယိုၼ်ယၼ်တူဝ်သေ ႁပ်ႉဢဝ်ၵႂႃႇ ၶိုၼ်းလီငၢမ်းယဝ်ႉ။

မိူဝ်ႈဝႃး ဝၼ်းတီႈ 22/3/2023 ယၢမ်းၵၢင်ၼႂ်မွၵ်ႈ 9 မူင်း ၽူႈၸၢႆး ဢႃယု 30 ပၢႆ ၸဝ်ႈၶွင်ငိုၼ်းတင်း ပေႃႈလဵင်ႉမၼ်းၸၢႆး ၸဝ်ႈၶွင် ပမ်ႉၼမ်ႉမၼ်း ႁူမ်ႈၵၼ် မႃးႁပ်ႉဢဝ်ငိုၼ်းၵႂႃႇ ၾၢႆႇၼႃႈၽူႈယႂ်ႇၵူၼ်းလူင် တီႈႁိူၼ်းၽူႈၵွၼ်းပွၵ်ႉ 2 ဝဵင်းလၢႆးၶႃႈ ၸႄႈတွၼ်ႈလွႆ လႅမ် ၸိုင်ႈတႆး ပွတ်းၸၢၼ်း ၵႂႃႇလီငၢမ်းယဝ်ႉ။

လုင်းၸၢႆးၵျေႃႇလႃႉ ၸဝ်ႈၶွင်လၢၼ်ႉ “လွႆသွင်ထဝ်ႈ” လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆးတင်း ပေႃႈလဵင်ႉမၼ်း ႁူမ်ႈၵၼ် မႃးယိုၼ်ယၼ် တၵ်ႉမႅၼ်ႈၸွမ်းၼင်ႇႁဝ်းၶႃႈ ထၢမ်ဝႆႉၼၼ်ႉ ၵူႈၶေႃႈ။ ငိုၼ်းၼၼ်ႉ လႆႈယိုၼ်ႈပၼ် ၼႂ်းမိုဝ်းၸဝ်ႈမၼ်းၵႂႃႇတီႈ ၾၢႆႇၼႃႈ ၽူႈယႂ်ႇၵူၼ်းလူင် တီႈပွၵ်ႉၼႆႉ လီငၢမ်းၵႂႃႇယဝ်ႉ။ ႁဝ်းၶႃႈ တၵ်ႉဢေႃႈ ၼႂ်းထူင်ငိုၼ်းၼၼ်ႉ မီးငိုၼ်းၶႅပ်းဝႂ်သင်လၢႆလၢႆ၊ တူၵ်းႁၢႆၵႃႈႁိုဝ်၊ ဢဝ်ၼင် ယိုတ်ႈၶူၺ်ႇသီသင်မတ်ႉဝႆႉ။ ယဝ်ႉၵေႃႈ ငိုၼ်းၼၼ်ႉ သႂ်ႇထူင်သီသင်ဝႆႉ ၸိူဝ်းၼႆႉ။ မၼ်းတၵ်ႉမႅၼ်ႈၵူႈ ၶေႃႈ။ ယဝ်ႉၵေႃႈ ၵေႃႉပဵၼ် ပေႃႈလဵင်ႉမၼ်းၸၢႆး ၸၢႆးသီႇႁႃႉၵေႃႈ မႃးယိုၼ်ႈယၼ်ပၼ်ထႅင်ႈဝႃႈ ၶႃႈတိုၵ်ႉပၼ်ငိုၼ်းမၼ်း 10 သႅၼ်ပျႃးၼႆႉ ပႆႇႁိုင်”- ဝႃႈၼႆ။

ၵူၼ်းၵေႃႉဢဝ်ထူင်ငိုၼ်းတူၵ်းႁၢႆ တီႈၼႃႈလၢၼ်ႉသိုဝ်ႉၶၢႆ ၶိူင်ႈႁဵတ်းႁိူၼ်းလႄႈ ၶိူင်ႈၸၢၵ်ႈၵူႈၸိူဝ်းၸိူဝ်း (လၢၼ်ႉလွႆသွင်ထဝ်ႈ) ၼၼ်ႉ ပဵၼ်ၽူႈၸၢႆး ဢႃယု 30 ပၢႆ ပဵၼ်လုၵ်ႈလဵင်ႉၵူၼ်းႁေႃႈၵႃး တၢင်ႇၼမ်ႉမၼ်း လၢၼ်ႉႁူမ်ႈငဝ်းတႆး ဝဵင်းလၢႆးၶႃႈ ၼႆယဝ်ႉ။

“ႁဝ်းၶႃႈ လႆႈထၢမ်မၼ်းၸၢႆး ၸဝ်ႈၶွင်ငိုၼ်းၼၼ်ႉ ႁဵတ်းႁိုဝ်လႄႈ မႃးတူၵ်းႁၢႆ မၼ်းၸၢႆးၶႂ်ႈၼႄ မိူဝ်ႈဝၼ်းတီႈ 20 ယၢမ်းဝၢႆး ဝၼ်း 3 မူင်းပၢႆ မၼ်းၸၢႆးႁေႃႈၵႃး မႃးၵိုတ်းတီႈ ၼႃႈလၢၼ်ႉၼႆႉ ၵမ်းၼိုင်ႈ မိူဝ်ႈၽွင်းၼၼ်ႉ မၼ်းၸၢႆးၶိုၼ်ႈလူင်းသေ ထူင်ငိုၼ်း ဢၼ်ပႃးၵပ်းတူဝ် မၼ်းၸၢႆး တေတူၵ်းႁၢႆၵႂႃႇ။ မိူဝ်ႈၽွင်းၼၼ်ႉ မၼ်းၸၢႆးယင်းပႆႇႁူႉ ငိုၼ်းမၼ်းႁၢႆ မၼ်းၸၢႆးၵႂႃႇ တၢင်းမိူင်းၵိုင်ဝၢၼ်ႈလီၼၼ်ႉသေ ပွၵ်ႈမႃး ။ ၵေႃႉပဵၼ်ပေႃႈလဵင်ႉမၼ်းၸၢႆး ႁၼ်ပိူၼ်ႈတၢင်ႇၼိူဝ်ၾဵတ်ႉပုၵ်ႉသေ လၢတ်ႈၼႄ မၼ်းၸၢႆး ၸင်ႇတေႁူႉဝႃႈ ငိုၼ်းမၼ်းတူၵ်းႁၢႆတႄႉၼႆသေ ၸင်ႇႁူမ်ႈၵၼ်သေ မႃးဢဝ်ငိုၼ်း ၶိုၼ်း”- လုင်းၸၢႆးၵျေႃႇလႃႉ သိုပ်ႇလၢတ်ႈ ၼႄၼင်ႇၼႆ။

ငိုၼ်းဢၼ်လႆႈတူၵ်းႁၢႆၵႂႃႇ တီႈၼႃႈလၢၼ်ႉ လွႆသွင်ထဝ်ႈၼၼ်ႉ တင်းမူတ်း တေမီးဝႆႉၼႂ်းထူင် 940,000 ပျႃး။ ဢဝ်ၼင်ယိုတ်ႈသီလိူင်မတ်ႉဝႆႉ။ ႁေႃႇဝႆႉ ထူင်ယၢင်သီလမ် ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 21/3/2023 ယၢမ်းၵၢင်ၼႂ်မွၵ်ႈ 6 မူင်းၶိုင်ႈ ၸဝ်ႈၶွင်ႁၢၼ်ႉသိုဝ်ႉၶၢႆ ၶိူင်ႈႁဵတ်းႁိူၼ်းလႄႈ ၶိူင်ႈ ၸၢၵ်ႈၵူႈ ၸိူဝ်းၸိူဝ်း တီႈလၢၼ်ႉ(လွႆသွင်ထဝ်ႈ) ပွၵ်ႉ 2 ဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းသေ ပိုၼ် ၽၢဝ်ႇ ႁႂ်ႈၸဝ်ႈ ၶွင် မႃးႁပ်ႉဢဝ်ၶိုၼ်း ၼႆယဝ်ႉ။