ပၢင်တိုၵ်း ၼႂ်းၸႄႈဝဵင်းပၢင်လွင်း တိုၵ်ႉသိုပ်ႇပဵၼ် သိုၵ်းမၢၼ်ႈဢဝ်ၶိူင်ႈမိၼ်သိုၵ်းၶဝ်ႈယိုဝ်း

သိုၵ်းမၢၼ်ႈ လႄႈ PDF သိုပ်ႇယိုဝ်းၵၼ်ၶိူဝ်းယႂ်း ထိုင်ဝၼ်းတီႈ 20 လိူၼ်မၢတ်ႉၶျ်ၼႆႉၵေႃႈ တင်းသွင်ၾၢႆႇတိုၵ်ႉၶဵင်ႈၶႅင်ဝႆႉ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈၼႆယဝ်ႉ ။

ၽူႈမီးပုၼ်ႈၽွၼ်းၼႂ်းၸုမ်း PNDF KK ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ တိုၵ်ႉသိုပ်ႇပဵၼ်ပၢင်တိုၵ်းၵၼ်ယူႇ ၾၢႆႇသိုၵ်းမၢၼ်ႈ ဢဝ်ႁိူဝ်းမိၼ်တိုၵ်းၸွမ်းၵေႃႈမီး။မိူဝ်းဝၼ်းတီႈ 20 ၼၼ်ႉၵေႃႈ သိုၵ်းမၢၼ်ႈၶဝ်ဢဝ် ႁိူဝ်းမိၼ်တိုၵ်းမႃး ယိုဝ်းသွင်ၵမ်းၼႆႉဢေႃႈ လႆႈႁူႉဝႃႈ ၾၢႆႇသိုၵ်းမၢၼ်ႈ တၢႆမွၵ်ႈ 8 ၵေႃႉၼႆႉ ။ဢၼ်ယဵၼ်ယူႇၵႅပ်ႉၼိုင်ႈၼႆႉၵေႃႈ လၢမ်းတူၺ်းတႄႉ သိုၵ်းမၢၼ်ႈၶဝ် တိုၵ်ႉထႅမ်ႁႅင်းသိုၵ်းထႅင်ႈၵႂႃႈ ”- ဝႃႈၼႆ။

ၸူဝ်ႈၶၢဝ်းၼႆႉ ပၢင်တိုၵ်းတၢင်းလႅၼ်လိၼ်တႆး-ယၢင်းလႅင် မိူင်းပၢႆးတင်းဝဵင်းၾၢႆၶုၼ် ယဵၼ်ဝႆႉသေတႃႉ ၾၢႆႇတၢင်းၸႄႈဝဵင်းပၢင်လွင်း တိုၵ်ႉသိုပ်ႇၶဵင်ႈၶႅင်ၵၢၼ်သိုၵ်းၵၼ်ဝႆႉ။

ၸုမ်း PDF ၾၢႆၶုၼ် လၢတ်ႈဝႃႈ-“ ဢၼ်သိုၵ်းမၢၼ်ႈ ယဵၼ်ဝႆႉၼႆႉၵေႃႈ ၵွပ်ႈဝႃႈ ၾၢႆႇသိုၵ်းမၢၼ်ႈ တၢႆၼမ်ၼႃႇလႄႈ ၶဝ်တိုၵ်ႉထႅမ်ႁႅင်းသိုၵ်းၶဝ်ထႅင်ႈၼၼ်ႉၵႂႃႈ၊ ၼႂ်းလိူၼ် မၢတ်ႉၶျ် ၼႆႉၵူၺ်း ၾၢႆႇသိုၵ်းမၢၼ်ႈ တၢႆပဵၼ်မွၵ်ႈ 80 ၼႆႉၼေႈ ” -ဝႃႈၼႆ။

တႄႇဢဝ်ဝၼ်းတီႈ 11 လိူၼ်မၢတ်ႉၶျ်ၼႆႉမႃး ပၢင်တိုၵ်း သိုၵ်းမၢၼ်ႈလႄႈ PDF ပဵၼ်မႃးၶိူဝ်းယႂ်းႁၢဝ်ႈႁႅင်း၊  ၵူၼ်းမိူင်း ၼႂ်းၸႄႈဝဵင်းပၢင်လွင်း လႆႈပၢႆႈၽေးသိုၵ်းသိူဝ် ႁူဝ်ၵူၼ်းဢမ်ႇယွမ်း  6000  ။ ၼႂ်းဝၼ်းတီႈ 11 ၼၼ်ႉၵူၺ်း သိုၵ်းမၢၼ်ႈယိုတ်းမိူင်း ၶႃႈတၢႆၵူၼ်းမိူင်းလႄႈ သင်ၶၸဝ်ႈ ႁိမ်း 30 ၵေႃႉ တီႈဝၢၼ်ႈၼမ်ႉၼဵင်ႈ ၸႄႈဝဵင်းပၢင်လွင်း။

ၵူၼ်းဝၢၼ်ႈၸိူဝ်းထူပ်းၽေးသိုၵ်းတီႈဝဵင်းပၢင်လွင်းၼႆႉ မီးလၢႆလၢႆဝၢၼ်ႈ မိူၼ်ၼင်ႇ ဝၢၼ်ႈၽြႃးလွႆ ၊ ဝၢၼ်ႈၵေႃမႆႉသၢင်း(တောင်မဲသင်း) ၊ ဝၢၼ်ႈပၢင်ပုမ်ႇ၊ ဝၢၼ်ႈသွင်းပျွင်း ၊ ဝၢၼ်ႈလူင်ပႅၼ်ႈ(လုံးပျဉ်ရွာ) ၊ ဝၢၼ်ႈၼမ်ႉၼဵင်ႈ(နန့်နိန်ရွာ) ၊ ၸလူင်ႈဝၢၼ်ႈၸၢၼ်း ၸဵမ်ၸိူဝ်းၼႆႉ။