မိူဝ်ႈၼႆႉ ဝၼ်းတီႈ 21/3/2023 ယၢမ်းၵၢင်ၼႂ်မွၵ်ႈ 6 မူင်းၶိုင်ႈ ၸဝ်ႈၶွင်ႁၢၼ်ႉသိုဝ်ႉၶၢႆ ၶိူင်ႈႁဵတ်းႁိူၼ်းလႄႈ ၶိူင်ႈၸၢၵ်ႈ ၵူႈၸိူဝ်းၸိူဝ်း တီႈလၢၼ်ႉ(လွႆသွင်ထဝ်ႈ) ပွၵ်ႉ 2 ဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ပိုၼ်ၽၢဝ်ႇ ႁႂ်ႈၸဝ်ႈၶွင် မႃးႁပ်ႉဢဝ်ၶိုၼ်း ဝႃႈၼႆ။

လုင်းၸၢႆးၵျေႃႇလႃႉ ၸဝ်ႈၶွင်လၢၼ်ႉလွႆသွင်ထဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “လုၵ်ႈၶူၺ်ၶႃႈတင်း ၵူၼ်းႁဵတ်းၵၢၼ်ၶဝ်ၵႂႃႇပိုတ်ႇ လၢၼ်ႉသေ ထူပ်းႁၼ်ႁေႃႇငိုၼ်းၼၼ်ႉ တူၵ်းဝႆႉတီႈၼႃႈလၢၼ်ႉႁဝ်းၶႃႈ။ လုၵ်ႈၶူၺ်ၶႃႈၵေႃႈ ဢမ်ႇႁူႉ ၵူဝ်မၼ်းပဵၼ် သေၸိူဝ်ႉသေလွင်ႈလႄႈ ဢဝ်ၵၼ်းယူးၼႆႉ ၶေႇတူၺ်း။ ႁေႃႇၼၼ်ႉ ဢမ်ႇတႅၵ်ႇဢမ်ႇသင်လႄႈ ၸင်ႇမႃးလိတ်ႈတူၺ်း ၼႂ်းပူၵ်ႉႁေႃႇၼၼ်ႉ ထူပ်းႁၼ် ပဵၼ်ငိုၼ်းၼၼ်ႉၶႃႈယဝ်ႉ”- ဝႃႈၼႆ။

ဢိင်ၼိူဝ် လွင်ႈၼႆႉသေ ယူႇတီႈ ၵေႃႉပဵၼ်ၸဝ်ႈၶွင်လၢၼ်ႉ လွႆသွင်ထဝ်ႈ လုင်းၸၢႆးၵျေႃႇလႃႉ လႆႈၵႂႃႇတိူင်ႇလၢတ်ႈဝႆႉ တီႈၽူႈ ၵွၼ်းပွၵ်ႉယဝ်ႉလီငၢမ်း။ သင်ဝႃႈ တူဝ်ၸဝ်ႈၶွင်ငိုၼ်း မႃးႁပ်ႉၶိုၼ်းၼႆၸိုင် တေလႆႈတွပ်ႇၵႂၢမ်းထၢမ် ၵဵဝ်ႇၵပ်းလွင်ႈႁေႃႇငိုၼ်းၼၼ်ႉ ။ သင်ဝႃႈတွပ်ႇမႅၼ်ႈ တေပၼ်ၶိုၼ်းတေႃႇၼႃႇၵူၼ်းလူင်ဝၢၼ်ႈဢိူင်ႇ ဝႃႈၼႆ။

“ပေႃးပဵၼ်ၸဝ်ႈၶွင်မၼ်းတႄႉၸိုင် မၼ်းတေတွင်းငၢႆႈ တၵ်ႉတူၺ်းၵေႃႈ တေႁူႉလႆႈၵမ်းလဵဝ်ယဝ်ႉ။ ၼႂ်းပူၵ်ႉငိုၼ်းၼၼ်ႉ မၼ်း တေဢဝ်သင်ႁေႃႇဝႆႉ။ ငိုၼ်းၼႆႉ တေမီးၵႃႈႁိုဝ်၊ တေပႃးၶႅပ်းဝႂ်သင်၊ တေပႃးလၢႆၼႅပ်ႇ။ ယဝ်ႉၵေႃႈ ၼႂ်းၼၼ်ႉ တေမီး သင်ပႃးဝႆႉ ထႅင်ႈ ၸိူဝ်းၼႆႉ။ တေလႆႈမႃးတၵ်ႉတီႈ ၾၢႆႇၼႃႈၽူႈယႂ်ႇၵူၼ်းလူင် ၽူႈၵွၼ်းပွၵ်ႉ။ သင်ဝႃႈ ပဵၼ်ၸဝ်ႈၶွင်ႈတႄႉ တၵ်ႉမႅၼ်ႈယဝ်ႉၼႆ တေဢၢပ်ႈပၼ်ၶိုၼ်းၼႂ်းမိုဝ်းၵႂႃႇ တီႈၾၢႆႇၼႃႈၵူၼ်းလူင်”- လုင်းၸၢႆးၵျေႃႇလႃႉ သိုပ်ႇလၢတ်ႈ ၼႄၼင်ႇၼႆ။

ငိုၼ်းဢၼ်တူၵ်းႁၢႆ တီႈၼႃႈလၢၼ်ႉလွႆသွင်ထဝ်ႈ ပွၵ်ႉ 2 ၼႆႉ လႅပ်ႈတေတူၵ်းဝႆႉ မိူဝ်ႈၶမ်ႈဝႃး ၵၢင်ၶမ်ႈ ဝၼ်းတီႈ 20 ။ မၼ်းပဵၼ်သဵၼ်ႈတၢင်း ၵူၼ်းလတ်းၽၢၼ်ႇၵႂႃႇမႃး တီႈပွႆးသၢင်ႇလွင်း ဝတ်ႉႁူၺ်ႈယဵၼ် လုင်းၸၢႆးၵျေႃႇလႃႉလၢတ်ႈ။

ၵေႃႉပဵၼ် လုၵ်ႈယိင်း ၸဝ်ႈၶွင်လၢၼ်ႉ လွႆသွင်ထဝ်ႈၵေႃႈ တႅမ်ႈတၢင်ႇဝႆႉ တီႈၾဵတ်ႉပုၵ်ႉမၼ်းၼၢင်းဝႃႈ ၵေႃႉဢၼ် ဢဝ်တူၵ်းႁၢႆဝႆႉၼၼ်ႉ တၢမ်တူဝ်ႁႂ်ႈမႃးဢဝ်ၶိုၼ်းသေၵမ်း။ ၵူၺ်းၵႃႈ တေလႆႈတွပ်ႇ ၼႄဝႃႈ မိူၼ်ၼင်ႇ ငိုၼ်းဢၼ်တူၵ်းႁၢႆဝႆႉၼၼ်ႉ မီးၵႃႈႁိုဝ်၊ ဢဝ်သင်​​ႁေႃႇဝႆႉ၊ ပဵၼ်ၶႅပ်းသင်လၢႆလၢႆ ၶႅပ်းမိုၼ်ႇမီးလၢႆၼႅပ်ႇ၊ ၶႅပ်းႁႃႈ ႁဵင်မီးလၢႆၼႅပ်ႇ၊ ၶႅပ်းႁဵင်မီးလၢႆၶႅပ်း၊ ၸွင်ႇဢဝ်ၼင်ယိုတ်ႇၶူၺ်ႇမတ်ႉဝႆႉ ဢၼ်ဢမ်ႇဢဝ်ၼင်ယိုတ်ႇၶူၺ်ႇမတ်ႉဝႆႉၸွင်ႇပႃး။ ၼွၵ်ႈ လိူဝ်​​သေငိုၼ်းၼၼ်ႉပႃးသင်လၢႆလၢႆ ၸိူဝ်းၼႆႉ။