ရူတ်ႉၶိူင်ႈလမ်းၼိုင်ႈတီႈဝဵင်းၵူတ်ႇၶၢႆ ၽႃႇၺႃးၵႃးၵိုတ်းဝႆႉၶၢင်ႈတၢင်း မၢတ်ႇၸဵပ်းႁၢဝ်ႈႁႅင်း ၵေႃႉၼိုင်ႈလႄႈ လူႉတၢႆ 2 ၵေႃႉ။

မိူဝ်ႈဝၼ်းတီႈ 18/3/2023 ယၢမ်းၶမ်ႈ 7 မူင်းၼၼ်ႉ ရူတ်ႉၶိူင်ႈလမ်းၼိုင်ႈ ၽႃႇၺႃးၵႃးဢၼ်ၵိုတ်းဝႆႉၶၢင်ႈတၢင်း ႁိမ်းၵဵတ်ႉ/လၢၼ်ႇ ဢေႊသျႃႊဝေႃႊ ၼႂ်းၵႄႈလုမ်းႁွင်ႈၵၢၼ်လူလွမ်ပႃႇမႆႉလႄႈလုမ်းႁွင်ႈၵၢၼ်ၵပ်းသိုပ်ႇ ၸႄႉဝဵင်းၵူတ်ႇၶၢႆ ၸိုင်ႈတႆးပွတ်းႁွင်ႇ လူႉတၢႆ 2 ၵေႃႉ မၢတ်ႇၸဵပ်းႁၢဝ်ႈႁႅင်း 1 ၵေႃႉ။

ၵူၼ်းၸွႆႈတူင်ႇဝူင်းၵူၼ်းဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ- “ၸႂ်ႈဢေႃႈ ၶဝ်သၢမ်ၵေႃႉ သွၼ်ႉရူတ်ႉၶိူင်ႈၵၼ်ႁေ ၶီႈမႃးပေႃးတဵမ်တၢင်းလႄႈ ၸင်ႇၵႂႃႇၽႃႇၺႃးၵႃးလမ်းၼိုင်ႈဢၼ်ၵိုတ်းဝႆႉႁိမ်း လုမ်းသႅတ်ႉတွႆႇယေးၼၼ်ႉ။ ၵႃးတႄႉ ၵွႆလႄႈ ၵိုတ်းဝႆႉ တီႈၼၼ်ႈၸဵမ်မိူဝ်ႈၵၢင်ၼႂ်ၸဝ်ႉပုၼ်ႉၼႆဢေႃႈ။ၶဝ်ၵႂႃႇ ၽႃႇသႂ်ႇမၢၵ်ႇႁိၼ်ဢၼ်မီးၼိူဝ် တၢင်းၼၼ်ႉဢွၼ်တၢင်း ယဝ်ႉၸင်ႇၵႂႃႇၽတ်ႉသႂ်ႇၵႃးၼၼ်ႉဢေႃႈ။ၵေႃႉၼိုင်ႈသမ်ႉ ႁူဝ်တႅၵ်ႇႁေ တၢႆထင်တီႈ၊ ထႅင်ႈၵေႃႉၼိုင်ႈတႄႉ ၵႂႃႇတၢႆတီႈႁူင်းယႃ။ၵေႃႉဢၼ် ၵိုတ်းဝႆႉၵေႃႈ လိူဝ်ၸႂ်ဝႆႉ။ ၸိုဝ်ႈၶဝ်တႄႉ ပလိၵ်ႈၶဝ်ၵူၺ်းဢေႃႈ မၢႆၵႂႃႇ ႁဝ်းတႄႉၵႂႃႇၸွႆႈသူင်ႇႁူင်းယႃၵွႆး ”- ဝႃႈၼႆ။

 2 ၵေႃႉဢၼ်လူႉတၢႆၵႂႃႇၼႆႉ ဢႃယု 18 ပီ ၵေႃႉၼိုင်ႈလႄႈ ဢႃယု 16 ပီၵေႃႉၼိုင်ႈ ပဵၼ်ၵူၼ်းဝၢၼ်ႈ ဢၼ်ယူႇၸွမ်းၶွပ်ႇဝဵင်းၵူတ်ႉၶၢႆ။ထႅင်ႈၵေႃႉၼိုင်ႈၵေႃႈ မၢတ်ႇၸဵပ်းႁၢဝ်ႈႁႅင်းသေ ယူတ်းယႃတူဝ်ဝႆႉ တီႈႁူင်းယႃလူင်ၵူတ်ႉၶၢႆ။

ၵူၼ်းၸွႆႈတူင်ႇဝူင်းၵူၼ်းဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ-“ၵူၼ်းၶီႇရူတ်ႉၶိူင်ႈၶဝ်ၵေႃႈ ၵမ်ႈၼမ် ႁူႉၵၼ်ၵျႃႉ ပၵ်းပိူင်ရူတ်ႉၶိူင်ႈၼႆႉ ၵူၺ်းၼႃႇဢမ်ႇၸွမ်း ။ ပေႃးဢမ်ႇၸွမ်းၵေႃႈ ထိုင်လူႉသၢႆၸႂ်မိူၼ်ၼႆၼႆႉၼႃႇ” – ဝႃႈၼႆ။

မိူဝ်ႈဝၼ်းတီႈ 7/3/2023 ၼၼ်ႉၵေႃႈ ၵူၼ်းပၢႆႈၽေးသိုၵ်းၵေႃႉၼိုင်ႈတီႈဝဵင်းၵျွၵ်ႉမႄး ၺႃးရူတ်ႉၶိူင်ႈၽႃႇမၢတ်ႇၸဵပ်း ႁၢဝ်ႈႁႅင်း ။မိူဝ်ႈဝၼ်းတီႈ 8/3/2023 ၼၼ်ႉၵေႃႈ ၵႃးတင်းရူတ်ႉၶိူင်ႈၽႃႇၵၼ် ႁိမ်းဝၢၼ်ႈလိၼ်လမ် ဢိူင်ႇမိူင်းၽူင်း(ၶ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ မၢတ်ႇၸဵပ်းႁၢဝ်ႈႁႅင်း 1 ၵေႃႉ။