သိုၵ်းမၢၼ်ႈလၢမ်းယိုဝ်းၵွင်ႈလူင် ၵႂႃႇၵူႈႁူးၵူႈတၢင်းလႄႈ တိူဝ်ႉၵူၼ်းမိူင်းၵူတ်ႉၶၢႆလူႉတၢႆ ၵေႃႉၼိုင်ႈ မၢတ်ႇၸဵပ်း 2 ၵေႃႉ။
မိူဝ်ႈဝၼ်းတီႈ 21/12/2023 ယၢမ်း ၵၢင်ဝၼ်း 1 မူင်းၼၼ်ႉ သိုၵ်းမၢၼ်ႈလၢမ်းလိမ်းယိုဝ်းၵွင်ႈလူင်ၵႂႃႇလၢႆပႃႈလၢႆၾၢႆႇလႄႈ မၢၵ်ႇလူင်တူၵ်းသႂ်ႇ တီႈဝၢၼ်ႈလွႆပႅၵ်ႇ ၸႄႈဝဵင်းၵူတ်ႉၶၢႆ ၵူၼ်းၸၢႆးၵေႃႉၼိုင်ႈ လူႉတၢႆထင်တီႈ လိူဝ်ၼၼ်ႉ မႄႈလုၵ်ႈဢွၼ်ႇလဵၵ်ႉ 2 ၵေႃႉ မၢတ်ႇၸဵပ်းၸွမ်း။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈယဝ်ႉ မၢၵ်ႇတူၵ်းသႂ်ႇ ၵူၼ်းၸၢႆး တၢႆၵေႃႉၼိုင်ႈ။ ဢၼ်ပဵၼ်လုၵ်ႈဢွၼ်ႇလဵၵ်ႉလႄႈ ၼၢင်းယိင်းၵေႃႉၼိုင်ႈတႄႉ မၢတ်ႇၸဵပ်း တီႈႁူဝ်ၶဝ်ႇ ။ ယူတ်းယႃတူဝ်ဝႆႉယူႇ မိူဝ်ႈလဵဝ်။ ဝၢၼ်ႉၾၢႆႇပုၼ်ႉၵေႃႈ မႄႈလုၵ်ႈဢွၼ်ႇလဵၵ်ႉ ၵေႃႉၼိုင်ႈ ယဵပ်ႇၺႃးမၢၵ်ႇမႅင်းလႄႈ ၶႃမၼ်းပုတ်းၵႂႃႇ” – ဝႃႈၼႆ။
ၵူၼ်းၵေႃႉၺႃးမၢၵ်ႇလူင်တူၵ်းသႂ်ႇသေ လူႉတၢႆၵႂႃႇၼႆႉ ၸိုဝ်ႈ ဢၢႆႈလူႇ ဢႃယု 25 ပီ ၊ မေးၼၢင်းမၼ်းမၢတ်ႇၸဵပ်း ၸိုဝ်ႈလူၺ်းဢူဝ်ႇသူၺ်ႇ တိုၵ်ႉမီးလုၵ်ႈဢွၼ်ႇလဵၵ်ႉဝႆႉ။ၼၢင်းယိင်းမႄႈလုၵ်ႈဢွၼ်ႇထႅင်ႈၵေႃႉၼိုင်ႈ ဢၼ်မၢတ်ႇၸဵပ်းၼၼ်ႉ ယူႇမၢၼ်ႈထမ်ႈ လႆႈႁူႉၼင်ႇၼႆ။
မိူဝ်ႈဝၼ်းတီႈ 22/12/2023 ၼၼ်ႉၵေႃႈ ၸၢႆးယီႈ ဢႃယု 30 ဢၼ်ယူႇတီႈ မၢၼ်ႈထမ်ႈ ၸႄႈဝဵင်းၵူတ်ႉၶၢႆၼၼ်ႉ ယဵပ်ႇၺႃးမၢၵ်ႇသေ ၶႃပုတ်းမၢတ်ႇၸဵပ်းႁႅင်း။
တႄႇဢဝ်ၵၢင်လိူၼ် တီႊသႅမ်ႊပိူဝ်ႊၼႆႉမႃး သိုၵ်းမၢၼ်ႈတင်းၸုမ်းဢူၺ်းလီပွတ်းႁွင်ႇ တိုၵ်းတေႃးၵၼ်တီႈၵူတ်ႉၶၢႆ တင်းသွင်ၾၢႆႇမီးလွင်ႈမၢတ်ႇၸဵပ်းလူႉတၢႆ။ၵူၼ်းမိူင်းၸိူဝ်းယူႇၸမ်ပၢင်တိုၵ်း ၵူၼ်းၼႂ်းဝဵင်း 5 ပွၵ်ႉ လႄႈ ဝၢၼ်ႈႁိမ်းႁွမ်း ၸိူဝ်းၼၼ်ႉ လႆႈၶၢႆႉပၢႆႈဢွၵ်ႇ ဢမ်ႇယွမ်း 10 ဝၢၼ်ႈ ၵူၼ်းပိုၼ်ႉတီႈလၢတ်ႈၼင်ႇၼႆ။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ထိုင်မိူဝ်ႈလဵဝ်ၵေႃႈ သိုၵ်းၶဝ် တိုၵ်ႉၶဵင်ႈၶႅင် ၵၢၼ်သိုၵ်း တေႃႇၵၼ်။လႅပ်ႈတေတိုၵ်းၵၼ်ထႅင်ႈ။ၵူၼ်းမိူင်းတႄႉ ႁိုဝ်ႁတ်းယူႇယဝ်ႉ။ၵူၼ်းဝၢၼ်ႈဢၼ်ယူႇတၢင်းဢွၵ်ႇၵူတ်ႉၶၢႆၼႆႉ ဢွၼ်ၵၼ်ပၢႆႈ ဢမ်ႇယွမ်း 10 ဝၢၼ်ႈ။ၼႂ်းဝဵင်းၵေႃႈ ပၢႆႈ ဢမ်ႇယွမ်း 5 ပွၵ်ႉ။ၼႆႉၵေႃႈ လႆႈႁူႉဝႃႈ သိုၵ်းၶဝ်ၸႂ်ႉပၢႆႈဝႆႉ ” – ဝႃႈၼႆ။
ၽႅၼ်တိုၵ်း 1027 ၶၢဝ်းတၢင်း 2 လိူၼ်ၸမ်ၼႆႉ ၵူၼ်းမိူင်းၵူတ်ႉၶၢႆ မၢတ်ႇၸဵပ်းလူႉတၢႆၼမ် ။ယွၼ်ႉမၢၵ်ႇလူင်သိုၵ်းမၢၼ်ႈသေ ၵူၼ်းမိူင်းလူႉတၢႆ 16 ၵေႃႉ ၼႂ်းၼၼ်ႉ ၼၢင်းယိင်း 6 ၵေႃႉလႄႈ လုၵ်ႈဢွၼ်ႇ 5 ၵေႃႉ။လိူဝ်ၼၼ်ႉ မၢတ်ႇၸဵပ်း ဢမ်ႇယွမ်း 30 ၵေႃႉ ၵူၼ်းပိုၼ်ႉတီႈလၢတ်ႈၼင်ႇၼႆ။
