ဝၼ်းတီႈ 16 လႄႈ 17 လိူၼ်မၢတ်ႉၶျ် ပႃႇတီႇႁူဝ်သိူဝ် ႁဵတ်းပၢင်ၵုမ်ၵၼ် သေ တူၵ်းလူင်းလႆႈၸႂ်ၵၼ် တႃႇတေဢမ်ႇတၢင်ႇမၢႆၾၢင်ပႃႇတီႇ ဝႃႈၼႆ။
ၸၢႆးလဵၵ်ႉ ၽူႈၼမ်းၼႂ်းလႄႈၽူႈၶၢၼ်ပၢၵ်ႇ ငဝ်ႈငုၼ်းတီႇမူဝ်ႇၶရေႇသီႇၸိူဝ်ႉၶိူဝ်းတႆး SNLD ႁိုဝ် ပႃႇတီႇႁူဝ်သိူဝ်လၢတ်ႈတီႈၽူႈတွႆႇႁွၵ်ႈဝႃႈ-“ၶွမ်ႇမတီႇပွင်ၵၢၼ်ငဝ်ႈငုၼ်းႁဝ်းၶႃႈၼင်ႈပၢင်ၵုမ်ၵၼ် 2 ဝၼ်းသေ တႅပ်းတတ်းဝႃႈ ပႆႇထုၵ်ႇလီတၢင်ႇမၢႆၾၢင်ပႃႇတီႇ – ၼႆႁူမ်ႈၵၼ်တႅပ်းတတ်းၸိူင်ႉၼႆၶႃႈဢေႃႈ။ လွင်ႈတေဢမ်ႇၶဝ်ႈလိူၵ်ႈတင်ႈယဝ်ႉႁႃႉၼႆၼၼ်ႉတႄႉ ယွၼ်ႉဝႃႈပၢင်လိူၵ်ႈတင်ႈတေမီးဢမ်ႇမီးဢမ်ႇႁူႉလႄႈ ႁဝ်းၶႃႈဢမ်ႇၸၢင်ႈၼပ်ႉသွၼ်ႇပႃးၸွမ်း။ ဢၼ်ႁဝ်းလႆႈတႅပ်းတတ်းဝႃႈဢမ်ႇတၢင်ႇမၢႆၾၢင်ၼႆႉတႄႉယွၼ်ႉပိူဝ်ႈ လုၵ်ႈၸုမ်းပႃႇတီႇႁဝ်းမီးၵူႈတီႈၵူႈမိူင်း။ ၼႂ်းၶၢဝ်းတၢင်း 2 လိူၼ်ၼႆႉ တႃႇတေလူင်းပိုၼ်ႉတီႈ ႁူပ်ႉထူပ်းလုၵ်ႈၸုမ်းသေ ယွၼ်းၶေႃႈသဵင်ၵၢင်ၸႂ်ၼႆႉ ၶၢဝ်းယၢမ်းဢေႇၼႃႇဢႃးလႃး ။ ၵွပ်ႈၼႆလႄႈၸင်ႇလႆႈတႅပ်းတတ်းဝႃႈ ပႆႇတၢင်ႇမၢႆၾၢင်ပႃႇတီႇၼႆၵူၺ်း။ ၾၢႆႇၼိုင်ႈတၢမ်တူဝ်ၸုမ်းသိုၵ်းလႄႈၶွမ်ႇမသျိၼ်ႇပၢင်လိူၵ်ႈတင်ႈၼႆႉ ယင်းပႆႇပိုၼ်ၽၢဝ်ႇဝႃႈတေ ၶဝ်တေႁဵတ်းပၢင်လိူၵ်ႈတင်ႈမိူဝ်ႈလႂ်။ တေႃႈၶဝ်ယင်းပႆႇပိုၼ်ၽၢဝ်ႇ ၼၼ်ႉ – ယူႇတီႈႁဝ်းၶႃႈ ဢမ်ႇတၢင်ႇမၢႆၾၢင်ပႃႇတီႇၼႆႉ မၼ်းဢမ်ႇၵဵဝ်ႇတၢင်းပၢင်လိူၵ်ႈတင်ႈၶႃႈ” -ဝႃႈၼႆ။
ယူႇတီႈပႃႇတီႇသေ ဢမ်ႇမီးမၢႆၾၢင်လႄႈဢမ်ႇႁဵတ်းလႆႈတႃႇၸွႆႈၵူၼ်းမိူင်း -ၼႆၼၼ်ႉဢမ်ႇၸႂ်ႈ ။ မီး/ဢမ်ႇမီး မၢႆၾၢင်ၵေႃႈတိုၼ်းၸၢင်ႈယူႇၾၢႆႇၵူၼ်းမိူင်း သေႁဵတ်းလွင်ႈတဵင်ႈထမ်းမႃးတႃႇသေႇ – ၽူႈၶၢၼ်ပၢၵ်ႇပႃႇတီႇလၢတ်ႈၼင်ႇၼႆ။
မိူဝ်ႈႁၢင်လိူၼ်ၾႅပ်ႊပိဝ်ႊရီႊၼၼ်ႉ သိုၵ်းမၢၼ်ႈပိုၼ်ၽၢဝ်ႇႁႂ်ႈပႃႇတီႇၵၢၼ်မိူင်းတၢင်ႇမၢႆၾၢင်ၼႂ်းၶၢဝ်းတၢင်း 60 ဝၼ်းၼႆဝႆႉ။ တေႃႇထိုင်ယၢမ်းလဵဝ် ပႃႇတီႇၵၢၼ်မိူင်းဢၼ်တၢင်ႇမၢႆၾၢင် ႁၢင်ႈႁႅၼ်းတႃႇၶဝ်ႈပၢင်လိူၵ်ႈတင်ႈ မီးဝႆႉ 19 ပႃႇတီႇယဝ်ႉၼႆ ၾၢႆႇသိုၵ်းမၢၼ်ႈပိုၼ်ၽၢဝ်ႇၼႂ်း ထီႇဝီႇ ၶဝ်ဝႆႉၼင်ႇၼႆ။
ၼႂ်းၼၼ်ႉ ဢၼ်တေၶဝ်ႈလိူၵ်ႈတင်ႈၼႂ်းၸၼ်ႉမိူင်းႁူမ်ႈတုမ် 5 ပႃႇတီႇၼႆႉပဵၼ် ပႃႇတီႇ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ႁိုဝ် ပႃႇတီႇသၢင်ႇသီႈ USDP၊ ပႃႇတီႇ ပြည်ထောင်စု ဒီမိုကရေစီ ဢၼ်လုၵ့်တီႈ ပႃႇတီႇ မွၵ်ႇၼိၼ်းသီႇ လႅၵ်ႈၸိုဝ်ႈမႃး ၊ ပႃႇတီႇ တီႇမူဝ်ႇၶရႅတ်ႉတိတ်ႉၸၢဝ်းၶိူဝ်းလႄႈတႆး (ရှမ်းနှင့်တိုင်းရင်းသားများ ဒီမိုကရက်တစ်ပါတီ) ဢမ်ႇၼၼ် ပႃႇတီႇ သိူဝ်ၽိူၵ်ႇလႂ် ၊ ပႃႇတီႇ ၽွမ်ႉႁူမ်ႈၸၢဝ်းၶိူဝ်း – တၸၺ တိုင်းရင်းသား စည်းလုံးညီညွတ်ရေး လႄႈ ပႃႇတီႇ လုၵ်ႈႁဵၼ်းဢၼ်ႁဵတ်းၽွၼ်းလီၵူၼ်းမိူင်း ပြည်သူ့အကျိုးပြု ကျောင်းသားများပါတီ၊ ၸဵမ်ၸိူဝ်းၼႆ့ ။
ပႃႇတီႇ ဢၼ်တၢင်ႇသဵၼ်ႈၸိုဝ်ႈဝႆႉတႃႇ တေၶဝ်ႈပၢင်လိူၵ်ႈတင်ႈ ၸၼ်ႉၸႄႈမိူင်းသမ်ႉပဵၼ် -ပႃႇတီႇ တီႇမူဝ်ႇၵရႅတ်ႉတိတ်ႉ ၽလူင်ႇ- သဝေႃႇ၊ ပႃႇတီႇ ၸိူဝ်ႉၸၢတ်ႈပဢူဝ်း PNO ၊ ပႃႇတီႇတီႇမူဝ်ႇၵရႅတ်ႉတိတ်ႉ ၵူၼ်းမိူင်းမၢၼ်ႈ(MPD)၊ ပႃႇတီႇ တီႇမူဝ်ႇၶရႅတ်ႉတိတ်ႉ ၾႅတ်ႇတရႄႇ ၊ ပႃႇတီႇဢွၼ်ႁူဝ် ရၶႅင်ႇ၊ ပႃႇတီႇ ၵူၼ်းမိူင်း ၸႄႈမိူင်းၶၢင် (KSPP)၊ ပႃႇတီႇဝၼ်ႇသႃႇၼု၊ ပႃႇတီႇ တီႇမူဝ်ႇၶရႅတ်ႉတိတ်ႉ၊ ပႃႇတီႇ လေႇပႃႇပႃႇတီႇဢဵၼ်ႁႅင်းတီႇမူဝ်ႇၶရႅတ်ႉတိတ်ႉ၊ ပႃႇတီႇမႂ်ႇတီႇမူဝ်ႇၶရေႇသီႇၶၢင် (NDP Kachin)၊ ပႃႇတီႇမႂ်ႇတီႇမူဝ်ႇၶရေႇသီႇၸိူဝ်ႉၸၢတ်ႈ (New National Democracy Party)၊ ပႃႇတီႇႁုၼ်ႈမုၼ်းၸိူဝ့်ၸၢတ်ႈ လီသူႇလႄႈ ပႃႇတီႇႁုၼ်ႈမုၼ်း ၸိူဝ့်ၸၢတ်ႈတႆးလႅင် ၸိူဝ်းၼႆႉတႄႉ တေၶဝ်ႈၶႅင်ႇၸၼ်ႉၸႄႈမိူင်း လႆႈႁူႉၼင်ႇၼႆ။
ၵူၺ်းၵႃႈ ယူႇတီႈသိုၵ်းမၢၼ်ႈသေ တေႁဵတ်းပၢင်လိူၵ်ႈတင်ႈမိူဝ်ႈလႂ်ၼႆၼၼ်ႉတႄႉ ဢမ်ႇလႆႈပိုၼ်ၽၢဝ်ႇဝႆႉပႃး။
