ၵူၼ်းပၢႆႈၽေးသိုၵ်းၵေႃႉၼိုင်ႈတီႈဝဵင်းၵျွၵ်ႉမႄး ၺႃးရူတ်ႉၶိူင်ႈၽႃႇမၢတ်ႇၸဵပ်း ႁၢဝ်ႈႁႅင်းလူဝ်ႇတၢင်းၸွႆႈထႅမ်ၵႃႈယူတ်းယႃ။

မိူဝ်ႈဝၼ်းတီႈ 7/3/2023 ၵၢင်ၶမ်ႈ 3 မူင်းၼၼ်ႉ ၵူၼ်းပၢႆႈၽေးသိုၵ်းၵေႃႉၼိုင်ႈတီႈဝဵင်းၵျွၵ်ႉမႄး ၺႃးရူတ်ႉၶိူင်ႈၽႃႇမၢတ်ႇၸဵပ်း ႁၢဝ်ႈႁႅင်းလူဝ်ႇတၢင်းၸွႆႈထႅမ်ၵႃႈယူတ်းယႃ။

ၵူၼ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ- “ ၸႂ်ႈဢေႃႈ မိူဝ်ႈၶဝ်တေၵႂႃႇဝၢၼ်ႈၶႃႇ ၶဝ်သမ်ႉပႆတၢင်းၵႂႃႇ ၼႆဢေႃႈ သမ်ႉမီးရူတ်ႉၶိူင်ႈလမ်းၼိုင်ႈမႃးၽႃႇၺႃးသေ လုင်းၼႆႉပေႃးဢမ်ႇႁူႉတူဝ်။ လုပ်ႇၶေႃးမၼ်းပေႃးႁၵ်းၼႆဢေႃႈၼၼ်ႉ တေလႆႈသႂ်ႇလဵၵ်းသတီးၼႆ ၵူၺ်းၼႃႇသမ်ႉ ၶဝ်သမ်ႉဢမ်ႇပွင်ပဵၼ်လႆႈၼႆလႄႈ ၶႂ်ႈယွၼ်းတၢင်းၸွႆႈထႅမ် ပီႈၼွင်ႉႁဝ်းၶဝ်ၼႆဢေႃႈ ပေႃးဝၼ်းထိ 11ၼႆႉ တေလႆႈၽႃႇတတ်းၼႆဢေႃႈၼၼ်ႉ”- ဝႃႈၼႆ။

ၵေႃႉဢၼ်ၺႃးၵႃးၽႃႇၼႆႉ ၸိုဝ်ႈလုင်းဢွင်ႇသႃႇ ဢႃယု 55 ပီ ၸိုဝ်ႈမေးၼၢင်းႁွင်ႉဝႃႈ ပႃႈၼၢင်းၶမ်းၽိတ်ႈ မီးလုၵ်ႈၼိုင်ႈၵေႃႉ ယူႇဝၢၼ်ႈပၢင်ႁုမ်း ဢိူင်ႇပုင်းလူင် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ၼႃႈႁိူၼ်းၶဝ် ပၢႆႈၽေးသိုၵ်းသိူဝ် မိူဝ်ႈပီ 2021 ၼၼ်ႉသေ မိူဝ်ႈလဵဝ်မီးယူႇဝႆႉ ဝၢၼ်ႈမႂ်ႇ ၼႂ်းဝဵင်းၵျွၵ်ႉမႄး။

သင်ဝႃႈၵေႃႉလႂ်ၶႂ်ႈၸွႆႈၵမ်ႉထႅမ်ငိုၼ်းတွင်းတႃႇ လုင်းဢွင်ႇသႃႇၼႆၸိုင် ၵပ်းသိုပ်ႇတွင်ႈထၢမ်ႁူဝ်ယွႆႈလႆႈတီႈပႃႈၶမ်းမၼ်ႈ မေးၼၢင်းလုင်းဢွင်ႇသႃႇ မၢႆၾူၼ်း 09 261 424 920 ။