မိူဝ်ႈၼႆႉ ဝၼ်းတီႈ 3/3/2023 ယၢမ်းၵၢင်ၼႂ် 8 မူင်း  သိုၵ်းမၢၼ်ႈႁေႃႈႁိူဝ်းမိၼ်သိုၵ်းမႃးပၼ်ႇလဵပ်ႈ တီႈဝဵင်းပၢင်လွင်း ၸိုင်ႈတႆးပွတ်းၸၢၼ်းလႄႈ ၵူၼ်းမိူင်းမႆႈၸႂ်ၵူဝ်ၺႃးမၢၵ်ႇလူင်။

ၵူၼ်းပိုၼ်ႉတီႈ ဝဵင်းပၢင်လွင်းလၢတ်ႈတီႈၽူႈတွႆႇႁွၵ်ႈဝႃႈ- “ မိူဝ်ႈၼႂ်ၼႆႉ သိုၵ်းမၢၼ်ႈ ႁေႃႈႁိူဝ်းမိၼ်မႃးမွၵ်ႈ 5 လမ်း  ။ၶဝ်မႃးပၼ်ႇၸွမ်း ဝၢၼ်ႈသွင်းပျွင်းၼၼ်ႉႁေ ၶိုၼ်းပၼ်ႇလူင်မႃးတၢင်းၼႂ်းဝဵင်းပၢင်လွင်းၼႆႉဢေႃႈ။ပွႆႇမၢၵ်ႇဝႃႈ သင်ဝႃႈတႄႉၵေႃႈ ဢမ်ႇႁဵတ်းၼင်ႇၵဝ်ႇ။ဝၢၼ်ႈသွင်းပျွင်းၼႆႉ ၵၼ်ၵႆတင်း ဝဵင်းပၢင်လွင်း 13 လၵ်း  ၵႆၵၼ်တင်း ဝၢၼ်ႈၵေႃမႆႉသၢင်းမွၵ်ႈ 6 လၵ်း ” – ဝႃႈၼႆ။

တႄႇဢဝ်လိူၼ်ၾႅပ်ႊပိဝ်ႊရီႊ ဝၼ်းတီႈ 24 တေႃႇထိုင် လိူၼ်မၢတ်ႉၶျ် ဝၼ်းတီႈ 3 သိုၵ်းမၢၼ်ႈယိုတ်းမိူင်းလႄႈ  PDF ပဵၼ်ပၢင်တိုၵ်းၵၼ်မႃးၶိူဝ်းယႂ်းသေ ၵူၼ်းပၢႆႈၽေးသိုၵ်းၵေႃႈ ၼမ်မႃးၵူႈဝၼ်း။

ဢိင်ၼိူဝ်လွင်ႈၼႆႉသေ ၵူၼ်းပိုၼ်ႉတီႈဝဵင်းပၢင်လွင်းသိုပ်ႇလၢတ်ႈဝႃႈ- “ မိူဝ်ႈၶမ်ႈဝႃးၼႆႉၵေႃႈ ပဵၼ်ပၢင်တိုၵ်းၵၼ် တၢင်းဝၢၼ်ႈ သွင်းပျွင်းၼႆႉထႅင်ႈတင်းၶိုၼ်းၼႆဢေႃႈ ၊ငိၼ်းဝႃႈ ၾၢႆႇသိုၵ်းမၢၼ်ႈ တၢႆပဵၼ် 30 ၼႆဢေႃႈ။ ၵူၼ်းဝၢၼ်ႈ ၶဝ်ၵေႃႈ ပၢႆႈမႃးၼႂ်းဝဵင်းပၢင်လွင်းၼႆႉထႅင်ႈယဝ်ႉ။သိုၵ်းမၢၼ်ႈၵေႃႈ ထႅမ်ႁႅင်းသိုၵ်းယူႇၵေႃႈမီးယဝ်ႉ မိူဝ်ႈၼႂ်ၼႆႉၵူၺ်း ႁၼ်ၵႃးသိုၵ်းမၢၼ်ႈလတ်းၵႂႃႇ မွၵ်ႈ 3 လမ်းၼႆႉဢေႃႈ။မၢင်လမ်းတၢင်ႇပႃးၵွင်ႈလူင်သေဢေႃႈ”- ဝႃႈၼႆ။

မိူဝ်ႈလဵဝ်ၵူၼ်းပၢႆႈၽေးသိုၵ်း တင်းၵူၼ်းၵဝ်ႇ လႄႈ ၵူၼ်းမႂ်ႇ ၸိူဝ်းသွၼ်ႈယူႇတီႈၼႂ်းပၢင်လွင်း ႁူမ်ႈၵၼ်မီး ဢမ်ႇယွမ်း 8 မိုၼ်ႇ။ၵူၼ်းဝၢၼ်ႈၸိူဝ်းထူပ်းၽေးသိုၵ်းတီႈဝဵင်းပၢင်လွင်းၼႆႉ မီးလၢႆလၢႆဝၢၼ်ႈ မိူၼ်ၼင်ႇ ဝၢၼ်ႈၽြႃးလွႆ ၊ ဝၢၼ်ႈၵေႃမႆႉသၢင်း(တောင်မဲသင်း) ၊ ဝၢၼ်ႈလူင်ပႅၼ်ႈ(လုံးပျဉ်ရွာ) ၊ ဝၢၼ်ႈၼမ်ႉၼဵင်း(နန့်နိန်ရွာ) ၊ ၸလူင်ႈဝၢၼ်ႈၸၢၼ်း ၸဵမ်ၸိူဝ်းၼႆႉ။

မိူဝ်ႈဝႃးဝၼ်ႈတီႈ 2/3/2023 ၼႆႉၵေႃႈ သိုၵ်း SSPP တင်း RCSS ပဵၼ်ပၢင်တိုၵ်းၵၼ် တီႈႁိမ်းၼမ်ႉတွတ်ႇ ဢိူင်ႇလၢႆးၸၢမ် ၸႄႈဝဵင်းၵုၼ်ႁဵင် ၸိုင်ႈတႆးပွတ်းၸၢၼ်း။