ဝဵင်းၼမ်ႉလၼ်ႈ တေၸတ်းႁဵတ်းပၢင်ပွႆးၽြႃးလူင် မႁႃႇမျၢတ်ႈမုၼိ ၶွပ်ႈတဵမ်ပၢၵ်ႇပီ

ပေႃးထိုင်မႃး ဝၼ်းတီႈ 11 ထိုင် 15 လိူၼ် March 2023 ၼႆ့ သင်ႇၶႃႇၸဝ်ႈလႄႈ ၽူႈတူင်ႉၼိုင်ၼႃႈၵၢၼ်သႃႇသၼႃႇ ၼႂ်းဝဵင်းၼမ်ႉလၼ်ႈ တေႁူမ်ႈၵၼ် ၸတ်းႁဵတ်းပၢင်ပွႆးၽြႃးလူင် မႁႃႇမျၢတ်ႈမုၼိ ၶွပ်ႈတဵမ်ပၢၵ်ႇပီ။

ၸၢႆးသၢမ်လႅင်းၽူႈၼမ်းၼႂ်း ၾၢႆႇပွင်ပဵၼ်ပၢင်ပွႆး လၢတ်ႈတီႈၽူႈတွႆႇႁွၵ်ႈဝႃႈ – “မီးလွင်ႈႁၢင်ႈႁႅၼ်းဝႆႉၸိူင်ႉႁိုဝ်ၼႆ ၼႂ်းပၢင်ပွႆးပၢၵ်ႇပီႁဝ်းၶႃႈၼႆႉ မၼ်းတေမီးပႃးပၢင်တြႃး ပၢင်ႁေႃးထမ်းတဵတ်ႈထမ်းၽြႃး ၸဝ်ႈ၊ ၸၢတ်ႈသႅင်းတႆး ၊ပၢင်မူၼ်ႈသိူဝ်း ယဝ်ႉၵေႃႈပွႆးယွင်ႈၵုင်ႇယေႃးမုၼ်ၸိူဝ်းၼႆႉၶႃႈၼေႃႈ ဢၼ်တေၶဝ်ႈပႃးၼႆႉၵေႃႈ။ ဢၼ်ပဵၼ်တွၼ်ႈၵၢင်ၶမ်ႈၼႆႉ တေမီးၸဝ်ႈၶူးမေႃလူင် ထမ်ႇမသႃႇမိ၊ ၸဝ်ႈသြႃႇမိူင်းၵုတ်ႈ၊ၸဝ်ႈသူႉၶမ်းသေ ဝၼ်းသိပ်းၶမ်ႈ ၵၢင်ၼႂ်ၼႂ်းဝၼ်းယၢတ်ႇၼမ်ႉၼၼ်ႉ ၸဝ်ႈသြႃႇလူင် ဝတ်ႉထၢတ်ႈတေႃႇလွႆလႅမ်တေမႃးႁေႃးပၼ်ထမ်းတြႃး ။  တေမီးပႃးသင်ႇၶၸဝ်ႈမၢၼ်ႈ မႃးႁေႃးထမ်းၸဝ်ႈၼိုင်ႈ ပဵၼ်ၸဝ်ႈသူၺ်ႇပျီႇႁဵင်း။   ” – ဝႃႈၼႆ။

ၼႂ်းပၢင်ပွႆးပီၼႆ့ ၼွၵ်ႈလိူဝ် ပၢင်ထွမ်ႇတြႃးႁေႃးထမ်းယဝ်ႉ ယင်းလႆႈႁၢင်ႈႁႅၼ်းၽိတ်ႈမွၵ်ႇဝႆႉပႃး ၽူႈတႅမ်ႈလိၵ်ႈ၊ ၽူႈမီးတၢင်းႁူႉတၢင်းႁၼ်လၢႆလၢႆၸဝ်ႈ  မႃးမွၵ်ႈလၢတ်ႈတၢၼ်ႈၶႆႈ ၵဵဝ်ႇလူၺ်ႈလွင်ႈ လိၵ်ႈလၢႆးပၢႆပေႇ ဢိၵ်ႇလွင်ႈၶိုၼ်ႈယႂ်ႇမႂ်ႇသုင် ၸိူဝ်းၼႆ့ပႃး။

ၸၢႆးသၢမ်လႅင်းၽူႈၼမ်းၼႂ်း ၾၢႆႇပွင်ပဵၼ်ပၢင်ပွႆးသိုပ်ႇလၢတ်ႈထႅင်ႈဝႃႈ -“ ၾၢႆႇၽူႈတၢၼ်ႈၶႆႈဢၼ်တေမႃးၶႆႈၼႆႉ တေမီးသီႇၵေႃႉၼႃ ။ ၸၢႆးသၢမ်ၵေႃႉ ယိင်းၼိုင်ႈၵေႃႉ။    တေပဵၼ်ၽူႈတႅမ်ႈလိၵ်ႈ ႁိုၼ်းၵႃယၢင်း  ၊ပေႃးယဝ်ႉသမ်ႉပႃးထႅင်ႈ ၸၢႆးသႅင်မိူင်း လႃႈသဵဝ်ႈ၊ ယဝ်ႉၵေႃႈၾၢႆႇၸရေးၼႆႉသမ်ႉ ၶူးၸရေးၵေႃႇမိူင်း ၼမ်ႉပႅၼ်ႈသီႇပေႃႉၼေႃႈ ။ ယဝ်ႉၵေႃႈ ၽူႈတႅမ်ႈလိၵ်ႈသႅင်မိူင်းၵုတ်ႈ  ၼၢင်းမူဝ်ႁွမ် ဢၼ်ၶိုၼ်ႈႁဵၼ်းလိၵ်ႈလူင် တီႈၸၼ်ႉၸွမ်ပုတ်ႉထမိူင်းတႆးၼၼ်ႉၶႃႈဢေႃႈ” – ဝႃႈၼႆ။

ၽြႃးလူင်မႁႃႇမျၢတ်ႈမုၼိ  တီႈဝတ်ႉမူႇလၵျွင်းလူင် ဝဵင်းၼမ်ႉလၼ်ႈ  ဢၼ်ၸဝ်ႈၼင်ႈၵျွင်း ပႃးထူၼ်ႈသၢမ် သြႃႇၸဝ်ႈလူင် ၼၼ်ႇတိယ လႆႈဢွၼ်ႁူဝ်ၵူၼ်းမိူင်းသေ တႄႇလေႃႇသွၼ်းမႃး ၸဵမ်မိူဝ်ႈ ပီ1923 ၼၼ့် ၼမ်ႉၼၵ်းမီး (800) ၸွႆႉ။ တေႃႇထိုင် ယၢမ်းလဵဝ် သင်ႇၶၸဝ်ႈလႄႈၵူၼ်းမိူင်းၶဝ် တိုၵ့်သိုပ်ႇလုမ်းလႃးဝႆႉသေ ၵႆ့ၸတ်းႁဵတ်းပၼ်ပၢင်လူႇပၢင်တၢၼ်းၸိူဝ်းၼႆ့။