ၵူၼ်းၼုမ်ႇႁဵတ်းၵၢၼ်ဢွၼ်ႊလၢႆႊတႃႈၶီႈလဵၵ်းၸိုင်ႈတႆးပွတ်းဢွၵ်ႇ ၺႃးၺွပ်း 2 ၵေႃႉ။
မိူဝ်ႈဝႃး ဝၼ်းတီႈ 23/2/2023 ယၢမ်းၵၢင်ႈၶမ်ႈ 8 မူင်းၼၼ်ႉ ၼုမ်ႇၸၢႆး 2 ၵေႃႉ ဢၼ်ႁဵတ်းၵၢၼ်ဢွၼ်ႊလၢႆႊ ၺႃးတီႉၺွပ်း တီႈႁွင်ႈလိုဝ်ႈသဝ်းတီႈၼိုင်ႈ ႁိမ်းႁူင်းႁႅမ်းလူဝ်ႇမႃႇ(LOMA HOTEL) ၼႂ်းဝၢၼ်ႈတူၼ်ႈၵေႃႉၼႂ်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။
ၵူၼ်းၼုမ်ႇတႃႈၶီႈလဵၵ်းဢၼ်ႁဵတ်းၵၢၼ်ဢွၼ်ႊလၢႆႊၵေႃႉၼိုင်ႈလၢတ်ႈတီၽူႈတွႆႇႁွၵ်ႈဝႃႈ- “ ၸႂ်ႈဢေႃႈ ယႄးၶဝ်ၸိူဝ်းၼၼ်ႉ ၼုင်ႈၶူဝ်းၵူၼ်းႁိူၼ်းသေ မႃးၸႅတ်ႈမႃးထၢမ်ဝႃႈ ၸွင်ႇၸႂ်ႉၶွမ်ႊ (ၶွမ်ႊပိဝ်ႊတိူဝ်ႊ) ႁႃႉဢမ်ႇၸႂ်ႉ ၼႆသေ တီႉၺွပ်းၵႂႃႇၵူၼ်းၸၢႆးသွင်ၵေႃႉဢေႃႈ။ ႁဝ်းၶႃႈတႄႉ ႁူႉဝႆႉ လူင်ႈၼႃႈလႄႈ ႁဝ်းသိမ်းၶွမ်ႊႁဝ်းသေ ၶတ်းသေႃးၽၵ်းတူႈသေ ပၢႆႈထႃႈဝႆႉဢေႃႈ ။ သွင်ၵေႃႉၼႆႉတႄႉ ဢမ်ႇတၼ်းပၢႆႈလွတ်ႈလႆႈ။မၢင်ၵေႃႉၵေႃႈဝႃႈ ပေႃးၽႂ်ၸႂ်ႉၶွမ်ႊၼိုင်ႈလုၵ်ႈ ၺႃး တၢမ်ႇငိုၼ်း ၼိုင်ႈမိုၼ်ႇ ၼႆၵေႃႈငိၼ်းယဝ်ႉ ၼႆႉတႄႉ ဢမ်ႇႁူႉလီလီ ၵွပ်ႈဝႃႈႁဝ်းၵေႃႈ ပၢႆႈမႅပ်းဝႆႉဢွၼ်တၢင်း ” – ဝႃႈၼႆ။
ၼုမ်ႇၸၢႆး 2 ၵေႃႉဢၼ်ၺႃးတီႉၺွပ်းၵႂႃႇၼႆႉ ဢႃယု 20 ပီပၢႆ ၾၢႆႇပလိၵ်ႈမၢၼ်ႈၶဝ် တီႉၺွပ်းၵႂႃႇ တၢင်းႁူင်းပလိၵ်ႈ ဝၢၼ်ႈၵွင်း ၸႄႈဝဵင်းတႃႈၶီႈလဵၵ်း ၸိုင်တႆးပွတ်းဢွၵ်ႇ။
ၵူၼ်းၶၢတ်ႈယူႇႁူင်းသဝ်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ- “ ႁဝ်းၶႃႈတႄႉ ဢမ်ႇႁဵတ်းၵၢၼ်ဢွၼ်ႊလၢႆႊၼင်ႇၵဝ်ႇ ၵူၺ်းၼႃႇ ပေႃးၶဝ်မႃးၸႅတ်ႈသမ်ႉ ၵူဝ်ၶဝ်ၺွပ်းပႃးႁဝ်းၵႂႃႇလႄႈ ပၢႆႈမႅပ်းဝႆႉဢေႃႈ ၵူဝ်ၺႃးၵိၼ်လၢႆလၢႆ ပေႃးၶဝ်တေမႃးၸႅတ်ႈၶဝ် လၢတ်ႈၸဝ်ႈၶွင်ႁူင်းသဝ်း(အခန်းငှား)ဝႆႉဢွၼ်တၢင်းယူႇ”- ဝႃႈၼႆ။
ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃးၼႆႉ ၵူၼ်းၼုမ်ႇၼႂ်းမိူင်းတႆးလၢႆလၢႆဝဵင်း မႃးၶွၼ်ႈတီႈဝဵင်းတႃႈၶီႈလဵၵ်းၼမ်လၢႆ ။ ၵမ်ႈၽွင်ႈႁဵတ်းၵၢၼ်ၸွမ်းႁၢၼ်ႉၸွမ်းသႅင်ႇ ၵမ်ႈၽွင်ႈ ႁဵတ်းၵၢၼ်ဢွၼ်ႊလၢႆႊ ။မိူဝ်ႈလဵဝ် လွင်ႈပႅတ်ႉလႅၼ်ယွၵ်ႇၵိၼ်ငိုၼ်းၵၼ်ၼိူဝ်ဢွၼ်ႊလၢႆႊၵေႃႈ ၼမ်မႃးလႄႈ ၵူၼ်းမိူင်းမႆႈၸႂ် ၵူဝ်ပဵၼ်ၽေးထိုင်တူဝ်ၽႂ်မၼ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ