တႄႇဢဝ်ႁူဝ်ပီ 2023 ၼႆ့မႃး ၶၢဝ်းတၢင်း လိူၼ်ပၢႆၼႆႉ တီႈဝဵင်းတႃႈၶီႈလဵၵ်းမီးၽေးၵိုင့်ၵၢင့် ရူတ့်ၵႃးၽႃႇၵၼ် ၶႂ်ႈဝႃႈၵူႈဝၼ်း။
မိူဝ်ႈၼႆ့ဝၼ်းတီႈ 21/2/2023 ယၢမ်းၵၢင်ၼႂ်ၸဝ့် 2 မူင်းပၢႆ ၵေႃႈ ၾၢႆႇၼႃႈႁၢၼ့်ၶၢႆၶမ်း ၼၢင်းသူၺ်ႇၵျိၼ်း မၢႆ 3 ၊ တီႈႁိမ်းလုမ်းၵွၼ်းၵူႈႁွင်ႈၵၢၼ်ၼၼ့် ၵူၼ်းၸၢႆးၵေႃ့ၼိုင်ႈ ၺႃးၵူၼ်းဢမ်ႇႁူႉၾၢႆႇ ႁေႃႈရူတ့်ၶိူင်ႈ ၽႃႇတမ်သႂ်ႇသေ ပၢႆႈပႅတ်ႈ။
ၵူၼ်းၸၢႆးဢၼ်ၺႃးရူတ့်ၶိူင်ႈၽႃႇၼႆ့ ၸိုဝ်ႈႁွင်ႉ ၵူဝ်ႇမဵဝ်း ဢႃယု 50 ပၢႆ ပဵၼ်ၵူၼ်းႁၢမ်းတီႈယူႇ ၊ မၢတ်ႇၸဵပ်း တီႈၵွၵ်းႁူဝ်ႁၢဝ်ႈႁႅင်း။
လုၵ်ႈၸုမ်း ဢူးလႃႉမူဝ်း ၸုမ်းၸွႆႈထႅမ်လွင်ႈမၢတ်ႇၸဵပ်းလူႉတၢႆ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ မၼ်းၸၢႆးပဵၼ်ၵူၼ်းဢမ်ႇမီးတီႈယူႇတီႈၼွၼ်း၊ ၵႂႃႇမႃးၸွမ်းတၢင်းၼႂ်းဝဵင်းတႃႈၶီႈလဵၵ်းၼႆ့သေ ႁိူဝ့်မိူဝ်ႈလႂ် ၼွၼ်းၼၼ်ႈ ႁဵတ်းၼၼ်ၵူၺ်းဢေႃႈ ။ ၵူၼ်းပႂ်ႉယၢမ်းႁိမ်းႁၢၼ်ႉၶမ်းၼၼ်ႉထူဝ်းမႃးလၢတ်ႈႁဝ်းၶႃႈလႄႈ ႁဝ်းၼႅတ်ႈၵႂႃႇဢဝ်တူဝ်မၼ်း ၸွႆႈသူင်ႇႁူင်းယႃဢေႃႈ။ ၵူၼ်းၽႃႇမၼ်းတႄႉ ဢမ်ႇႁၼ်ယဝ်ႉၶႃႈ ပၢႆႈပႅတ်ႈယဝ်ႉ။ မိူဝ်ႈလဵဝ်တီႈၵၢင်ဝဵင်းတႃႈၶီႈလဵၵ်းၼႆႉ ၵူၼ်းၸိူဝ်းဢမ်ႇမီးႁိူၼ်းယေးတီႈယူႇၼႆႉ မီးၼမ်ၼႃႇၶႃႈ။ ယွၼ့်ယႃႈမဝ်းၵမ် ၵွႆးၵွႆးယဝ်ႉၶႃႈ”-ဝႃႈၼႆ။
မိူဝ်ႈဝၼ်းတီႈ 20/2/2023 ယၢမ်းၵၢင်ၶမ်ႈ 10 မူင်းပၢႆၼၼ့်ၵေႃႈ ၵႃး 2 လမ်း ၽႃႇၵၼ် တီႈႁိမ်း ၾႆးၶဵဝ်ၾႆးလႅင် ပႃႇလႅင် ပွၵ့်3 ၼႂ်းဝဵင်းတႃႈၶီႈလဵၵ်း မီးၵူၼ်းမၢတ်ႇၸဵပ်း ဢမ်ႇထိုင်တီႈလူ့သၢႆၸႂ် ။
ဢိင်ၼိူဝ်ပိူင်ပဵၼ် ၼႆ့သေ ၸုမ်းၾၢႆႇၸွႆႈထႅမ်တူင်ႇဝူင်းၵူၼ်း ဢူးလႃႉမူဝ်း ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈထႅင်ႈ ဝႃႈ- “ ဢၼ်ၵႃးၽႃႇၵၼ်ၼၼ့်တႄ့ ပဵၼ်ၵၢင်ၶမ်ႈ ၼၼ့်ၼႃႇၼေႃ။ ၽိူဝ်ႇႁဝ်းၵႂႃႇထိုင်ၵေႃႈ ၵူၼ်းႁေႃႈၵႃးၸိူဝ်း ၼၼ့် တႄ့ ပလိၵ်ႈၾၢႆႇၵုမ်းရူတ့်ၵႃး(ယဉ်ထိမ်းရဲ)ၶဝ် ပေႃးတေႃႉသႂ်ႇၵႃးၶဝ်ၵႂႃႇယဝ့်ဢေႃႈ ။ ႁဝ်းဢမ်ႇတၼ်းလႆႈဢဝ် ။ ယဝ့်ၵေႃႈ ႁွႆးမၢတ်ႇၸဵပ်းဢမ်ႇထိုင်တီႈလႆႈမႆႈၸႂ် ၼႆဢေႃႈ။ ၵႃးၶဝ်တႄ့ ၵွႆၼမ်ဝႆ့ယူႇ။ ပဵၼ်ၵႃးၽူဝ်းဝီး ဢွၵ်ႇၵိဝ်ႇမႃး သမ်ႉႁေႃႈဝႆးလႄႈ မႃးၽႃႇၺႃး ႁူဝ်ၵႃးဢၢၼ်ႇၸႃႇတူင်း ဢၼ်တိုၵ့်လႅၼ်ႈမႃး ၸွမ်းသဵၼ်ႈတၢင်းလူင်ၼၼ့်ဢေႃႈ” – ဝႃႈၼႆ။
ဝဵင်းတႃႈၶီႈလဵၵ်းၼႆ့ ပဵၼ်တီႈၵူၼ်းတၢင်ႇတီႈသီႇလႅၼ်မႃးယူႇၼမ်ၵိုၼ်းၶွၼ်ႈ။ ရူတ့်ၵႃးၵႂႃႇမႃးၵေႃႈၼမ်ႁႅင်း ။ သဵၼ်ႈတႃႈသၢႆတၢင်းၵေႃႈၵႅပ်ႈၵပ့် ႁၢၼ့်ၶၢႆၵူႈသမ်ႇသႅၼ်ပိူင် ၸွမ်းၶႅပ်ႈတၢင်းၵေႃႈ ၼမ်လိူဝ်မႃး ၵူႈဝၼ်း ။ ၵူၼ်းႁေႃႈရူတ်ႉၵႃးဝႆႉမဝ်မၢင်လႄႈ လွင်ႈရူတ့်ၵႃးၽႃႇၵၼ်ၵေႃႈ မီးၵူႈဝၼ်း။
ဢိင်ၼိူဝ်လွင်ႈၼႆ့သေ ၵူၼ်းပိုၼ့်တီႈဝဵင်းတႃႈၶီႈလဵၵ်းလၢတ်ႈဝႃႈ- “ တႃႈၶီႈလဵၵ်းၼႆ့ တၢင်းၵူၼ်းႁေ ဝဵင်းမၼ်းဢမ်ႇၵိုင်ႇလႅပ်ႈၵၼ်သေဢိတ်းယဝ့်ၶႃႈ ။ ၵူၼ်းၵေႃႈၼမ် ၵႃးၵေႃႈၼမ် ။ ပေႃးမိူၼ်မိူဝ်ႈလဵဝ် ၶႅၼ်းတေၵပ့်မႃးတိၵ်းတိၵ်းယဝ့်။ ၵွပ်ႈဝႃႈ ၶူဝ်မႄႈသၢႆ-တႃႈၶီႈလဵၵ်းၵေႃႈ ပိုတ်ႇၶိုၼ်းယဝ့်လူးၼေႃႈ။ၶႅၼ်းတေႁၢင်ႈႁၢႆ့ယဝ့် ၸုမ်းႁဝ်းၵၢၼ်ၶႅၼ်းတေၼမ်မႃးထႅင်ႈဢေႃႈ။ တေဝႃႈ ၾၢႆႇပလိၵ်ႈၶဝ်ၼႆၵေႃႈ ပၼ်တၢင်းႁူႉယူႇၵူၺ်းၼႃႇ ဢမ်ႇႁူမ်ႇငမ်းလႆႈ ၵူႈၵေႃ့ ၵူၼ်းမၼ်းၼမ်ၼႃႇလူး။ ၶဝ်တေႃႉတႄ့ႁဵတ်းလႆႈ မိူဝ်ႈပိူၼ်ႈမႃးႁဵတ်းလၢႆႊသိၼ်ႊဝႂ်ရူတ့်ၶိူင်ႈဝႂ်ၵႃးၸိူဝ်းၼႆ့ၵူၺ်းၼႃႇ ဢၼ်ၶဝ်သင်ႇလၢတ်ႈလႆႈၵေႃႈ” – ဝႃႈၼႆ။
ၸုမ်းၾၢႆႇၸွႆႈထႅမ်တူင်ႇဝူင်းၵူၼ်း ဢူးလႃႉမူဝ်း သင်ႇလၢတ်ႈဝႃႈ- “ ၵူၼ်းႁေႃႈရူတ့်ႁေႃႈၵႃးၵေႃႈ ပေႃးလူဝ်ႇႁေႃႈရူတ့်ၵႃးတႄ့ ယႃႇၵိၼ်လဝ်ႈမဝ်းယႃႈလႃးလႃး။ ႁႂ်ႈၾၢင်ႉသေႁေႃႈၸွမ်းပိူင်ရူတ့်ၵႃးဢၼ်ပိူၼ်ႈ တမ်းဝၢင်းဝႆ့ပၼ်၊ ယဝ့်ၵေႃႈ ၵူၼ်းၶီႇရူတ်ႉၶိူင်ႈၼႆႉ တိုၼ်းလူဝ်ႇလႆႈတိုဝ်းမၢၵ်ႇႁူဝ်ရူတ်ႉၶိူင်ႈ ၵူႈၵမ်း ၽွင်းယၢမ်းႁေႃႈရူတ့်ၶိူင်ႈ၊ မၼ်းပဵၼ်ဝဵင်းလႅၼ်လိၼ်လႄႈ ရူတ့်ၵႃးဢမ်ႇမီးဝတ်းဝႂ်ၵေႃႈလိူင်ႇ။ ဝဵင်းသမ်ႉၵႅပ်ႈ၊ တႃႇတေႁႂ်ႈၵူၼ်းၵူႈၵေႃႉ ၸွမ်းပၵ်းပိူင်မၢႆမီႈရူတ့်ၵႃးၼႆႉ ပဵၼ်ဢၼ်ယၢပ်ႇတေ့ယဝ့်” – ဝႃႈၼႆ။
ၼႂ်းပီ 2023 ၶၢဝ်းတၢင်းလိူၼ်ပၢႆၼႆ့ တီႈဝဵင်းတႃႈၶီႈလဵၵ်း ယွၼ့်ၽေးၵိုင့်ၵၢင့်ရူတ့်ၵႃးသေ ၵူၼ်းမၢတ်ႇၸဵပ်းႁၢဝ်ႈႁႅင်းမီး 5 ယဝ်ႉ၊ လႄႈ ၵူၼ်းလူ့တၢႆ မီး 9 ၵေႃ့ယဝ့်ၼႆ ပလိၵ်ႈၾၢႆႇၵုမ်း ရူတ့်ၶိူင်ႈတႃႈၶီႈလဵၵ်းလၢတ်ႈ။
