ဝၼ်းတီႈ(1) လိူၼ် March ပီ 2023 ၼႆႉ တူၵ်းမႅၼ်ႈဝၼ်းၵူၼ်းၼုမ်ႇတႆးလႄႈ ၵေႃႁူမ်ႈသၢင်ႈ ၵူၼ်းၼုမ်ႇတႆးTYN တေၸတ်းပၢင်ၵႅဝ်ႈ  တီႈမိူင်းၶိူဝ်း ၼႂ်းၸႄႈဝဵင်းသီႇပေႃ့ တေဢၢၼ်း ၸတ်းႁဵတ်းပႃး ပၢင်တၢၼ်ႊၶႆႈ။

ၸၢႆးဢွၼ်ႇၼုမ်ႇၶမ်း ၸုမ်းပွင်ၵၢၼ်ၵေႃႁူမ်ႈသၢင်ႈၵူၼ်းၼုမ်ႇတႆးလၢတ်ႈတီႈၽူႈတွႆႇႁွၵ်ႈဝႃႈ – “ဢေႃႈၶႃႈမိူဝ်ႈလဵဝ်ဢၼ်ႁဝ်းၶႃႈၶဝ်ဢုပ်ႇၵုမ်ႁၢင်ႈႁႅၼ်းဝႆႉၼႆႉတႄႉတေမီးပၢင်တၢၼ်ႈၶႆႈၼႂ်းဝၼ်းၵူၼ်းၼုမ်ႇတႆးၼႆၵေႃႈ။  ႁဝ်းတေႁွင်ႉမွၵ်ႇဢဝ်ၽူႈယႂ်ႇၵူၼ်းလူင်ၶဝ် တေမီးပၢင်တၢၼ်ႈၶႆႈ ၼၼ်ႉၶႃႈၼႃႇၼေႃႈ ဢၼ်ၼႆႉသေယဝ်ႉၵေႃႈ ႁဝ်းၶႃႈၶဝ် တေမီးပၢင်တၢၼ်ႈၶႆႈဢိတ်းဢွတ်း ၶႃႈၼႃႇၼေႃႈ မိူဝ်ႈလဵဝ်ၼႆႉၵေႃႈ ႁဝ်းၶႃႈလႆႈၸႂ်ၵၢၼ်ဝႆႉတႄႉ တေႁဵတ်းတီႈမိူင်းၶိူဝ်းၶႃႈဢေႃႈ ပဵၼ်ၼႂ်းၸႄႈဝဵင်းသီႇပေႃႉ ဝၢၼ်ႈမိူင်းၶိူဝ်းၼႆၶႃႈဢေႃႈ “ – ဝႃႈၼႆ ။

ပၢင်ၵႅဝ်ႈဝၼ်းၵူၼ်းၼုမ်ႇတႆး ဢၼ်တေၸတ်းႁဵတ်းပွၵ်ႈၼႆ့ လႆႈဝႃႈပဵၼ် ပွၵ်ႈၵမ်း 3။ ဢိင်ၼိူဝ်ငဝ်းလၢႆး  ၵၢၼ်ဝၢၼ်ႈမိူင်းသုၵ့်ယုင်ႈ ဢမ်ႇၼိမ်သဝ်းလႄႈ လႆႈၵိုတ်းယင့်မႃး ၶၢဝ်းတၢင်း 2 ပီ။

ၸၢႆးဢွၼ်ႇၼုမ်ႇၶမ်း ၸုမ်းပွင်ၵၢၼ်ၵေႃႁူမ်ႈသၢင်ႈၵူၼ်းၼုမ်ႇတႆးသိုပ်ႇလၢတ်ႈဝႃႈ – “ ဢၼ်တေၸတ်းႁဵတ်းၼႆႉ တေလႆႈဝႃႈပဵၼ်ပွၵ်ႈၵမ်းသၢမ်ၶႃႈဢေႃႈ ႁဝ်းၶႃႈၶဝ်လႆႈမၵ်းမၼ်ႈၸတ်းႁဵတ်း မႃးမိူဝ်ႈပီ2019 တႄႇမိူဝ်ႈၼၼ်ႉ သေၸတ်းႁဵတ်းမႃး ၽိူဝ်ႇမိူဝ်ႈပီ2021-22ၼႆႉသမ်ႉႁဝ်းၶႃႈဢမ်ႇလႆႈၸတ်းႁဵတ်းမႃး ဢၼ်ၼႆႉပဵၼ်ယွၼ်ႉ ငဝ်းလၢႆး ၵၢၼ်မိူင်း ၼၼ်ႉၶႃႈၼႃႇၼေႃႈ ပေႃးဝႃႈတေႉတေႉမၼ်းသင်လႆႈၸတ်းႁဵတ်းၵူႈပီတႄႉ ပီၼႆႉလူဝ်ႇပဵၼ် ပွၵ်ႈၵမ်း(5) သေတႃႉၵေႃႈ မၼ်းဢမ်ႇၸႂ်ႈသေ တိုၵ်ႉၸင်ႇႁႃတေပဵၼ်ၵမ်းထူၼ်ႈသၢမ်ၵူၺ်းၼႆၶႃႈဢေႃႈၼေႃႈ” – ဝႃႈၼႆ။

ဝၼ်းၵူၼ်းၼုမ်ႇတႆး Tai Youth Day ၼႆ့ ယူႇတီႈၵူၼ်းၼုမ်ႇၼႂ်းမိူင်းတႆးလႄႈ မိူင်းႁူမ်ႈတုမ်ပတ်းပိုၼ်ႉ လႆႈၸႂ်ၵၼ် တီႈပၢင်ၵုမ်လူင်ၶွၼ်ႊၾရႅၼ်ႊ ၼႂ်းတိူင်းပႃႇၵိူဝ်။ ပဵၼ်ၽွင်းႁၢင်ပီ 2017 ၼၼ်ႉ ပိုၼ်ၽၢဝ်ႇဝႃႈ ဢဝ်ဝၼ်းၵိူတ်ႇ ၻွၵ်ႊတိူဝ်ႊပႃႉၺၢၼ်ႇ ၽူႈႁၵ်ႉလိၵ်ႈလၢႆးပၢႆပေႇတႆး၊ ၽူႈတႅင်ႇတႅမ်ႈ ၽဵင်းတၢင်ႇတုင်းၸိူဝ်ႉၸၢတ်ႈ ၶိူဝ်းတႆးၶိူဝ်းရႃႇၸႃႇၼၼ့်သေ ၼႂ်းဝၼ်းတီႈ 1 လိူၼ်မၢတ်ႊၶျ်ၵူႈပီၼၼ်ႉ မၵ်းမၼ်ႈပဵၼ် ဝၼ်းၵူၼ်းၼုမ်ႇတႆးမႃး။

မိူဝ်ႈဝၼ်းတီႈ 27 ထိုင် ဝၼ်းတီႈ 29 လိူၼ်တီႊသိမ်ႊပိူဝ်ႊ ပီ 2022  ၶၢဝ်းတၢင်း 3 ဝၼ်း ၵေႃႁူမ်ႈသၢင်ႈ ၵူၼ်း ၼုမ်ႇတႆး Tai Youth Network  ၸတ်းႁဵတ်းပၢင်ၵုမ်ၶွပ်ႈပီ တီႈဝဵင်းၵႃလီ့ ၸိုင်ႈတႆးပွတ်းၸၢၼ်း။ ၼႂ်းပၢင်ၵုမ်ၼၼ့် ၽူႈတၢင်တူဝ်ပိုၼ့်တီႈ ႁူဝ်ၼႃႈ ၵူၼ်းၼုမ်ႇယိင်းၸၢႆးပတ်းပိုၼ့်မိူင်းႁူမ်ႈတုမ် ဢၼ်ၵွင့်သၢၼ်ၵၼ်ဝႆ့ မႃးၶဝ်ႈႁူမ် 15 ၵေႃ့။

ၵေႃႁူမ်ႈသၢင်ႈၵူၼ်းၼုမ်ႇတႆး(Tai Youth Network) ၼႆ့ ယူႇတီႈ ပိုၼ့်တီႈၽႂ်မၼ်းသေ လႆႈတူင့်ၼိုင်မႃး ၸွမ်းၼင်ႇၽႅၼ်ၵၢၼ်တမ်းဝၢင်းဝႆ့ မိူၼ်ၼင်ႇ ဝၼ်းၵူၼ်းၼုမ်ႇတႆး(March 1st) ၊ ၸွႆႈထႅမ်ၵူၼ်းပၢႆႈၽေးသိုၵ်း၊ၸွႆႈထႅမ်လွင်ႈၵိၼ်ယႅမ့် မုင့်ႁေႃႁိူၼ်းဢၼ်ယၢပ်ႇၽိုတ်ႇ လႄႈ ပၼ်တၢင်းႁူ့ လွင်ႈၵႅတ်ႇၵင်ႈတၢင်းပဵၼ် ၽွင်းၶၢဝ်းၶူဝ်ႊဝိတ်ႊ ၊ ၸတ်းႁဵတ်းပၢင်ပၼ်ပိုၼ့်ႁူ့ပၢႆးႁၼ်၊ႁဵတ်းၶမ်ႊပဵၼ်ႊ(Campaign) သၢင်ႈလွင်ႈႁၵ့်ပႅင်းၼိူဝ် Social Media ) ၊ ဢွၼ်ၵူၼ်းၼုမ်ႇလဵၼ်ႈဢဵၼ်ႁႅင်း တႃႇၵင်ႈယၢၼ်ၽေးယႃမဝ်းၵမ် ၸဵမ်ၸိူဝ်းၼႆ့။