Friday, June 14, 2024

ၵူၼ်းၵိၼ်ၸၢင်ႈလဵင်ႉပႄႉ ထဵင်မေႃးၽၼ်းတႅင်း ၼွင်ႉမႄႈလဵင်ႉတၢႆထင်တီႈ

Must read

ၵူၼ်းၵိၼ်ၸၢင်ႈလဵင်ႉပႄႉ ၽိတ်းမေႃးၵၼ်တင်း ၼွင်ႉၸၢႆးမႄႈလဵင်ႉၸဝ်ႈပႄႉ  ထိုင်တီႈတႅင်းၵၼ် တၢႆ   တီႈဝဵင်းတႃႈလိူဝ်ႇ ၸႄႈတွၼ်ႈတႃႈၶီႈလဵၵ်း  ။

Photo : ပၢင်ၸႃ့ ၵူၼ်းၺႃးၽၼ်းတၢႆ ဝဵင်းတႃႈလိူဝ်ႇ၊ ( ဢဝ်မႃးတီႈ ၸုမ်းလေႃးၵပႃႇလ)

လွင်ႈၽၼ်းတႅင်းၵၼ်တၢႆၼႆႉပဵၼ်ၵႂႃႇ မိူဝ်ႈၼႆႉ ဝၼ်းတီႈ 30/1/2023 ၵၢင်ဝၼ်း 12 မူင်း  တီႈဢိူင်ႇၼႃးယွင်း ဝဵင်းတႃႈလိူဝ်ႇ ၸႄႈတွၼ်ႈတႃႈၶီႈလဵၵ်း  ။

- Subscription -

ၸုမ်းၸွႆႈတူင်ႇဝူင်းၵူၼ်းလေႃးၵပႃႇလ ဝဵင်းတႃႈလိူဝ်ႇ လၢတ်ႈတီႈၽူႈတွႆႇႁွၵ်ႈဝႃႈ- “ ၸႂ်ႈဢေႃႈ ၽူႈၸၢႆးဢၼ် တၢႆ ၵႂႃႇၼႆ့  ဢႃယု ပေႃးယႂ်ႇယဝ့်ၼင်ႇၵဝ်ႇ။  မၼ်းၵႂႃႇလႄႇ ပီႈၼၢင်းမၼ်းတီႈ တီႈၶွၵ်ႈလဵင့်ပႄ့ ဢၼ်မီးၼႂ်း သူၼ်ၶဝ်ၼၼ့်ၼႆဢေႃႈ။ ၵႂႃႇၵႂၢမ်းၼမ်ၵၼ်တင်း ၵူၼ်းၵိၼ်ၸၢင်ႈလဵင့်ပႄ့ၶဝ်ၼၼ့်သေ ထိုင်တီႈ  ၽၼ်း ၵၼ်တၢႆ ။ ၶဝ်ထဵင်ၵၼ်ယွၼ့်သင်တႄႉတႄႉဢမ်ႇႁူႉၶႃႈ။ တူၺ်းတႄႉ လႅပ်ႈပဵၼ်ၶီႈယႃႈ တင်းသွင်ၵေႃႉ ဢေႃႈ။ မဝ်းယႃႈၼင်ႇၵၼ်သေ မေႃးၵၼ်ၼႆႉၵႂႃႈ။  ဢၢႆႈလဵင်ႉပႄႉၼႆႉ ဢႃယု မီးမွၵ်ႈ 30 ၼႆ့ၵူၺ်း ” – ဝႃႈၼႆ။

ၼွင်ႉၸၢႆးမႄႈလဵင်ႉ ဢၼ်ၺႃးၽၼ်းတၢႆၼႆႉၸိုဝ်ႈႁွင်ႉ လုင်းဝုၼ်းလိူဝ်ႇ  ဢႃယု 54 ပီ ။ မီးလုၵ်ႈၸၢႆး 2 ၵေႃႉ လုၵ်ႈယိင်း 1 ၵေႃႉ ယူႇ ဝၢၼ်ႈယၢၼ်ႇဢွင်ႇ ဢိူင်ႇၼႃးယွင်း ဝဵင်းတႃႈလိူဝ်ႇ ၸႄႈတွၼ်ႈတႃႈၶီႈလဵၵ်း  ။ မေးၼၢင်းမၼ်းတႄႉလူႉတၢႆႁိုင်ယဝ်ႉ။  

ၸုမ်းၸွႆႈတူင်ႇဝူင်းၵူၼ်းလေႃးၵပႃႇလ ဝဵင်းတႃႈလိူဝ်ႇ သိုပ်ႈလၢတ်ႈဝႃႈ- “ မိူဝ်ႈလဵဝ် ၵူၼ်းယွင်ႇလဝ်ႈယွင်ႇယႃႈ ၼမ်ၼႃႇ။ ဢမ်ႇသၢင်ႇတေႃႇသေ ထဵင်မေႃးၵႂၢမ်းၼမ်ၵၼ်ၵေႃႈ ထိုင်တီႈဢဝ်ၵၼ်တၢႆငၢႆႈၼႃႇ။ ပေႃးမဝ်းလဝ်ႈ မဝ်းယႃႈယဝ်ႉၼႆ ၸႂ်ၶဝ် ႁတ်းႁဵတ်းလွင်ႈႁုၵ့်ႁၢႆ့ၼႃႇ” – ဝႃႈၼႆ။

မိူဝ်ႈဝၼ်းတီႈ 7/1/2023 ၼၼ့်ၵေႃႈ ၵူၼ်းၸၢႆးၵေႃႉၼိုင်ႈ ယူႇဝၢၼ်ႈယၢၼ်ႇဢွင်ႇ ဢိူင်ႇၼႃးယွင်း ဝဵင်းတႃႈလိူဝ်ႇ ၼႆႉၵူၺ်းၼင်ႇၵဝ်ႇ  မဝ်းယႃႈ ဢွၵ်ႇၸႂ်ယွင်ႇမႃႈ မႅၵ်ႇၽႃႉမိတ်ႈဢွၵ်ႇႁိူၼ်းမႃးၽၼ်း ၵူၼ်းဝၢၼ်ႈသွင်မႄႈလုၵ်ႈ ဢၼ်ၼင်ႈဢွမ်ႇၾႆးယူႇၵၢင်ဝၢင်းႁိူၼ်းၶဝ်ၼၼ်ႉ။ လုၵ်ႈၸၢႆးဢွၼ်ႇၼၼ်ႉၵႂႃႇတၢႆႁူင်းယႃ။ ၵေႃႉပဵၼ်မႄႈမၢတ်ႇၸဵပ်းလိူဝ်ႁႅင်း။

ဢိင်ၼိူဝ်လွင်ႈၼႆ့သေ ၵူၼ်းတႃႈလိူဝ်ႇလၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းၵိၼ်ယႃႈၵိၼ်ၾိၼ်ႇၼႆ့ ၶႂ်ႈမီးၵူႈပွၵ့်ၵူႈယွမ်ႇယဝ့်ၶႃႈ။ၸဵမ်ၼုမ်ႇၸဵမ်ထဝ်ႈ  ဢေႃႈ။ၾၢႆႇၽူႈမီးပုၼ်ႈၽွၼ်းၶဝ်ၵေႃႈ ဢမ်ႇႁၢမ်ႈဢမ်ႇသီးသင်။ပၢင်တေႃႇပၢင်လွင်း သမ့်ပၢႆလိူင်ႇၼမ်ထႅင်ႈ” – ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း