ပီႈၼွင်ႉၸၢဝ်းလီႇသူႇ ဢွၼ်ၵၼ်မႃးၵၼ်ႇတေႃး တွၼ်ႈၶူဝ်းၾၢၵ်ႇ တီႈၽူႈယႂ်ႇၵူၼ်းလူင် ၼႂ်းတိုဝ်ႉတၢင်းၽွင်းပီမႂ်ႇ တီႈဝဵင်းမိူင်း ပၼ်ႇ ၸွမ်းၼင်ႇၾိင်ႈႁိၵ်ႈႁွႆးမီး ၶွပ်ႈၶူပ်ႇပီလႂ်ၼိုင်ႈပွၵ်ႈ။

တႄႇဢဝ်ႁၢင်လိူၼ်ၵျႅၼ်ႊၼိဝ်ႊရီႊ 2023 ၼႆႉမႃး ပီႈၼွင်ႉလီႇသူႇ ဢၼ်ယူႇသဝ်းၵိၼ်သၢင်ႈဝႆႉ တၢင်းပွတ်းဢွၵ်ႇဝဵင်းမိူင်းပၼ်ႇ ဢွၼ်ၵၼ်မႃးၵၼ်ႇတေႃး ၽူႈယႂ်ႇၵူၼ်းလူင် မိူၼ်ၼင်ႇ ၸဝ်ႈသြႃႇလူင်၊ ၽူႈၵွၼ်းပွၵ်ႉ၊ ၽူႈၵွၼ်းၸႄႈဝဵင်း၊ ၸုမ်းပႃႇတီႇၵၢၼ်မိူင်း၊ တပ်ႉၸၵၶ 17 လႄႈ ၸုမ်းတူင်ႉၼိုင်တူင်ႇဝူင်းၵူၼ်း ၼႂ်းဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၼႆယဝ်ႉ။

ၽူႈတူင်ႉၼိုင် ၼႂ်းတူင်ႇဝူင်းၵူၼ်း ဝဵင်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၶွပ်ႈၶူပ်ႇပီလႂ်ၼိုင်ႈပွၵ်ႈ ပီႈၼွင်ႉၸၢဝ်းလီႇသူႇ တေဢွၼ်ၵၼ်မႃးၵၼ်ႇတေႃးယူႇသေႇသေႇ။ ပီၼႆႉၵေႃႈမႃး တွၼ်ႈပႃးၶဝ်ႈပုၵ်းၶဝ်ထႅင်ႈလူးၵွၼ်ႇ။ ယဝ်ႉၵေႃႈ မႃးၼႄတၢင်းၵႃႈ ၾိင်ႈထုင်းပီႈၼွင်ႉလီႇသူႇထႅင်ႈ။ ယဝ်ႉၵေႃႈ မႃးတူၵ်းသူးပႃး တႃႇတေၸတ်းႁဵတ်းပွႆးပီမႂ်ႇလီႇသူႇၶဝ်”- ဝႃႈၼႆ။

ပီၼႆႉ ပီႈၼွင်ႉၸၢဝ်းလီႇသူႇ ဢၼ်မႃးၵၼ်ႇတေႃးလႄႈ တူၵ်းသူး တႃႇပွင်ပဵၼ်ပွႆးပီမႂ်ႇ ပွၵ်ႈၵမ်း 4 ၼႆႉ တေပဵၼ်ပီႈၼွင်ႉလီႇသူႇ တၢင်းဢွၵ်ႇဝဵင်း ဝၢၼ်ႈၵျွင်းထမ်း 3 လၵ်း၊ ဝၢၼ်ႈႁူၺ်ႈမၢၵ်ႇ 9 လၵ်းလႄႈ ဝၢၼ်ႈၼွင်တဝ်ႇ ၸိူဝ်းၼႆ။

“ၸွမ်းၼင်ႇ ၾိင်ႈထုင်းပီႈၼွင်ႉလီႇသူႇၶဝ်မီး ႁဝ်းၶႃႈ ပဵၼ်ဢၼ်ဢဝ်ၵုင်ႇမုၼ်ႁူမ်ၸူမ်း ၸွမ်းလွင်ႈၶဝ်ႁဵတ်းၶဝ်သၢင်ႈတႄႉတႄႉ ၼင်ႇႁိုဝ် ပီႈၼွင်ႉတႆး၊ ပဢူဝ်းလႄႈ လီႇသူႇ ႁဝ်းၶႃႈ ပေႃးတေလႆႈၶဝ်ႈဢွၵ်ႇၸမ်ၸႂ်ၵၼ် တႃႇမိူဝ်းၼႃး ဝဵင်းမိူင်းပၼ်ႇႁဝ်း”- ၽူႈတူင်ႉၼိုင် ၼႂ်းတူင်ႇဝူင်းၵူၼ်း ဝဵင်းမိူင်းပၼ်ႇ သိုပ်ႇလၢတ်ႈၼင်ႇၼႆ။

ၼွၵ်ႈလိူဝ်ၼၼ်ႉ ပေႃးထိုင်မႃး ဝၼ်းတီႈ 28/1/2023 ဝၼ်းသဝ် (လိူၼ်သၢမ်မႂ်ႇ 8 ၶမ်ႈ) ၸိုင် ယူႇတီႈ ၸုမ်းၵေႃပွင်ၵၢၼ်ပဵၼ် ပၢင်ပွႆး ပီမႂ်ႇလီႇသူႇ တူင်ႇဝဵင်းမိူင်းပၼ်ႇ တေၸတ်းႁဵတ်းပွႆးႁူမ်ႈလူႇတၢၼ်း ႁပ်ႉတွၼ်ႈပီမႂ်ႇလီႇသူႇ ပွၵ်ႈၵမ်း 4 တီႈႁူင်းႁေႃး ဝၢၼ်ႈသၢမ်လၵ်း ဢိူင်ႇဝူဝ်းလၢႆး ၸႄႈဝဵင်းမိူင်းပၼ်ႇ ယၢမ်းၵၢင်ဝၼ်း 11 မူင်း ထိုင် 3 မူင်းဝၢႆးဝၼ်း။

ယၢမ်းလဵဝ် ၼႂ်းၸႄႈဝဵင်းမိူင်းပၼ်ႇၼႆႉ မီးဝႆႉ ပီႈၼွင်ႉၸၢဝ်းၶိူဝ်းႁူမ်ႈၵၼ်ဝႆႉ မိူၼ်ၼင်ႇ ၸၢဝ်းတႆး၊ ပဢူးလႄႈ လီႇသူႇ ၸိူဝ်းၼႆႉ။