မၢၵ်ႇတႅၵ်ႇ ၼႂ်းပၢင်တေႃႇလွင်း လုၵ်ႈၼိုင်ႈ တီႈဝဵင်းလႃႈသဵဝ်ႈၸၢၵ်ႇမၢၵ်ႇတိူဝ်ႉၵူၼ်းမႃးလဵၼ်ႈလွင်း မၢတ်ႇၸဵပ်း 5 ၵေႃႉ တၢႆ 2 ၵေႃႉ။
ဝၼ်းတီႈ 21/1/2023 ယၢမ်းၵၢင်ၶမ်ႈ 9 မူင်းၶိုင်ႈ မီးၵူၼ်းမႃးထိုမ်ႈမၢၵ်ႇသႂ်ႇ တီႈပၢင်တေႃႇလွင်း ဢၼ်ပိုတ်ႇဝႆႉ တီႈပွၵ်ႉ 5 ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႇ ၼၢင်းယိင်း 3 ၵေႃႉ ၸၢႆး 2 ၵေႃႉ မၢတ်ႇၸဵပ်းႁႅင်း။ လိူဝ် ၼၼ်ႉ လူႉတၢႆၸွမ်းထႅင်ႈ 2 ၵေႃႉ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇၼႆႉ မီးၵူၼ်းမႃးပွႆႇသႂ်ႇ လုၵ်ႈၼိုင်ႈ တႅၵ်ႇတိူဝ်ႉသႂ်ႇ မၢတ်ႇၸဵပ်း 5 ၵေႃႉ တၢႆ 2 ၵေႃႉ တေပဵၼ်ၵူၼ်းသႅၼ်းၼုမ်ႇဢွၼ်ႇၵူၺ်းၶႃႈ။ ပဵၼ်ၼမ်ႉမိုဝ်းၽႂ် ၸုမ်းလႂ်ႁဵတ်းတႄႉ ဢမ်ႇႁူႉ။ ဢွင်ႈတီႈ မၢၵ်ႇတႅၵ်ႇသႂ်ႇ ၼႂ်းပၢင်တေႃႇလွင်းၼၼ်ႉ ၶဝ်ႁွင်ႉဝႃႈ ဢွင်ႈတီႈ 567 ပွၵ်ႉ 5 ၼႆၶႃႈ”- ဝႃႈၼႆ။
ပၢင်တေႃႇလွင်း ဢၼ်မီးၼႂ်းဝၢင်းႁိူၼ်း 567 ၼၼ်ႉမိူၼ်ၼင်ႇ ပၢင်ၽၢႆႉ ၊ မၢၵ်ႇတူၵ်း ၶိုၼ်ႈလႆ ၸိူဝ်းၼႆႉ မီးလွင်ႈ လူႉၵွႆၸွမ်းတင်းၼမ်။ ပၢင်တေႃႇလွင်း တီႈပွၵ်ႉ 5 ၼႆႉ ပိုတ်ႇမႃး ၶၢဝ်းတၢင်း ပီပၢႆယဝ်ႉ လႆႈႁူႉၼင်ႇၼႆ။
“ပၢင်တေႃႇလွင်း တီႈဝဵင်းလႃႈသဵဝ်ႈၼႆႉ ပိုတ်ႇမႃးတင်းပီယဝ်ႉ ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ ၽူႈဢွၼ်ႁူဝ်ပိုတ်ႇသမ်ႉ ပဵၼ် ဢူးမွင်ႇၵျီး ႁူဝ်ၼႃႈၸုမ်းပျီႇတူႉၸိတ်ႉၶႄႇ (ၼႂ်းပိုၼ်ႉတီႈ) ၶႃႈ။ ယဝ်ႉၵေႃႈ မိူၼ်ၼင်ႇ ဝၢၼ်ႈၼႃးၼၼ်ႉ ပိုတ်ႇမႃးလႆႈပီပၢႆမိူၼ် ၵၼ်။ ပၢင်တေႃႇလွင်း ထႅင်ႈတီႈၼိုင်ႉသမ်ႉ မီးတီႈ ဝၢၼ်ႈႁၢတ်ႇၵႃႇ၊ ၼၼ်ႉတႄႉ တိုၵ်ႉပိုတ်ႇမႃး မီး 4 လိူၼ်ပၢႆၼႆႉၵူၺ်း။ တင်းမူတ်းၼႆႉ ၸဝ်ႈၶွင်ပဵၼ်ဢူးမွင်ႇၵျီး။ ၵူၼ်းၵႂႃႇတေႃႇ လႅၼ်ႈမၼ်းတႄႉ ၵိုၼ်းတင်းဝၼ်းတင်းၶိုၼ်းၶႃႈယဝ်ႉ”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။
ၸူဝ်ႈမီးပၢင်တေႃႇလွင်ႈၼႆႉမႃး ၵူၼ်းမိူင်းပိုၼ်ႉတီႈ ဝဵင်းလႃႈသဵဝ်ႈ ဢမ်ႇမီးလွင်ႈႁူမ်ႇလူမ်ႈ ၽူႈလၵ်ႉၸၵ်ႉၶုတ်ႈ လိူင်ႇၼမ်ႁႅင်း၊ ၵႃး၊ ရူတ်ႉၶိူင်ႈ ၸိူဝ်းၼႆႉၵႆႉႁၢႆမႃး ၶိူဝ်းယႂ်း။ ယဝ်ႉၵေႃႈ ထႅင်ႈလွင်ႈၼိုင်ႈသမ်ႉ ပၼ်ႁႃၼႃႈႁိူၼ်းလူႉ ၽူဝ်မေးၵႆႉၽိတ်းၽႅၵ်ႇမေႃး ၵၼ်သေ ထိုင်တီႈပေႃးလႆႈပႅတ်ႈၵၼ် ယွၼ်ႉပၢင်တေႃႇလွင်းၼႆႉ မီးမႃးၼမ်ယဝ်ႉ ၵူၼ်းပိုၼ်ႉတီႈလၢတ်ႈ။
