သိုၵ်းမၢၼ်ႈယိုတ်းမိူင်း တဵၵ်းၸႂ်ႉႁႂ်ႈမေႃသွၼ် ၸိူဝ်းႁဵတ်း CDM ၸိုင်ႈတႆးပွတ်းႁွင်ႇ ၶဝ်ႈၵၢၼ်ၶိုၼ်း။
တႄႇဢဝ်ႁူဝ်လိူၼ် တီႊသိမ်ႊပိူဝ်ႊ 2022 မႃး သိုၵ်းမၢၼ်ႈယိုတ်းမိူင်း တဵၵ်းၸႂ်ႉ ႁႂ်ႈမေႃသွၼ် ၸိူဝ်းႁဵတ်း CDM ၶဝ်ႈၵၢၼ်ၶိုၼ်း တေႁဵတ်းႁႂ်ႈ မိူင်းတႆးပွတ်းႁွင်ႇ ဢမ်ႇမီး CDM ဝႃႈၼႆ ။
ၵူၼ်းပိုၼ့်တီႈ ဝဵင်းလႃႈသဵဝ်ႈ ၵေႃႉၼိုင်ႈလၢတ်ႈတီႈ ၽူႈတွႆႇႁွၵ်ႈဝႃႈ- “ သိုၵ်းမၢၼ်ႈ သင်ႇႁႂ်ႈၽူႈၵွၼ်းပွၵ့် လၢတ်ႈၵူၼ်းႁဵတ်း CDM ၶဝ်ႁႂ်ႈၶဝ်ႈၵၢၼ်ၶိုၼ်းၼႆဢေႃႈ ။ ႁႂ်ႈၶဝ် မႃးႁွင့် မႃးတဵၵ်းၸႂ်ႉထိုင်ႁိူၼ်းတႄ့ ဢမ်ႇၸႂ်ႈၼင်ႇၵဝ်ႇ။ ၵူၺ်းၼႃႇ ဢၼ်သိုၵ်းမၢၼ်ႈၶဝ်ႁွင့်ၶိုၼ်းၼႆ့ တေၸႂ်ႉႁဵတ်းၵၢၼ်ၶိုၼ်းႁႃႉ ဢမ်ႇၼၼ်တေပၼ်တူတ်ႈတၢမ်ႇၼႆ ဢမ်ႇၸၢင်ႈႁူႉလွၵ်းၶဝ်လႄႈ မေႃသွၼ် CDM ၵမ်ႈၽွင်ႈ လွမ်ၵူဝ်ဝႆ့ယူႇဢေႃႈ။ဢူၺ်းၵေႃႉ မေႃသွၼ်ၵေႃႉၼိုင်ႈတႄ့ သင်ဝႃႈႁဵတ်ႈၵၢၼ်ၶိုၼ်းလႄႈ ဢမ်ႇဢဝ်တၢင်းၽိတ်းသင်ၼႆတႄ့ တေယွမ်းႁဵတ်းၵၢၼ်ၶိုၼ်းယူႇ ၵွပ်ႈ လွင်ႈႁႃႈၵိၼ်လဵင့်တွင့်ၵေႃႈယၢပ်ႇ သမ့်ၵူဝ်ၵူၼ်းၼႂ်းၼႃႈႁိူၼ်းလိူတ်ႇမႆႈၸွမ်းထႅင်ႈလႄႈ ”- ဝႃႈၼႆ။
ဢၼ်သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇႁႂ်ႈ မေႃသွၼ် CDM ၶဝ်ႈႁၢပ်ႇၵၢၼ်ၶိုၼ်းၼႆ့ မီးယူႇလၢႆလၢႆဝဵင်း မိူၼ်ၼင်ႇ လႃႈသဵဝ်ႈ၊ၼမ့်သၼ်ႇ၊ သႅၼ်ဝီ ၊ ၵျွၵ့်မႄး ၸိူဝ်းၼႆႉယွၼ့်ဝႃႈ ၵူၼ်းႁဵတ်း CDM ယူႇသဝ်းမီးဝႆႉတင်းၼမ် ဝႃႈၼႆ။
မေႃသွၼ် CDM ဝဵင်းၼမ့်သၼ်ႇၵေႃႉၼိုင်ႈ လၢတ်ႈဝႃႈ- “ ၸႂ်ႈယဝ့်။ မိူဝ်ႈဝူင်ႈပူၼ်ႉမႃး ၶဝ်ႁွင့်ၽူႈၵွၼ်းပွၵ့်သေ ႁဵတ်းပၢင်ၵုမ်ၼႆဢေႃႈ။ၶဝ်တေဢၢၼ်း ႁွင့်ၵူၼ်း CDM ၶဝ်ႈႁဵတ်းၵၢၼ်ၶိုၼ်းတင်းသဵင်ႈၼႆဢေႃႈ။ႁဝ်းႁဵတ်း သီႊတီႊဢႅမႅႊ မႃးၼႆ့ ၸမ်သွင်ပီယဝ့်လူး။ ပဵၼ်ႁိုဝ်ၵေႃႈ တိုၼ်းလူဝ်ႇသိုပ်ႇႁဵတ်းယူႇယဝ့်။သင်ဝႃႈ ဢမ်ႇၶဝ်ႈၵၢၼ်ဢမ်ႇလႆႈၼႆၵေႃႈ တေၶၢမ်ႇၵိုတ်းလိုဝ်ႈပုၼ်ႈၽွၼ်းဢၼ်ၼႆ့ပႅတ်ႈသေယဝ့်ဢေႃႈ ” – ဝႃႈၼႆ။
မေႃသွၼ် CDM ထႅင်ႈၵေႃႉၼိုင်ႈ လၢတ်ႈဝႃႈ- “ ၵမ်ႈၽွင်ႈၵေႃႈ ႁဵတ်း CDM သေ ယူႇဝႆ့ၼႂ်းဝဵင်းၵေႃႈ မီးဝႆ့ယူႇ။ၸိူဝ်းဢၼ် ႁၢပ်ႇၵၢၼ်သွၼ်လိၵ်ႈပၼ် ၸွမ်းၼႂ်းဝၢၼ်ႈ ဢၼ် TNLA ႁွင်ႉၵႂႃႇ ၶၢၼ်းၵႂႃႇၸိူဝ်း ၼၼ့်ၵေႃႈမီး။ ပေႃးသိုၵ်းမၢၼ်ႈၶဝ် မႃးတဵၵ်းၸႂ်ႉႁႂ်ႈႁဵတ်းၵၢၼ်ၶိုၼ်းၼႆတႄ့ တေယၢပ်ႇယူႇ။ ပေႃးႁွင့်ၸိုဝ်ႈၵေႃႉလႂ်ၵေႃႉၼၼ့်သေ ၸႂ်ႉႁဵတ်းၵၢၼ်ၶိုၼ်းတႄ့ ဢၼ်လူဝ်ႇဝႄႈပၢႆႈၵေႃႈ လူဝ်ႇပၢႆႈဝႆ့ယဝ့်။တီႈၼမ့်သၼ်ႇၼႆ့ မေႃသွၼ်ယိင်း၊ၸၢႆး ဢၼ်ႁဵတ်း CDM မီး150 လႄႈ Non CDM မီး 250 ” – ဝႃႈၼႆ။
ဝၢႆးသေသိုၵ်းမၢၼ်ႈယိုတ်းမိူင်းၼၼ့် ႁွင်ႈၵၢၼ်လၢႆလၢႆၸုမ်းၼႂ်းမိူင်းႁူမ်ႈတုမ် ႁဵတ်း CDM ႁႂ်ႈၵၢၼ်သိုၵ်းမၢၼ်ႈၽွင်းငမ်းသုတ်းသဵင်ႈ။မိူၼ်ၼင်ႇ ၾၢႆႇႁွင်ႈၵၢၼ် ပၢႆးပၺ်ႇၺႃႇၵေႃႈ ႁဵတ်း CDM တင်းၼမ် မၢင်ၸိူဝ်း ၺႃးတိၺွပ်းၵုမ်းၶင်ဝႆ့ ၸွမ်းလူၺ်ႈမတ့်တႃ 505 (ၵ) ထိုင်မိူဝ်ႈလဵဝ်ပႆႇလွတ်ႈမႃး။
မိူဝ်းဝၼ်းတီႈ 4/1/2023 ဝၼ်းလွတ်ႈလႅဝ်းၼၼ်ႉ ၵူၼ်းတူၵ်းၶွၵ်ႈလူင်ၵဵင်းတုင် ၸိုင်ႈတႆးပွတ်းဢွၵ်ႇ လွတ်ႈမႃး 48 ၵေႃႉ ၼႂ်းၼၼ့် ပႃး မေႃသွၼ် CDM ၵေႃႉၼိုင်ႈ မမီႇသေႃး။
ၾၢႆႇသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇ ႁႂ်ႈမေႃသွၼ် CDM ၶဝ်ႈၵၢၼ်ၶိုၼ်း မိူဝ်ႈဝၼ်းတီႈ 7 လိူၼ်ၵျုၼ်ႊ 2022 ပူၼ့်မႃးၼၼ့်ယဝ့်ပွၵ်ႈၼိုင်ႈ။မိူဝ်ႈလဵဝ်ၵေႃႈ ႁွင့်မေႃသွၼ်ႁႂ်ႈၶဝ်ႈၵၢၼ်ၶိုၼ်း ပွတ်းႁွင်ႇၼႆ့ တေဢမ်ႇႁႂ်ႈမီး CDM ဝႃႈၼႆ။
