မိူဝ်ႈဝႃႈ ဝၼ်းတီႈ 10/1/2023 ၵၢင်ၼႂ် 5 မူင်းၶိုင်ႈ လုၵ်ႈဢွၼ်ႇယိင်း 10 ၶူပ်ႇ ယူႇပွၵ့်ၵၢတ်ႇ၊တီႈဝဵင်းမူႇၸေႊ ၺႃးၸုမ်းယိပ်းၵွင်ႈၵၢင်ႇၸုမ်းၼိုင်ႈ တီႉၺွပ်းၵႂႃႇပဵၼ်တူဝ်ယိူဝ်ႇ။
ၵူၼ်းၸမ်ၸႂ်ပေႃႈမႄႈလုၵ်ႈဢွၼ်ႇယိင်းၼၼ့် လၢတ်ႈတီႈၽူႈတွႆႇႁွၵ်ႈဝႃႈ- “ ၸႂ်ႈဢေႃႈ မိူဝ်ႈမႄႈၶဝ် တိုၵ့်တေၵႂႃႇသူင်ႇလုၵ်ႈဢွၼ်ႇၵႂႃႇႁူင်းႁဵၼ်းၶႄႇဢေႃႈၼၼ့်။မႅၼ်ႈမိူဝ်ႈလုၵ်ႈဢွၼ်ႇ တိုၵ့်ၸုၵ်းပႂ်ႉတၢင်းၼႃႈႁိူၼ်း မီးၵူၼ်းၸုမ်းၼိုင်ႈ မႃးၺွပ်းလုၵ်ႈဢွၼ်ႇၶိုၼ်ႈၵႃးၵႂႃႇဢေႃႈ။မႄႈၶဝ် ႁွင့်ႁွင့်သႅၼ်ႇသႅၼ်ႇယူႇၵေႃႈ ဢမ်ႇတၼ်းလႆႈ” – ဝႃႈၼႆ။
ဝၢႆးၼၼ်ႉၾၢႆႇတီႉၺွပ်းလုၵ်ႈဢွၼ်ႇၶိုၼ်း သိုပ်ႇၾူၼ်းမႃးတီႈ ပေႃႈမႄႈလုၵ်ႈဢွၼ်ႇသေယွၼ်းငိုၼ်းၶႄႇ ၼိုင်ႈသႅၼ်ႁႃႈမိုၼ်ႇ (150000)ယႂၼ်ႊ (သွၼ်ႇငိုၼ်းမၢၼ်ႈပဵၼ် 600 သႅၼ်ပျႃး) ႁႂ်ႈဢဝ်မႃးလႅၵ်ႈၵၼ်တင်းသၢႆၸႂ်လုၵ်ႈဢွၼ်ႇ။
ၵူၼ်းၸမ်ၸႂ်ပေႃႈမႄႈလုၵ်ႈဢွၼ်ႇယိင်းၼၼ့် သိုပ်ႇလၢတ်ႈဝႃႈ – “ ၸုမ်းတီႉလုၵ်ႈဢွၼ်ႇၵႂႃႇၼႆ့ မိူဝ်ႈတႄႇမၼ်း ယွၼ်းငိုၼ်း 5 သႅၼ်ငိုၼ်းၶႄႇဢေႃႈၼၼ့်။ၾၢႆႇပေႃႈမႄႈ လုၵ်ႈဢွၼ်ႇ တွင်းတွင်းပၢၼ်ႇပၢၼ်ႇသေ ၶဝ်ၸင်ႇလူတ်းယွမ်းပၼ် ပဵၼ်ၵႂႃႇ သႅၼ်ႁႃႈမိုၼ်ႇ။မိူဝ်ႈလဵဝ်တႄ့ ပၼ်ငိုၼ်းသေ ပွႆႇလွတ်ႈမႃးၶိုၼ်းယဝ့်။ ၶဝ်ဢဝ်လုၵ်ႈဢွၼ်ႇ ဝႆ့တီႈၼိုင်ႈသေ ႁႂ်ႈဢဝ်ငိုၼ်း ၵႂႃႇပၼ်တီႈၼိုင်ႈႁဵတ်းၼႆဢေႃႈ ” – ဝႃႈၼႆ။
ၸုမ်းတီႉလုၵ်ႈဢွၼ်ႇၼႆႉ ပဵၼ်ၽႂ်ၸုမ်းလႂ်တႄႉဢမ်ႇႁူႉ။ ၸွင်ႇၸႂ်ႈၼႂ်းၸုမ်းသိုၵ်းသေၸုမ်းၸုမ်းၵေႃႈဢမ်ႇၸၢင်ႈယိုၼ်ယၼ်။ ပလိၵ်ႈမၢၼ်ႈၵေႃႈဢမ်ႇဢဝ်လိူင်ႈ ဢမ်ႇႁႃတီႉၺွပ်းပၼ်လႄႈ ဢမ်ႇမီးၽႂ်ယိုၼ်ယၼ်လႆႈ – ၵူၼ်းမူႇၸေႊ လၢတ်ႈၼင်ႇၼႆ။
ၵႃႈၵွၼ်ႇပူၼ်ႉမႃးလွင်ႈတီႉၺွပ်းပဵၼ်တူဝ်ယိူဝ်ႇၼႆႉ ပဵၼ်ၵူၼ်းၼုမ်ႇ ၼၢင်းယိင်းၸိူဝ်းၼႆႉၼမ်။ ၵမ်ႈၼမ်ပဵၼ်ၵူၼ်းၵႃႉၵူၼ်းၶၢႆ၊ ၵူၼ်းမၢၵ်ႈမီးလီပဵၼ် ၸိူဝ်းၼႆႉ ။ယၢမ်းလဵဝ် ၵူၼ်းထႆၵိၼ်ငိုၼ်းၼႆႉ ပႂ်ႉဢဝ်လုၵ်ႈဢွၼ်ႇ ၸိူဝ်းဢမ်ႇမီးၽူႈၵုမ်းထိင်းႁိမ်းၸမ်၊ လုၵ်ႈဢွၼ်ႇၽွင်းၵႂႃႇႁူင်းႁဵၼ်းၸိူဝ်းၼႆႉမႃး။ ႁဵတ်းႁႂ်ႈပေႃႈမႄႈလုၵ်ႈဢွၼ်ႇ ဢွၼ်ၵၼ်မႆႈၸႂ် ဢမ်ႇမီးလွင်ႈႁူမ်ႇလူမ်ႈ။
ပေႃႈလုၵ်ႈဢွၼ်ႇယိင်းၼၼ့် လၢတ်ႈတီႈၽူႈတွႆႇႁွၵ်ႈဝႃႈ- “ မိူဝ်ႈလဵဝ် တီႈမူႇၸေႊၼႆ့ လွင်ႈတိၺွပ်းၵူၼ်းသေ ထႆၵိၼ်ငိုၼ်းၸိူင့်ၼႆၼႆ့ ၼမ်လိူင်ႇမႃးတိၵ်းတိၵ်းယဝ့်။ၽူႈယႂ်ႇၵူၼ်းလူင်ၶဝ် ဢမ်ႇလူဝ်ႇယူႇမဝ်မၢင်ၼႃႇၽႅဝ်။ႁႂ်ႈတူၺ်းလုၵ်ႈၽႂ်လၢင်းမၼ်း လီလီဢေႃႈ” -ဝႃႈၼႆ။
မိူဝ်ႈပူၼ့်မႃး ဝၼ်းတီႈ 15 လိူၼ်ဢွၵ်ႊထူဝ်ႊပိူဝ်ႊ 2022 ၼၼ့်ၵေႃႈ လုၵ်ႈဢွၼ်ႇ ဢႃယု 9 ၶူပ်ႇၵေႃ့ၼိုင်ႈ တီႈမူႇၸေႊ ၺႃးၵူၼ်း 4 ၵေႃႉ တီႉၺွပ်းၵႂႃႇပဵၼ်တူဝ်ယိူဝ်ႇ ယွၼ်းငိုၼ်းၶႄႇ 5 သႅၼ်။
ငဝ်းလၢႆးဝၢၼ်ႈမိူင်း ဢမ်ႇၼိမ်သဝ်း မိူဝ်ႈလဵဝ်ၼႂ်းမိူင်းတႆးၵမ်ႈၼမ် ၸုမ်းယိပ်းၵွင်ႈၵၢင်ႇၵေႃႈလိူင်ႇ၊ ၵူၼ်းသူႇသမ်းၵိၼ်ယႃႈၵေႃႈလိူင်ႇၼမ်၊ သမ့်ၵႆ့ၺႃးၵူၼ်းဢမ်ႇႁူ့ၾၢႆႇ တိၺွပ်းပဵၼ်တူဝ်ယိူဝ်ႇ လႄႈ တေၵႂႃႇလႂ်ပႆလႂ်ႁႂ်ႈတူၺ်းငဝ်းလၢႆးလီလီ ၸင်ႇဢွၵ်ႇႁိူၼ်းၼႆ တေတိူဝ်းလီ ၼႆၵူၼ်းပိုၼ့်တီႈဝဵင်းမူႇၸေႊၵေႃ့ၼိုင်ႈ သင်ႇလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ