မိူဝ်ႈဝႃးဝၼ်းတီႈ 10/1/2023 ၵၢင်ဝၼ်း 11 မူင်းၶိုင်ႈ  ၾႆးမႆႈႁွင်ႈထႅဝ် ပွၵ့်ၵွင်းမူးလွႆ ၼႃႈလိၼ်မၢႆ 3 ၸႄႈဝဵင်း မူႇၸေႊ ၸိုင်ႈတႆးပွတ်းႁွင်ႇ ၶူဝ်းၶွင်ႁိူၼ်းယေးဢမ်ႇတၼ်းလႆႈသင် ၵူၼ်းမၢတ်ႇၸဵပ်းလူႉတၢႆတႄႉဢမ်ႇမီး။

ၾၢႆႇၶႄၾႆးဝဵင်းမူႇၸေႊ ၵေႃ့ၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “  မိူဝ်ႈတႄႇမၼ်းမႆႈၵႂႃႇႁွင်ႈၼိုင်ႈၵူၺ်း။ ၵူၼ်း ၶၢတ်ႈႁွင်ႈၸိူဝ်းၼၼ်ႉၵႂႃႇႁဵတ်းၵၢၼ်မူတ်း။ ၶတ်းသေႃးႁွင်ႈဝႆႉလႄႈၶႄၾႆးယၢပ်ႇၼႃႇ ။ လၢမ်းမႆႈတင်း 6 ႁွင်ႈ ဢေႃႈ။ ပလိၵ်ႈတႄႉလၢတ်ႈဝႃႈ မႆႈယွၼ့် ၾႆးသျွတ်ႉၼႆဢေႃႈၼၼ့် ။  သၢႆၾႆးၸိူဝ်းၼႆႉၵဝ်ႇ ၼႃႇယဝ်ႉ။ ဢၼ်ၶၢတ်ႇ ဢၼ်ပွင်ႇၵေႃႈမီး။ သမ်ႉဢမ်ႇမႄးၸွမ်း ၼၼ်ႉၼႃႇ။  ” –  ဝႃႈၼႆ။

တီႈႁွင်ႈထႅဝ်ၼႆ့ ပဵၼ်ၵူၼ်းတၢင်ႇတီႈမႃးၶၢတ်ႇယူႇဝႆႉ။ ၽွင်းၾႆးမႆႈၼၼ်ႉ ပဵၼ်ၽွင်းၸဝ်ႈၶွင်ႁွင်ႈ ၵႂႃႇႁဵတ်းၵၢၼ်လႄႈ ၵူၼ်းတႄႉဢမ်ႇမီးလွင်ႈမၢတ်ႇၸဵပ်းလူႉတၢႆသေၵေႃႉ။ ၶူဝ်းၶွင်ႁိူၼ်းယေး ၶိူင်ႈၸႂ်ႉၶိူင်ႈသွႆ တႄ့ ဢမ်ႇတၼ်းလႆႈသင်   – လႆႈႁူႉၼင်ႇၼႆ။

ႁွင်ႈထႅဝ်ဢၼ်ၾႆးမႆႈၼႆႉပဵၼ် မၢႆႁိူၼ်း 120 ၸဝ်ႈၶွင်ပဵၼ် ၼၢင်းဢႃးလုၺ်ႇယႃႇ။  မိူဝ်ႈလဵဝ်ပလိၵ်ႈဢဝ်လိူင်ႈ ၸွႆးတြႃးဝႆ့ ဝႃႈၼႆ။

ၾၢႆႇၶႄၾႆးဝဵင်းမူႇၸေႊ ၵေႃ့ၼိုင်ႈသိုပ်ႇလၢတ်ႈဝႃႈ- “  ပေႃးၶႂ်ႈႁႂ်ႈမၼ်းလီတႄ့ သၢႆၾႆးဢၼ်လႂ်ဢမ်ႇလီ၊ ပလၢၵ့်ၾႆးဢၼ်လႂ်ဢမ်ႇၶႅမ့်ၵေႃႈ  တေလႆႈလၢႆႈၵမ်းလဵဝ်။ ဝႆ့မဝ်မၢင်ဢမ်ႇလႆႈ ။ပေႃးပဵၼ်မႃးၵေႃႈ မိူၼ် မိူဝ်ႈလဵဝ် ၼႆ့ၼႃႇ ဢမ်ႇတၼ်းလႆႈသင်။ ၾႆးမႆႈသေလူႉသုမ်းၵႂႃႇၼႆႉ ၵႃႈၶၼ်တေမီးမွၵ်ႈ   22 သႅၼ်ၼႆ့ၵႂႃႈ ” – ဝႃႈၼႆ။

ၾၢႆႇၶႄၾႆးဝဵင်းမူႇၸေႊ သင်ႇလၢတ်ႈၵူၼ်းမိူင်းဝႃႈ – “ ၼိုင်ႈပီၼိုင်ႈပွၵ်ႈ ၾၢႆႇၶႄၾႆး လူင်းပိုၼ့်တီႈ ပၼ်တၢင်းႁူႉလွင်ႈၽေးၾႆး လႄႈ ပၼ်ၾၢင့်ၵူၼ်းမိူင်းယူႇ ႁႂ်ႈၵႆ့ၸႅတ်ႈတူၺ်း သၢႆၾႆးၾႃ့၊ပလၢၵ့်ၾႆး ၊ပလၢၵ့်ၾႆးသဵပ်ႇယဝ့်ယႃႇလိုမ်းထွၼ်၊ ပေႃးဢွၵ်ႇၼွၵ်ႈႁိူၼ်းႁႂ်ႈ ပိၵ့်မဵင်းၾႆးၾႃ့လီငၢမ်းၸင်ႇဢွၵ်ႇ၊ပေႃးၾၢႆႇၶႄၾႆးၶဝ် ပၼ်ၾၢင့်ၵႆ့လၢတ်ႈၵႆ့သင်ႇ ၵူၼ်းမိူင်းသမ့် ဢမ်ႇသူႈႁဵတ်းၸွမ်း၊ထၢင်ႇဝႃႈမၼ်းပဵၼ်ၵၢၼ်လိူဝ်။ယဝ့်ၵေႃႈ ထုၵ်ႇလီ ဢွၼ်ၵၼ်သိုဝ့်ၼမ့်ယႃႈယႃမွတ်ႇၾႆး ၵိုၵ်းႁိူၼ်းယေးၽႂ်မၼ်းဝႆ့ၵူႈႁိူၼ်းၵူႈယေး” – ဝႃႈၼႆ။

ၽေးၾႆးမႆႈၼႂ်းမိူင်းတႆး ၼႂ်းပီ 2023 ၼႆ့ တီႈဝဵင်းမူႇၸေႊ ပဵၼ်ဢွၼ်တၢင်းသုတ်း။မိူဝ်ႈပီ 2022 ဢၼ်ပူၼ့်မႃးၼႆ့ၵေႃႈ ၵူၼ်းမိူင်းတႆး ထူပ်းၽေးၾႆးမႆႈပဵၼ်လၢႆလၢႆဝဵင်း မိူၼ်ၼင်ႇ လႃႈသဵဝ်ႈ၊ၵူတ့်ၶၢႆ၊တၢင့်ယၢၼ်း၊တႃႈၶီႈလဵၵ်း၊ၵဵင်းတုင် ၸဵမ်ၸိူဝ်းၼႆ့ ၵမ်ႈၼမ်ၾႆးမႆႈယွၼ့် ၵူၼ်းႁိူၼ်းၵူၼ်းယေး ၸႂ်ႉၾႆးၽိုၼ်း၊ၾႆးတဵၼ်း၊ၾႆးၾႃႉမဝ်မၢင်။