Wednesday, April 24, 2024

ၵူၼ်းသူၺ်ႇၺွင်ႇသွင်ၽူဝ်မေးၽိတ်းၵၼ် တႅင်းမေးတၢႆ ယဝ်ႉဢၢင်ႈၶႃႈတူဝ်တၢႆၶိုၼ်း

Must read

ၵူၼ်းၸၢႆးၵေႃ့ၼိုင်ႈတီႈဝဵင်းသူၺ်ႇၺွင်ႇ ၸႄႈတွၼ်ႈတူၼ်ႈတီး တႅင်းမေးၼၢင်းလူ့တၢႆသေ ၶိုင်ၶႃႈတူဝ်ၵဝ်ႇၶိုၼ်း။

မိူဝ်ႈဝၼ်းတီႈ 9/1/2023 ယၢမ်းၵၢင်ၶမ်ႈ 9 မူင်းၼၼ့် ၵူၼ်းၸၢႆးၵေႃ့ၼိုင်ႈတီႈဝဵင်းသူၺ်ႇၺွင်ႇ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း တႅင်းမေးၼၢင်းလူ့တၢႆသေ ၶိုင်ၶႃႈတူဝ်ၵဝ်ႇၶိုၼ်း ဢမ်ႇထိုင်တီႈတၢႆသေ လႆႈၶိုၼ်ႈႁူင်းယႃ။

- Subscription -

ၵူၼ်းပိုၼ့်တီႈ ၼၢင်းယိင်းဢႃယု 36 ပီ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “ ၸႂ်ႈဢေႃႈ မၼ်းၶိုၼ်းႁႅမ်မေးမၼ်းတၢႆၼႆတႄ့ၸႂ်ႈယူႇ။ ဢၼ်ဝႃႈ ႁႅမ်တၢႆၼႂ်းတီႈၼွၼ်းဢၼ်ဝႃႈၼၼ့်တႄ့ ဢမ်ႇၸႂ်ႈၶႃႈ ။ ၶဝ်ယူႇ ၼႂ်းဝၢင်း ႁွင်ႈထႅဝ်ၶႃႈႁၢပ်ႇၵၢၼ်ၶုၼ်(ဝုၼ်ႇထၢၼ်း) ၵူၼ်းသမ့်ၼမ်ၼႃႇၼေႃႈ။ မိူဝ်ႈၶဝ်ၽိတ်းမေႃးၵၼ်ၼၼ့် သမ့်ၵူဝ်ပိူၼ်ႈယိၼ်းသဵင်ၶႃႁႅင်းလႄႈ ဢွၵ်ႇၵႂႃႇထဵင်ၵၼ် ၾၢႆႇၼွၵ်ႈဝၢင်း ႁဵတ်းၼႆဢေႃႈၼၼ့်။ ၽိတ်းမေႃးၵၼ်ထိုင်တီႈ လုတ်ႈတိၼ်လုတ်ႈမိုဝ်းသေ ဢဝ်မိတ်ႈတႅင်းမေးမၼ်းဢေႃႈ ။မွၵ်ႈ 8 ၵမ်း 9 ၵမ်းၼႆ့ၵႂႃႈ။ၽိူဝ်ႇမေးမၼ်းတၢႆယဝ့်သမ့် တေၶိုၼ်းၼႅင်ၶိုၼ်း လၢႆလွင်ႈလၢႆလၢႆးသေ ၶိုၼ်းဢၢင်ႈႁႅမ်တူဝ်တၢႆၶိုၼ်းႁဵတ်းၼႆဢေႃႈ။မၼ်းပႆႇတၼ်းတၢႆ ပိူၼ်ႈသမ့်ဢွၵ်ႇမႃးတူၺ်းလႄႈ ႁၢမ်ႈမၼ်းဝႆ့ဢေႃႈ” ဝႃႈၼႆ။

ၵေႃႉဢၼ်တႅင်းမေးၼၢင်းတၢႆၼႆ့ ၸိုဝ်ႈႁွင့် ၵူဝ်ႇၸီႇတူႇ ဢႃယု 27 ပီ မေးမၼ်း ၸိုဝ်ႈႁွင့် မမျၢတ်ႉၼူဝ်း ဢႃယု 23 ပီ ၊ မီးလုၵ်ႈဢွၼ်ႇ  ဢႃယု 2 ၶူပ်ႇ ယူႇၼႂ်းဝၢင်းႁွင်ႈထႅဝ်ၵူၼ်းႁၢပ်ႇၵၢၼ်ၾၢႆႇႁွင်ႈမိူင်( ဆည်မြောင်း)၊ ဢၼ်မီးၸမ် တူဝ်းၵဵတ်ႉ ဢွင်ႇသပေႇ သဵၼ်ႈတၢင်းလူင်ၵႂႃႇမႃး တူၼ်ႈတီး- မိၵ့်ထိလႃႇ၊ ဝၢၼ်ႈဢွင်ႇသပေႇ ၊ဝဵင်းသူၺ်ႇၺွင်ႇ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း။

မိူဝ်ႈလဵဝ် ၵူၼ်းႁိမ်းႁွမ်း ၸွႆႈဢဝ်တူဝ် ၵူဝ်ႇၸီႇတူႇ သူင်ႇယူတ်းယႃတူဝ်ဝႆ့တီႈ ႁူင်းယႃလူင်ၸဝ်ႈၸၢမ်ႇထုၼ်း  ဝဵင်းတူၼ်ႈတီးၼၼ့်သေ ပူၼ့်ၶၢပ်ႈတူဝ် မမျၢတ်ႉၼူဝ်း မိူဝ်ႈဝႃး ဝၼ်းတီႈ10/1/2023။

ဢိင်ၼိူဝ်လွင်ႈၼႆ့သေ ၵူၼ်းပိုၼ့်တီႈ သိုပ်ႇလၢတ်ႈထႅင်ႈဝႃႈ – “ ဢၼ်ဝႃႈ ယွင်ႇယႃႈ ဝႃႇ သင်ႇဝႃႇတႄ့ၵေႃႈ ဢမ်ႇၸႂ်ႈၼင်ႇၵဝ်ႇ ဢၼ်တေသူႇတေၵိၼ်တႄ့ မီးၽွင်ႈယူႇၵႂႃႇၼေႃႈ။ၵူၼ်းၼုမ်ႇၵူၺ်းၼႃႇ။ၵူၺ်းၵႃႈ တူၺ်းတႄ့ ပႆႇၸႂ်ႈထိုင်တီႈယွင်ႇၼင်ႇၵဝ်ႇ။ ၶဝ်တေၽိတ်းမေႃးၵၼ်ယွၼ့် လွင်ႈၼႃႈႁိူၼ်းၵူၺ်းၶႃႈ။  ” – ဝႃႈၼႆ။

မိူၼ်ၼၼ်ၼင်ႇၵဝ်ႇမိူဝ်ႈဝၼ်းတီႈ15/12/2022 ၼၼ့်ၵေႃႈ သွင်ၵေႃ့မႄႈလုၵ်ႈ ဢၼ်ၺႃးၵႃးၽႃႇဝႆႉၼၼ်ႉ မိူဝ်းႁိူၼ်းၸဝ်ႈၵႃးသေ ယွၼ်းၵႃႈသၢႆႈတႅၼ်းလွင်ႈ ဢၼ်ၺႃးၵႃးၽႃႇတမ် ၊ ႁဵတ်းႁႂ်ႈၸဝ်ႈၵႃးၼၼ်ႉၸႂ်လမ်သေလမ်းၽၼ်းလႄႈ မၢတ်ႇၸဵပ်းႁႅင်းတင်းႁွင်ၵေႃႉမႄႈလုၵ်ႈ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း