မိူဝ်ႈၼႆႉ ဝၼ်းတီႈ 11/1/2023 ယၢမ်းၵၢင်ၼႂ်ၸဝ်ႉ ပီႈၼွင်ႉထႆး – တႆး ဢိၵ်ႇလူၺ်းတၢင်ႇၸၢဝ်းၶိူဝ်း ၼႂ်း 3 ၸႄႈဝဵင်း မိူၼ်ၼင်ႇ ၸႄႈဝဵင်းမိူင်းၾၢင်၊ မႄႈဢၢႆးလႄႈ ၶျႆးပၵၢၼ်း ႁူမ်ႈၵၼ် ပႂ်ႉႁပ်ႉတွၼ်ႈဝႆႈသႃ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ တီႈတၢင်းၶဝ်ႈ/ ဢွၵ်ႇ ဝဵင်းမိူင်းၾၢင် ၼႂ်းၸႄႈတွၼ်ႈၵဵင်းမႆႇ ၸိုင်ႈထႆး ႁူဝ်ၵူၼ်းၼပ်ႉႁဵင်။

ပႃႈၼၢင်းၶမ်း ၽူႈၶဝ်ႈႁူမ်ႈပႂ်ႉႁပ်ႉတွၼ်ႈဝႆႈသႃ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “လႆႈငိၼ်းဝႃႈ ၸဝ်ႈၶူးဝႃးပေႃႈ ႁဝ်းၶႃႈ တေလတ်းၽၢၼ်ႇမႃးတၢင်းမိူင်းၾၢင်ၼႆႉၼႆသေ ႁဝ်းၶႃႈ ဢွၼ်ၵၼ်မႃးပႂ်ႉႁပ်ႉတွၼ်ႈဝႆႈသႃ တင်ႈတႄႇ ယၢမ်းၵၢင်ၼႂ်ၸဝ်ႉ 5 မူင်း။ တေႃႇထိုင်ယၢမ်းလဵဝ် ၸဝ်ႈႁဝ်း ပႆႇႁွတ်ႈမႃးၶႃႈ။ တီႈၼႆႈတႄႉ မီးတၵ်ႉၵႃႇသတ်ႉထႃး မႃးပႂ်ႉဝႆႈသႃ ၼပ်ႉႁူဝ်ႁဵင်ၵိုၼ်းၶွၼ်ႈ လူင်ဝႆႉၶႃႈဢေႃႈ”- ဝႃႈၼႆ။

ယၢမ်းလဵဝ် ပီႈၼွင်ႉၵူၼ်းမိူင်းၾၢင် ဢွၼ်ၵၼ်ၸတ်းတီႈယူႇ တၢင်းၶဝ်ႈ/ဢွၵ်ႇ ဝဵင်းမိူင်းၾၢင်သေ ဢွၼ်ၵၼ်မႃးပႂ်ႉ ဝႆႈသႃ ၊ ၸတ်းဝႆႉပၼ်ပႃးတီႈၼင်ႈ တီႈသဝ်း တႃႇၶူးဝႃးၸဝ်ႈ သင်ဝႃႈတေမဵတ်ႉတႃႇထမ်းတြႃးပၼ် တၵ်ႉၵႃႇသတ်ႉထႃး ၸိူဝ်းၼႆႉ။

“ႁဝ်းၶႃႈ လႆႈငိၼ်းဝႃႈတႄႉ ၸဝ်ႈၶူးဝႃးပေႃႈ တေလုၵ်ႉတၢင်းၵဵင်းႁၢႆး ၶဝ်ႈမႃးတၢင်း ဢိူင်ႇတႃႈတွၼ်း – မႄႈဢၢႆး – မိူင်းၾၢင်ၼႆႉ ယဝ်ႉၵေႃႈ တေပၢင်းၸဝ်ႈႁဝ်း မဵတ်ႉတႃႇတြႃး တီႈမိူင်းၾၢင်ၼႆႉၶႃႈ။ တေႃႇထိုင်ယၢမ်းလဵဝ် ၶူးဝႃးပေႃႈတႄႉ ပႆႇႁွတ်ႈမႃးထိုင်ၶႃႈ”- ၽူႈၶဝ်ႈႁူမ်ႈ ပႂ်ႉဝႆႈသႃ ၵူၼ်းမိူင်းၾၢင် ၵေႃႉၼိုင်ႈလၢတ်ႈ။

ဝၼ်းၵိူတ်ႇ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ၶွပ်ႈတဵမ် 60 ပီ ၸတ်းႁဵတ်းတီႈဝတ်ႉၽရႃႉထၢတ်ႈသီႊၻွၼ်ႊရိူင်ႊ (ဝတ်ႉသီတွၼ်းႁိူင်း) ဢိူင်ႇမိူင်းၽူင်း ဝဵင်းတႃႈၶီႈလဵၵ်း ၼႂ်းဝၼ်းတီႈ 4 ထိုင် ဝၼ်းတီႈ 6။ တီႈပၢင်ဝၼ်းၵိူတ်ႇၼၼ်ႉ ၸတ်းပႃး ပၢင်တၢင်ႇထီးထၢတ်ႈပုတ်ႉထၵႃႇယႃႇ မိူင်းၽူင်း။ ဝၢႆးၼၼ်ႉ ဝၼ်းတီႈ 7/1/2023 ၶူးဝႃးၸဝ်ႈ ယေႃးမုၼ် ၶဝ်ႈၵႂႃႇမဵတ်ႉတႃႇထမ်း တီႈဝတ်ႉၽရႃႉထၢတ်ႈဝဵင်းၵႅဝ်ႈ ၸႄႈဝဵင်းၵဵင်းသႅၼ် ၸႄႈတွၼ်ႈၵဵင်းႁၢႆး ။

ၸဝ်ႈၶူးလူင် ၺႃႇၼသီရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈၵိင်ႇၽႄ ငဝ်ႈငုၼ်းမုၵ်ႉၸုမ်းလူင် သင်ႇၶႃႇ ၸိုင်ႈတႆး ပွတ်း ဢွၵ်ႇၶူင်း လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး တွၼ်ႈၵၢင်ၼႂ်ၸဝ်ႉတႄႉ ၶူးဝႃးပေႃႈ တိုၵ်ႉမီးဝႆႉတီႈ ဝဵင်းၵဵင်းသႅၼ်ယူႇ။ ပေႃးယဝ်ႉ တေ သိုပ်ႇၵႂႃႇတၢင်းမႄႈသလွင်း။ ပေႃးယဝ်ႉတီႈ မႄႈသလွင်းယဝ်ႉ တေသိုပ်ႇၵႂႃႇတၢင်းလႂ်တႄႉ ပႆႇႁူႉၶေႃႈမုလ်းတႅတ်ႈတေႃး။ ၵူၺ်း ၵႃႈ တီႈၵုင်းထဵပ်ႈတႄႉ တေပူၼ်ႉၵႂႃႇ ၵူတ်ႇပၢႆးယူႇလီ ၶူးဝႃးပေႃႈယူႇ”- ဝႃႈၼႆ။

ၸဝ်ႈသိလ်ထမ်း ၶူးဝႃးဝုၼ်းၸုမ်ႉၼႆႉ ၵိူတ်ႇမိူဝ်ႈဝၼ်းတီႈ 5/1/1965 ၸႃတိတီႈၵိူတ်ႇပဵၼ်ဝၢၼ်ႈ မႄႈၶမ်းၼွင်မူဝ် ဢိူင်ႇမႄႈ ၶမ်း ၸႄႈဝဵင်းမႄႈၸၼ်း ၸႄႈတွၼ်ႈၵဵင်း ႁၢႆး။ ပဵၼ်လုၵ်ႈပေႃႈ သႅင်လႃႈလႄႈ မႄႈၶမ်းလႃႈ။ ၽွင်းဢႃယုၸဝ်ႈ 4 ပီ ထိုင် 10 ပီၼၼ်ႉ လႆႈၶဝ်ႈႁူင်း ႁဵၼ်းထႆး။ ထိုင်မႃး ဢႃယု 11 ပီ ၼၼ်ႉ ၶိုၼ်ႈပဵၼ် ၸဝ်ႈသၢင်ႇ၊ ဢႃယု 12 ပီ တၵ်ႉ ၵႃႇသတ်ႉထႃး ဢိူင်ႇ မိူင်းၽူင်း ၸႄႈဝဵင်းတႃႈၶီႈလဵၵ်း ၸင်ႇၵႂႃႇယိုၼ်ႈမွၵ်ႇ ယေႃးၸဝ်ႈ မႃးပူၵ်းပွင် သႃသၼႃတီႈဝတ်ႉ ၽရႃႉထၢတ်ႈသီႊတွၼ်ႊရိူင်း (သီရိတွၼ်းႁိူင်း) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း တေႃႇထိုင်ဝၼ်းမိူဝ်ႈ ၼႆႉ။