ၽူႈၸၢႆးၼုမ်ႇၵေႃႉၼိုင်ႈဢႃယုမွၵ်ႈ 30 ပီ ၵူၼ်းမိူင်းဝဵင်းသႅၼ်ဝီ ၵိၼ်လဝ်ႈမဝ်းသေ ၽိတ်းမေႃးမေးၼၢင်းမၼ်း၊ ၽွင်းၵေႃႉပဵၼ်ပေႃႈ ၶဝ်ႈႁၢမ်ႈၼၼ်ႉ ဢဝ်မိတ်ႈ/ၽႃႉဝႅင်း ၽၼ်းတႅင်းၵေႃႉပဵၼ်ပေႃႈ လူႉတၢႆထင်တီႈ။
ဝၼ်းတီႈ 26/12/2022 မိူဝ်ႈဝႃး ယၢမ်းႁူဝ်ၶမ်ႈ ဝၢႆးဝၼ်း 5 မူင်းၶိုင်ႈ ၸၢႆးဢွင်ႇၵျေႃႇ ဢႃယု 30 ပီ ၵူၼ်းဝၢၼ်ႈၼႃးမႅင်း ဢိူင်ႇမိူင်းပႃး ၸႄႈဝဵင်းသႅၼ်ဝီ ၵိၼ်လဝ်ႈမဝ်းသေပွၵ်ႈၶိုၼ်းႁိူၼ်း၊ ထဵင်မေႃးၵၼ်တင်းမေးၼၢင်းမၼ်းလွင်ႈၵႂႃႇပွႆးပၢင်ၶႅၵ်ႇ၊ ၽွင်းပေႃႈမၼ်းၶဝ်ႈႁၢမ်ႈၼၼ်ႉ ၸၢႆးဢွင်ႇၵျေႃႇ ဢဝ်ၽႃႉဝႅင်းတီႈႁိူၼ်းၶဝ်သေ ၽၼ်းတႅင်းၵေႃႉပဵၼ်ပေႃႈ တၢႆထင်တီႈ။
ၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“မၼ်းၽၼ်းတႅင်းပေႃႈမၼ်းတၢႆထင်တီႈၼၼ်ႉယဝ်ႉၶႃႈ။ ဝၢႆးႁေပေႃႈမၼ်းတၢႆၵေႃႈ မၼ်းၵေႃႈလႅၼ်ႈပၢႆႈသေႁၢႆတူဝ်ဝႆႉၶႃႈဢေႃႈ။ ”- ဝႃႈၼႆ။
ၸၢႆးဢွင်ႇၵျေႃႇၼႆႉ ပဵၼ်ၵူၼ်းမၵ်ႉလဝ်ႈ။ ပေႃးၵိၼ်လဝ်ႈမဝ်းယဝ်ႉ လိူတ်ႈႁၢႆႉ ၸၢင်ႈမေႃၽိတ်းမေႃးပိူၼ်ႈ။ ပေႃႈလႄႈမေးမၼ်းႁၢမ်ႈၵႂႃႇပွႆးပၢင်ၶႅၵ်ႇ ၊ ၵူဝ်ၵိၼ်လဝ်ႈမဝ်းဢမ်ႇႁူႉတူဝ်သေ ၵူဝ်သၢင်ႈပၼ်ႁႃမႃးလႄႈထိုင်တီႈလႆႈၽၼ်းတႅင်းပေႃႈမၼ်းတၢႆ ။
တေႃႇထိုင်ယၢမ်းလဵဝ် ၾၢႆႇပလိၵ်ႈမၢၼ်ႈတႄႉဢမ်ႇသႂ်ႇၸႂ်ႁႃပၼ်ၸၢႆးဢွင်ႇၵျေႃႇ၊ ၸဝ်ႈၼႃႈတီႈၾၢႆႇ SSPP/SSA တႄႉမႃးတွင်ႈထၢမ် သေ လၢတ်ႈဝႃႈတေၸွႆႈႁႃတူဝ်တီႉၺွပ်းမႃးပၼ်တူတ်ႈတၢမ်ႇယူႇဝႃႈၼႆဝႆႉ။
ၸၢႆးဢွင်ႇၵျေႃႇၼႆႉ ပဵၼ်ၵူၼ်းၼုမ်ႇႁဵတ်းၵၢၼ်ႁႃၵိၼ်လဵင်ႉတွင်ႉၼႂ်းပိုၼ်ႉတီႈဝၼ်းလႂ်ဝၼ်းၼၼ်ႉ။ မေးၼၢင်းၸိုဝ်ႈ ၼၢင်းၶမ်းၶၢင်ႉ ဢႃယု 20 ပၢႆ။ ၸိုဝ်ႈပေႃႈ ႁွင်ႉလုင်းၶႅင်ႇ ဢႃယု 60 ပီ ။
