မိူဝ်ႈၼႆ့ ဝၼ်းတီႈ 20/12/2022 ႁၼ်ၵူၼ်းဢမ်ႇႁူ့ၸိုဝ်ႈ ၵေႃ့ၼိုင်ႈ ဢႃယု မွၵ်ႈ 30 ပၢႆ တၢႆဝႆႉၶၢင်ႈတၢင်း တီႈၼႂ်းဝဵင်းမူႇၸေႊ ၸိုင်ႈတႆးပွတ်းႁွင်ႇ။
ၸုမ်းၸွႆႈတူင်ႇဝူင်းၵူၼ်း မူႇၸေႊ(နှလုံးလှ လူမှုကူညီရေး) လၢတ်ႈတီႈ ၽူႈတွႆႇႁွၵ်ႈဝႃႈ-“ ၸႂ်ႈဢေႃႈ တၢႆယူႇတီႈၶႅပ်ႇတၢင်း မင်ႇၵလႃႇမူႇၸေႊ ပုၼ့်ဢေႃႈ။ တေလႆႈဝႃႈ သဵၼ်ႈတၢင်းလဵပ်ႈဝဵင်း (မြို့ပတ်လမ်း)ဝဵင်းၼၼ့်ယဝ့်။ တီႈတူဝ်မၼ်းၵေႃႈ ဢမ်ႇမီးၶူဝ်းၶွင်သင် ။ မိူၼ်ပိူၼ်ႈဢဝ်မႃးပႅတ်ႈဝႆ့ ႁဵတ်းၼႆၼေႈ ။ ၵူၺ်းဝႃႈဢမ်ႇႁူႉလွင်ႈတၢင်းမၼ်းလီလီ။ ႁဝ်းပဵၼ်ၵူၼ်းၸွႆႈတူင်ႇဝူင်းၵူၼ်းၵေႃႈ လူဝ်ႇလႆႈၸွႆႈၵူၺ်းၼႃႇၼေႃႈ။ ၸွမ်းတူဝ်မၼ်းၵေႃႈ ဢမ်ႇႁၼ်မီးႁွႆးၸဵပ်းသင် တေဝႃႈထုၵ်ႈၶႃႈႁႅမ်ၵေႃႈ။ တူၺ်းတႄ့ လႅပ်ႈၵိၼ်ယႃႈၵိၼ်ၾိၼ်ႇယူႇ လႅပ်ႈပဵၼ်ၵူၼ်းၸၢဝ်းၶႄႇၼေႈ တူၺ်းၼႃႈတႃတႄ့”- ဝႃႈၼႆ။
ၼႂ်းပီ 2022 ၼႆ့ ၵူၼ်းသူႇသမ်းၵိၼ်ယႃႈ ၸိူဝ်းဢမ်ႇႁူႉၸိုဝ်ႈ ဢမ်ႇမီးပီႈၼွင်ႉ ၼႂ်း ဝဵင်းမူႇၸေႊ လႄႈ ဝဵင်းလႃႈသဵဝ်ႈ တၢႆၼမ် ဢမ်ႇယွမ်း 40 ၵေႃႉ။
ၸုမ်းၸွႆႈတူင်ႇဝူင်းၵူၼ်း မူႇၸေႊ(နှလုံးလှ လူမူ့ကူညီရေး) လၢတ်ႈၼႄထႅင်ႈဝႃႈ -“ ၼႂ်းမူႇၸေႊ ၼႆ့ ၵူၼ်းတၢႆၶၢင်ႈတၢင်း ၵႆႉမီးၼႃႇယဝ်ႉတလဵဝ်။ၵမ်ႈၼမ်တႄ့ ၵိၼ်လဝ်ႈၵိၼ်ယႃႈ မဝ်းသေ ၼွၼ်းၸွမ်းတၢင်းၵၢင်တၢင်းႁေ ၸပ်းၵတ်းတၢႆၵေႃႈမီး ၶီႈယႃႈၶီႈၾိၼ်ႇမၢင်ၵေႃ့ၵေႃႈ ဢမ်ႇလႆႈၵိၼ်တၢင်းၵိၼ်ဢၼ်မီး ဢႁႃႇရ ၶၢတ်ႇဢႁႃရသေ ဢမ်ႇမီးႁႅင်းသေ တၢႆပႅတ်ႈၸိူဝ်းၼႆ့ၵေႃႈမီးယဝ့် ”-ဝႃႈၼႆ။
ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃးၼႆ့ ၽူႈလၵ့်ၸၵ့်ၶုတ်ႈၵေႃႈ ၼမ်လိူင်ႇ ၵူၼ်းသူႇသမ်းၵိၼ်ယႃႈၵေႃႈ လိူင်ႇၽႄႈ ။ၼႂ်းလိူၼ် ၼူဝ်ႊဝႅမ်ႊပိူဝ်ႊလႄႈ တီႊသိမ်ႊပိူဝ်ႊၼႆ့ ၵူၺ်း တီႈဝဵင်းမူၸေႊၼႆ့ မီးၵူၼ်းတၢႆဢမ်ႇႁူႉၸိုဝ်ႈ 4 ၵေႃ့။
