ႁိူၼ်းၵူၼ်းဝၢၼ်ႈလင်ၼိုင်ႈ တီႈဝဵင်းပၢင်လူင်မီးၵူၼ်းၶဝ်ႈလၵ်ႉ ၽွင်းၸဝ်ႈႁိူၼ်းဢမ်ႇယူႇ သုမ်းငိုၼ်း 50 သႅၼ်ပၢႆ  ၽူႈလၵ်ႉလိူင်ႇၼမ်လႄႈ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ။

ဝၼ်းတီႈ 14/12/2022 ယၢမ်းၵၢင်ဝၼ်း ႁိူၼ်းၵူၼ်းဝၢၼ်ႈ ပွၵ်ႉ 4 ၼွင်လႅင် ၼႂ်းဝဵင်းပၢင်လူင် ၸႄႈဝဵင်း လွႆလႅမ် ၸိုင်ႈတႆးပွတ်းၸၢၼ်းလင်ၼိုင်ႈ ထုၵ်ႇၵူၼ်းၶဝ်ႈလၵ်ႉသွၵ်ႈတဝ် ၼႂ်းႁိူၼ်းယေး လႆႈၵႂႃႇၶူဝ်းငိုၼ်း ၶမ်း 50 သႅၼ်ပၢႆ ၼႆယဝ်ႉ။  

ၵူၼ်းပိုၼ်ႉတီႈ ဝဵင်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ -“ တီႈႁိူၼ်းၼၼ်ႉ မီးသွင်ၽူဝ်မေး ပဵၼ်ၵူၼ်း ၼုမ်ႇ။ ထုၵ်ႇၵူၼ်းၶဝ်ႈလၵ်ႉၶူဝ်းႁိူၼ်းၶဝ် ၽွင်းၵၢင်ဝၼ်း လႆႈၵႂႃႇသင်လၢႆလၢႆတႄႉဢမ်ႇႁူႉ။ လႆႈႁူႉဝႃႈ သုမ်းၵႂႃႇတင်း မူတ်းၶၼ်ငိုၼ်း 50 သႅၼ်ပၢႆ။ လႅပ်ႈတေပဵၼ် ၶူဝ်းငိုၼ်းၶမ်း ၸိူဝ်းၼႆႉ။ ၽွင်းမိူဝ်ႈၸဝ်ႈႁိူၼ်းဢမ်ႇယူႇ တိုၵ်ႉၵႂႃႇႁဵတ်းၵၢၼ်တၢင်းၼွၵ်ႈၼႆၶႃႈ။ ၽူႈလၵ်ႉၸၵ်ႉၶုတ်ႈၼႆႉ ၼမ်ႁႅင်း ၼႃႇၶႃႈ တီႈဝဵင်းပၢင်လူင်ၼႆႉ။ ပလိၵ်ႈသိုၵ်းမၢၼ်ႈ ၸိူဝ်းၼႆႉ ၶဝ်ဢမ်ႇသႂ်ႇၸႂ်သင် လွင်ႈၸိူဝ်းၼႆႉ ၶဝ်တင်ႈၸႂ်ပွႆႇႁႂ်ႈမၼ်း လိူင်ႇ ၼမ်ထႅင်ႈ ၵူၺ်းဢေႃႈ”- ဝႃႈၼႆ။

ယၢမ်းလဵဝ် ၼႂ်းဝဵင်းပၢင်လူင်ၼႆႉ သင်ဝႃႈတေဢွၵ်ႇႁိူၼ်းဢမ်ႇမီးၵူၼ်းပႂ်ႉႁိူၼ်းတိုၼ်းဢမ်ႇလႆႈ။ ရူတ်ႉၶိူင်ႈ ရူတ်ႉၵႃးၵေႃႈ ပေႃးၵႂႃႇၵိုတ်းတၢင်းၼွၵ်ႈ ဢမ်ႇၼၼ်ၶၢဝ်းယၢမ်းၵၢင်ၶိုၼ်း တၵ်းလႆၶတ်းသေႃးႁူဝ်ရူတ်ႉဝႆႉလီလီ ။ ယွၼ်ႉဝႃႈၸုမ်းၽူႈလၵ်ႉၼႆႉ ၶဝ်လႅတ်းဝႆးၼႃႇ ဝႃႈၼႆ။

“တေႃႈလဵဝ် ၵူၼ်းလၵ်ႉၼႆႉ ၼမ်ႁႅင်းၼႃႇ ၵူၼ်းဢွၵ်ႇၶွၵ်ႈၵေႃႈၼမ်ၼႃႇယဝ်ႉၶႃႈ။ၶဝ်ၸိူဝ်းၼၼ်ႉၶႅၼ်းမေႃလၵ်ႉၸေးၶႃႈယဝ်ႉ။ မိူၼ်ၵႂႃႇၶိုၼ်ႈပၢင်သွၼ်ၼႂ်းၶွၵ်ႈသေ ဢွၵ်ႇမႃးၵူၺ်းၶႃႈ။ ၽူႈလၵ်ႉၼႆႉ ၶႂ်ႈဝႃႈမီးၵူႈ ၵိဝ်ႇယဝ်ႉ ၼႂ်းဝဵင်းပၢင်လူင်ၼႆႉ။ ၶဝ်တေမီးပဵၼ်ၸုမ်းဢေႃႈ။ လွင်ႈႁူမ်ႇလူမ်ႈဢုၼ်ႇၸႂ် ၵူၼ်းမိူင်းတႄႉ ဢမ်ႇမီးသင်ယဝ်ႉၶႃႈ”- ဝႃႈၼႆ။

ထႅင်ႈၾၢႆႇၼိုင်ႈ ပၵ်းပိူင်ဝၢၼ်ႈမိူင်းၵေႃႈ ဢမ်ႇသုမ်ႇငမ်းထိုင်ၵူၼ်းမိူင်း။  ပေႃးတီႉလႆႈၽူႈလၵ်ႉ ဢဝ်ၵႂႃႇယဵတ်ႈၶွၵ်ႈ 3 လိူၼ် ဢမ်ႇၼၼ် 6 လိူၼ်သေပွႆႇဢွၵ်ႇမႃးၶိုၼ်း ႁဵတ်းႁႂ်ႈၽူႈလၵ်ႉဢမ်ႇၵူဝ်ၵိၼ်မၢႆမီႈဝၢၼ်ႈမိူင်းၵူၺ်းယဝ်ႉဝႃႈၼႆ။  

ၽူႈတူင်ႉၼိုင် ၼႂ်းတူင်ႇဝူင်းၵူၼ်း ဝဵင်းလွႆလႅမ် လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်တၢမ်ႇၶွၵ်ႈလၢႆလၢႆၵူၺ်း ဢမ်ႇမီးတၢမ်ႇငိုၼ်းသင်။ ၵွပ်ႈၼႆလႄႈ ၽူႈလၵ်ႉၼၼ်ႉ သင်ၶဝ်ဢွၵ်ႇမႃးၵေႃႈ မႃးလၵ်ႉမႃးႁဵတ်း ထႅင်ႈ ၵူၺ်း။ သင်ပဵၼ်လႆႈတႄႉ  မႄးမၢႆမီႈဝၢၼ်ႈမိူင်း၊ ၽူႈလၵ်ႉၵူၼ်းၸူၼ်ၼႆႉ လူဝ်ႇပၼ်တၢမ်ႇၼၵ်းၼၵ်း။ ႁႂ်ႈၶဝ်ၵေႃးလၢပ်ႇ၊ ယႃႇႁႂ်ႈၶဝ်မႃးႁတ်းႁဵတ်းထႅင်ႈ။ ႁႂ်ႈမူၼ်ႉမႄးပၼ် တၢင်းယၢမ်ႈႁႂ်ႈလီ ။ လွင်ႈပိူင်ပဵၼ် ၸိူင်ႉ ၼင်ႇၼႆၼႆႉ မၼ်းယူႇတီႈ ပလိၵ်ႈၽူႈမီးပုၼ်ႈၽွၼ်းၵူၺ်း လူဝ်ႇၸတ်းၵၢၼ်ပၼ်”- ဝႃႈၼႆ။

ဢိင်ၼိူဝ်ပၢႆးမၢၵ်ႈမီးတူၵ်း၊ ႁႃၵိၼ်လဵင်ႉတွင်ႉယၢပ်ႇလႄႈၵူၼ်းၼုမ်ႇဝဵင်းပၢင်လူင် ဢွၼ်ၵၼ်ၶဝ်ႈမိူင်းထႆး ႁဵတ်းၵၢၼ်ႁႃငိုၼ်းသူင်ႇလဵင်ႉတၢင်းႁိူၼ်းတၢင်းယေး။  တၢင်းႁိူၼ်းသမ်ႉၵိုတ်းၵူၼ်းထဝ်ႈၵူၼ်းၵႄႇၵူၺ်းလႄႈ သင်ဝႃႈ ဢွၵ်ႇႁိူၼ်းၵႂႃႇၵၢတ်ႇ ၵႂႃႇသူၼ် ၵႂႃႇဝတ်ႉဝႃးၽႃသိူဝ်ႇၵေႃႈႁႂ်ႈလႆႈၶတ်းသေႃးၽၵ်းတူလီလီ  ဢမ်ႇၼၼ် တၵ်းလႆႈမီးၵူၼ်းပႂ်ႉႁိူၼ်း တင်ႇတေလႆႈတမ်းၸႂ် – ၵူၼ်းပၢင်လူင်လၢတ်ႈၼင်ႇၼႆ။

ႁၢင်ပီ 2022 ၼႆႉ ၼႂ်းဝဵင်းပၢင်လူင် ႁိူၼ်းယေးၵူၼ်းဝၢၼ်ႈ ထုၵ်ႇၵူၼ်းၶဝ်ႈလၵ်ႉ ယႃႉသွၵ်ႈတဝ်ၼႂ်းႁိူၼ်းမႃးၶိူဝ်းယႂ်း။ ယဝ်ႉၵေႃႈ ၵူၼ်းလွၵ်ႉငိုတ်ႈ သူင်ႇလိၵ်ႈ ၼႂ်းၾူၼ်း ၸူးၽူႈမၢၵ်ႈမီး ၸဝ်ႈၶွင်ႁၢၼ်ႉၶၢႆၶူဝ်းၵုၼ်ႇ ၸိူဝ်းၼႆႉၵေႃႈ ၼမ်။ ၵူၼ်းမိူင်း ထုၵ်ႇတီႉ ၺွပ်း ဢဝ်ပဵၼ်တူဝ်ယိူဝ်ႇသေ ၶႃႈႁႅမ်တၢႆ ၸိူဝ်းၼႆႉၵေႃႈ မီး။