မၢၵ်ႇတႅၵ်ႇႁိမ်းတူဝ်းၵဵၵ်ႉ တၢင်းၶဝ်ႈဢွၵ်ႇ ဝဵင်းၵျွၵ်ႉမႄး 3 လုၵ်ႈ တႅၵ်ႇတိူဝ်ႉသႂ်ႇ သိုၵ်းမၢၼ်ႈ ၸၼ်ႉႁူဝ်ႁၢၼ် ၵေႃႉၼိုင်ႈ မၢတ်ႇၸဵပ်း လွင်ႈလူႉတၢႆဢမ်ႇမီး ဝႃႈၼႆ။
ဝၼ်းတီႈ 26/03/2018 ယၢမ်းၵၢင်ၶိုၼ်း 11:30 မူင်းပၢႆၼၼ်ႉ မၢၵ်ႇတႅၵ်ႇႁိမ်းၵဵၵ်ႉ (Oriental Highway Toll Gate) သဵၼ်ႈတၢင်း ၵျွၵ်ႉမႄး- သီႇပေႃႉ ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ တႅၵ်ႇတိူဝ်ႉသႂ်ႇ သိုၵ်းမၢၼ်ႈ ၵေႃႉ ၼိုင်ႈ ၼႂ်းၸုမ်းၽဵဝ်ႈမၢၵ်ႇ လႆႈမၢတ်ႇၸဵပ်း တီႈႁူဝ်မႃႇ ဝႃႈၼႆ။
ဢူးတိၼ်ႇမွင်ႇတဵင်း ၸုမ်းၸွႆႈထႅမ်ၵူၼ်းထူပ်းၽေးသိုၵ်း ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ မၢၵ်ႇတႅၵ်ႇ 3 လုၵ်ႈ။ လုၵ်ႈဢွၼ်တၢင်းသုတ်းတႄႉ တႅၵ်ႇႁႅင်းၼႃႇ၊ ၽိူဝ်ႇလႆႈငိၼ်းသဵင်ယဝ်ႉ ၸဝ်ႈၼႃႈတီႈၽူႈမီး ပုၼ်ႈ ၽွၼ်းၶဝ် ဢွၼ်ၵၼ်ၵႂႃႇၵူတ်ႇထတ်းတူၺ်း။ ယူႇဢမ်ႇႁိုင်သင် မၢၵ်ႇၼႆႉ တႅၵ်ႇထႅင်ႈလုၵ်ႈၼိုင်ႈ ယဝ်ႉလုၵ်ႈၼိုင်ႈ ၽွင်းၶဝ် တိုၵ်ႉၵူတ်ႇထတ်းယူႇၼၼ်ႉ မၢၵ်ႇတႅၵ်ႇၵႂႃႇ 3 လုၵ်ႈ။ ၸၢၵ်ႇမၢၵ်ႇ တိူဝ်ႉသႂ်ႇသိုၵ်းမၢၼ်ႈ ၸၼ်ႉႁူဝ်ႁၢၼ် တီႈႁူဝ်မႃႇမၼ်းၾၢႆႇသၢႆႉ။ ၵူၺ်းၵႃႈ ဢမ်ႇထိုင်တီႈမႆႈၸႂ် လွင်ႈၵူၼ်းလူႉတၢႆၵေႃႈ ဢမ်ႇမီး” ဝႃႈၼႆ။
မၢၵ်ႇၼႆႉ ပဵၼ်ၼမ်ႉမိုဝ်းၽႂ်ၼႆ ၾၢႆႇပလိၵ်ႈမၢၼ်ႈပႆႇပိုၼ်ၽၢဝ်ႇပဵၼ်တၢင်းၵၢၼ်သေတႃႉ လၢမ်းၶၢတ်ႈဝႃႈ လႅပ်ႈတေ ပဵၼ် ၸုမ်းယိပ်းၵွင်ႈၵၢင်ႇသေ ၸုမ်းၸုမ်း ႁၢင်ႈဝႆႉ ဢၢၼ်းတဵၵ်းႁႂ်ႈတႅၵ်ႇသႂ်ႇၸဝ်ႈၼႃႈတီႈဢၼ်မႃး ၽဵဝ်ႈလၢင်ႉမၢၵ်ႇ။ ပဵၼ်မၢၵ်ႇဢၼ်ႁဵတ်းဢဝ်ႁင်းၵူၺ်း။ ၾၢႆႇၸဝ်ႈၼႃႈတီႈမၢၼ်ႈထတ်းသၢင်ဝႃႈ ၾၢႆႇၸုမ်းယိပ်းၵွင်ႈၵၢင်ႇ ၸႂ်ႉတိုဝ်းလွၵ်း လၢႆး ၶိုတ်းၸၼ်ႉမႃး ဝႃႈၼႆ။
မၢၵ်ႇတႅၵ်ႇ 3 လုၵ်ႈၼႆႉ မၢၵ်ႇလုၵ်ႈဢွၼ်တၢင်း ပဵၼ်မၢၵ်ႇတႃႇသူင်ႇသဵင်၊ မၢၵ်ႇ 2 လုၵ်ႈဢၼ်တႅၵ်ႇတၢင်းလင်ၼႆႉတႄႉ တိုၼ်းတင်ႈၸႂ်ႁႂ်ႈတုမ်ႉတိူဝ်ႉ ၸဝ်ႈၼႃႈတီႈၵူၼ်းၽဵဝ်ႈမၢၵ်ႇၼၼ်ႉ ဝႃႈၼႆ။
တၢင်းပွတ်းတွၼ်ႈၼၼ်ႉ မီးတပ်ႉသိုၵ်းလူင်ပွင်ၸိုင်ႈမၢၼ်ႈ၊ သိုၵ်း TNLA၊ သိုၵ်း SSPP/SSA လႄႈ သိုၵ်း RCSS/SSA ၶဝ်တူင်ႉၼိုင်ဝႆႉ။
တၢင်းပွတ်း ဝၢၼ်ႈၵုၼ်ၵေႃႇ တင်းဝၢၼ်ႈတေႃႉၽေႇ ၼၼ်ႉၵေႃႈ သိုၵ်း TNLA တင်း သိုၵ်း RCSS ပဵၼ်ပၢင်တိုၵ်းၵၼ် ႁၢဝ်ႈႁႅင်း ႁဵတ်းႁႂ်ႈၵူၼ်းမိူင်း 200 ပၢႆ လႆႈဢွၼ်ၵၼ်ပၢႆႈၽေးသိုၵ်း မႃးသွၼ်ႈဝႆႉတီႈ ဝတ်ႉဝိႁၢရ်ဢွင်ႇမင်ႇၵလႃႇ ၸႄႈဝဵင်းၵျွၵ်ႉမႄး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ