ၽူႈယိင်း ဢႃယု 39 ပီ ၵေႃႉၼိုင်ႈ ၵႂႃႇပိတ်းၼဵင်ႈၼႂ်းသူၼ်သေ ယဵပ်ႇၺႃးမၢၵ်ႇတႅၵ်ႇ လႆႈလူႉတၢႆထင်တီႈ ၼႂ်းၸႄႈဝဵင်း ၵျွၵ်ႉမႄး ဝႃႈၼႆ။

ဝၼ်းတီႈ 18/03/2018 ယၢမ်းၵၢင်ၼႂ် ၼၢင်းဢေးႁၢၼ်ႇ ဢႃယု 39 ပီ (ၸၢဝ်းတဢၢင်း) ယူႇဝၢၼ်ႈတေႃႇၽေႇ ၵႂႃႇပိတ်းၼဵင်ႈတီႈ ၼႂ်းသူၼ် သေ ယဵပ်ႇၺႃးမၢၵ်ႇတႅၵ်ႇ တီႈၼႂ်းသူၼ် ဢၼ်ယၢၼ်ၵႆတၢင်း ဝၢၼ်ႈတေႃႉၽေႇ 15 မိၼိတ်ႉ မီးၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ဝႃႈၼႆ။

ၸၢႆးထုၼ်းၺၢၼ်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ( 2) ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇ ႁွၵ်ႈဝႃႈ “ ပဵၼ်ၼၢင်းယိင်းၵေႃႉၼိုင်ႈ တိူဝ်ႉမၢၵ်ႇၼႂ်းသူၼ်ၼဵင်ႈသေ လႆႈတၢႆထင်တီႈၵႂႃႇ၊ တၢင်းပွတ်းတွၼ်ႈၼၼ်ႉ မိူဝ်ႈ ပူၼ်ႉမႃး မၼ်းမီးပၢင်တိုၵ်း TNLA တင်း RCSS ပေႃးဝႃႈ ပဵၼ်ပၢင်တိုၵ်းၼႆၵေႃႈ ၸုမ်းယိပ်းၵွင်ႈၵၢင်ႇ ႁၢင်ႈမၢၵ်ႇဝႆႉၵေႃႈတေမီး” ဝႃႈၼႆ။

ၵဵဝ်ႇၵပ်းလွင်းၼႆႉ ယူႇတီႈၸိူဝ်ႉၶိူဝ်းပီႈၼွင်ႉ ၽူႈယိင်းၵေႃႉလႆႈလူႉတၢႆၼၼ်ႉ ဢွၼ်ၵၼ်လုမ်းလႃး ပူၼ်ႉၶၢပ်ႈတူဝ် မၼ်းၼၢင်းၵႂႃႇ မိူဝ်ႈဝၼ်းတီႈ 19/03/2018 ဝႃႈၼႆ။

တႄႇဢဝ်ႁူဝ်လိူၼ်မၢတ်ႊၶျ်ၼႆႉမႃး တပ်ႉသိုၵ်း TNLA တင်း RCSS/SSA လႆႈပဵၼ်ပၢင်တိုၵ်းၵၼ် တၢင်းပွတ်း ဝၢၼ်ႈၵုၼ်ၵေႃႇ၊ ဝၢၼ်ႈတေႃႉၽေႇ ၸႄႈဝဵင်းၵျွၵ်ႉမႄး ႁၢဝ်ႈႁႅင်း ဝႃႈၼႆ။

လိူဝ်ၼၼ်ႉ ၼႂ်းၸႄႈဝဵင်းၼမ်ႉတူႈၵေႃႈ TNLA တင်း RCSS/SSA လႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း ၵူၼ်းမိူင်းဢွၼ် ပၢႆႈၽေးသိုၵ်းၶဝ်ႈယူႇၼႂ်းဢိူင်ႇမၢၼ်ႈၸၢမ် ၸႄႈဝဵင်းၼမ်ႉတူႈ။ ယၢမ်းလဵဝ်ဢၼ်ပႆႇၸၢင်ႈပွၵ်ႈႁိူၼ်းၶိုၼ်းမီးယူႇ 300 ပၢႆ ဝႃႈၼႆ။