ၼၢင်းယိင်းၵေႃ့ၼိုင်ႈ ၽူႈၶဝ်ႈၸုမ်းပရႁိတ ဝဵင်းတႃႈၶီႈလဵၵ်း ၺႃးၵူၼ်းၶီႇရူတ့်ၶိူင်ႈသွင်ၵေႃ့ မႃးၸၵ့်ဢဝ် ဢႅပ်ႇငိုၼ်းမၼ်းၼၢင်းၵႂႃႇ မိူဝ်ႈၵႂႃႇႁွင်ႈယႃသေပွၵ်ႈမႃးၶိုၼ်း။
မိူဝ်ႈဝႃႈ ဝၼ်းတီႈ 24/11/2022 ယၢမ်းၶမ်ႈ 6 မူင်း ၼၢင်းမိငႄႇ ၽူႈၶဝ်ႈၸုမ်းၸွႆႈတူင်ႇဝူင်းၵူၼ်း လေႃးၵပႃႇလပရႁိတ ယူႇဝၢၼ်ႈ သၼ်သၢႆး (ၵ) ဝဵင်းတႃႈၶီႈလဵၵ်း ၺႃးၵူၼ်းၶီႇရူတ့်ၶိူင်ႈသွင်ၵေႃ့ မႃးၸၵ့်ဢဝ် ဢႅပ်ႇငိုၼ်းမၼ်းၼၢင်း တီႈသဵၼ်ႈတၢင်းလူင်ပုင်ႇလူဝ့် ၽွင်းမၼ်းၼၢင်းၵႂႃႇၼႄႁွင်ႈယႃ(သေးၶၢၼ်း)သေၶိုၼ်းပွၵ်ႈမႃး ။
တူဝ် ၼၢင်းမိငႄႇ လၢတ်ႈတီႈၽူႈတွႆႇႁွၵ်ႈဝႃႈ-” ၸႂ်ႈဢေႃႈ မႅၼ်ႈမိူဝ်ႈ ၶႃႈၵႂႃႇ ႁွင်ႈယႃ ၸေႇတၼႃႇ (စေတနာဆေးခန်း)သေပွၵ်ႈမႃးၶိုၼ်းၼၼ်ႉ မၼ်းလပ်းသိင်ႇယဝ့်ၼႃႇၼေႃ ၶၢဝ်းၼၼ့်။ ပဵၼ် တီႈ ႁိမ်း KTV 285 သဵၼ်ႈတၢင်းၵႂႃႇ လၢၼ့်သူၺ်ႇတႄး တီႈၶၢႆၶိူင်ႈၶူဝ်းသၢင်ႈႁိူၼ်း (ရွှေသဲအိမ်ဆောက် ပစ္စည်းဆိုင်)ၼၼ့်ဢေႃႈ ။ မီးၵူၼ်းၸၢႆးသွင်ၵေႃ့ ၶီႇရူတ့်ၶိူင်ႈမႃးၸၵ့်ဢဝ်ဢႅပ်ႇငိုၼ်းၶႃႈ ဢၼ်ဝႆ့ ၼႂ်းသွင်းရူတ့်ၶႃႈၼၼ့်ဢေႃႈ။ ၶႃႈထၢင်ႇဝႃႈၶဝ်မဝ်းသေ ၶီႇမႃးဝႆး ၊ ၵူဝ်ၶဝ်မႃးၽႃႇၶႃႈလႄႈ ၶႃႈၵၼ့် ႁေႃႈ လွႆးလွႆးဢေႃႈ ။ ဢမ်ႇထၢင်ႇသေဢိတ်းတေပဵၼ်ၼႆ။ ဢမ်ႇတၼ်းၶုၵ်းၸႂ်လႆႈႁွင့်သႅၼ်ႇသင်၊ တိုၵ့်ၵႂင်လူင်ယူႇ ၶဝ်ပေႃးၵႂႃႇႁွတ်ႈၵႆၼႃႇယဝ့်။ ၵမ်းၼႆ့ လၢပ်ႇၶႃႈယဝ့် ဢမ်ႇႁတ်းဢွၵ်ႇၵႂႃႇ တၢင်း ၼွၵ်ႈ ၵေႃ့လဵဝ်ယဝ့် ႁဵတ်းႁႃၵိၼ်ယၢပ်ႇပေႃးပဵၼ်ထၢၼ်ႇၼႆႉ” – ဝႃႈၼႆ။
သဵၼ်ႈတၢင်းသဵၼ်ႈၼႆ့ ၵႆ့မီးၽူႈလၵ့်ၸၵ့်ၶုတ်ႈလိူင်ႇၼမ် ၊ ပေႃးယၢမ်းလပ်းသိင်ႇ လူဝ်ႇလႆႈၾၢင့် ၊ ပေႃးပဵၼ်ၼၢင်းယိင်းၶႅၼ်းလူဝ်ႇၾၢင့်ၼမ်ၼမ် ၵူၼ်းတႃႈၶီႈလဵၵ်းလၢတ်ႈၼင်ႇၼႆ။
ၼၢင်းမိငႄႇ သိုပ်ႇထႅင်ႈဝႃႈ -“ၼႂ်းဢႅပ်ႇငိုၼ်းၼၼ့် ပႃးၵႂႃႇ ဝႅၼ်ၶမ်းသွင်ဝၢတ်ႇ ငိုၼ်းထႆး သၢမ်မိုၼ်ႇပၢႆ၊ဢေႇထီႇဢႅမ်ႇ ATM ၼိုင်ႈၵၢတ့်လႄႈ ဝႂ်ၶပ်းၶီႇရူတ်ႉဢေႃႈ။ ၵႂႃႇတိူင်ႇလၢတ်ႈတီႈ ႁူင်းပလိၵ်ႈဝႆ့ယူႇ ။ ၶဝ်ၵေႃႈ ဢမ်ႇၸၢင်ႈႁဵတ်းသင်ပၼ်ႁဝ်းလႆႈတေ့တေ့။ ၶဝ်မႃးယွၼ်းတူၺ်းၼႂ်း CCTV တီႈႁိမ်းလၢၼ့်ၸိူဝ်းၼၼ့်ယူႇ ၵူၺ်းၼႃႇ လပ်းသိင်ႇၼႃႇ ဢမ်ႇႁၼ်သင် ” ဝႃႈၼႆ။
ဝၢႆးသိုၵ်းမၢၼ်ႈ ယိုတ်းမိူင်းမႃး ဝဵင်းတႃႈၶီႈလဵၵ်း လႅၼ်လိၼ်တႆး – ထႆးၼႆႉ မီးၵူၼ်းလုၵ်ႉတၢင်ႇတီႈ သီႇလႅၼ် မႃးယူႇထင်သဝ်းၼမ်။ ၸွမ်းတႃႈၸွမ်းတၢင်း ၼႂ်းပွၵ်ႉယွမ်ႇၸိူဝ်းၼႆႉ ၵူၼ်းသူႇသမ်း ၵိၼ်ယႃႈ ၼမ်၊ ပႃးမိတ်ႈပႃးလႅဝ်း ဢႅဝ်ႇသွၵ်ႈတဝ် ၸွမ်းၵွင်ယုၵ်းယၢၵ်း ၼွၼ်းၸွမ်းၶၢင်ႈတၢင်း ၸိူဝ်းၼႆႉၵေႃႈမီးတင်းၼမ်။
ၵွပ်ႈၼႆလႄႈ ဢမ်ႇဝႃႈ ၵၢင်ဝၼ်းၵၢင်ၶမ်ႈ ပေႃးပဵၼ်ၼၢင်းယိင်း ပေႃးဢွၵ်ႇၵႂႃႇ ၵေႃႉသွင်ၵေႃႉၵူၺ်းတႄႉ ပဵၼ်ဢၼ်လီမႆႈၸႂ်။ ယွၼ်ႉဝႃႈ ၵႆႉမီးၵူၼ်း ပႂ်ႉ ၸူၼ်/ ႁိမ်လိပ်းဢဝ်ရူတ်ႉၶိူင်ႈ ၸွမ်းတၢင်း ၊ လွင်ႈၸိူဝ်းၼႆႉမီးမႃးၶိူဝ်းယႂ်း။ ပလိၵ်ႈမၢၼ်ႈ သိုၵ်းမၢၼ်ႈဢမ်ႇတွၼ်ႉႁႃသွၵ်ႈတီႉၺွပ်းဢဝ်တူဝ်ၵူၼ်းၸူၼ်ၵူၼ်းၸၵ်ႉလႆႈသေပွၵ်ႈ။
