ၼၢင်းယိင်းၵေႃ့ၼိုင်ႈ ၵူၼ်းဝဵင်းတၢင့်ယၢၼ်း ပဵၼ်တၢင်းပဵၼ်ယဵဝ်ႈဝၢၼ်လႄႈၼိဝ့်တိၼ်ၼဝ်ႈပႅတ်ႈတင်းသွင်ၶွၼ် လႆႈတႅပ်းတိၼ်ပႅတ်ႈ ယၢပ်ႇၽိုတ်ႇၵႃႈယူတ်းယႃ။
မၼ်းၼၢင်းၼႆႉၸိုဝ်ႈႁွင်ႉၼၢင်းမႃႇၼေး ဢႃယု 29 ပီ ယူႇဝၢၼ်ႈပၢင်ႇယႃႈလူင် ဢိူင်ႇႁူဝ်တႃႈ ဝဵင်းတၢင်ႉယၢၼ်း၊ တၢင်းပဵၼ်ယဵဝ်ႈဝၢၼ်သုင်ႁႅင်းထိုင်တီႈတိၼ်ၸဵပ်း ၼိဝ်ႉတိၼ်ၼဝ်ႈ၊ ဢမ်ႇၸၢင်ႈလုၵ့်ပႆၵႂႃႇမႃးလႆႈ မီးၶၢဝ်းတၢင်း 5 လိူၼ်ယဝ်ႉ။
လူၺ်းဢေးလူႇ ၵူၼ်းမိုတ်ႈၵိုဝ်းၸမ်ၸႂ်လႄႈၸွႆႈထႅမ်ၼၢင်းမႃႇၼေးလၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈဢေႃႈ မၼ်းပဵၼ်မႃးႁိုင်ယဝ့် မွၵ်ႈ 8 လိူၼ်ၼႆ့ယဝ့် ။ ၶႃႈၶဝ်ဢဝ်မၼ်းၵႂႃႇႁူင်းယႃ။ မေႃယႃဝႃႈမၼ်းပဵၼ်ယဵဝ်ႈဝၢၼ်ၼႆၶႃႈဝႃႇ။ မၼ်းပဵၼ်ၵူၼ်းၵေႃႉလဵဝ်ၵူၺ်းလႄႈ ယၢပ်ႇၽိုတ်ႇၵႃႈယူတ်းယႃ ယၢပ်ႇၽိုတ်ႇၵူၼ်းလုမ်းလႃးဢေႃႈ။”-ဝႃႈၼႆ။
ၼၢင်းမႃႇၼေးၼႆႉယၢမ်ႈ တႄႇၼႃႈႁိူၼ်းမီးလုၵ်ႈယဝ့်သေတႃ့ ၽူဝ်လႄႈလုၵ်ႈမၼ်းတၢႆၵႂႃႇလႆႈ မွၵ်ႈပီၼိုင်ႈယဝ်ႉလႄႈယၢမ်းလဵဝ်မၼ်းၼၢင်းၵိုတ်းၵေႃႉလဵဝ်။ ၾၢႆႇၼိုင်ႈၵူၼ်းဝၢၼ်ႈဝႃႈ ၵူဝ်တၢင်းပဵၼ်မၼ်းၽႄႈလၢမ်းၸပ်းၸူးၵူၼ်းဝၢၼ်ႈၼႆသေ ဢဝ်မၼ်းၵႂႃႇယူႇဝႆႉႁင်းၶေႃ တီႈႁိူၼ်းလင်ၼိုင်ႈ တီႈၼွၵ်ႈဝၢၼ်ႈ။
ယၢမ်းလဵဝ် ၼိဝ်ႉတိၼ်မၼ်းၼၢင်းၼဝ်ႈ၊ ပဵၼ်ၸဵပ်းပဵၼ်ယဵၼ်းႁႅင်းလႄႈ လႆႈၵႂႃႇႁူင်းယႃ၊ မေႃယႃ ယူတ်းယႃပၼ်သေလႆႈတႅပ်းပႅတ်ႈၼိဝ်ႉတိၼ်မၼ်းၼၢင်းၶွၼ်ၼိုင်ႈယဝ်ႉ။ တိုၵ်ႉလူဝ်ႇၵႃႈယူတ်းယႃထႅင်ႈတိၼ်ၶွၼ်ၼိုင်ႈယူႇ ။ပေႃးဢမ်ႇယူတ်းယႃၶိုတ်းတၼ်းၵေႃႈၸၢင်ႈလႆႈတႅပ်းပႅတ်ႈထႅင်ႈ ဝႃႈၼႆ။
မေႃယႃၵေႃႉၼိုင်ႈ ဢၼ်ႁဵတ်းၵၢၼ်တီႈႁူင်းယႃလူင်ပွင်ၸိုင်ႈ ၼႂ်းၸိုင်ႈတႆးပွတ်းၸၢၼ်း လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈၶႃႈဢေႃႈ ၵူၼ်းပဵၼ်ယဵဝ်ႈဝၢၼ်ၼႆႉ ပေႃႈပဵၼ်ၸဵပ်း မၼ်းယဵၼ်းငၢႆႈ ၸဵပ်းၼၢၼ်းႁႅင်ႈ ပေႃးဢမ်ႇယႃၸဵပ်းမၼ်းၸဵဝ်းႁၢႆ ၸိူဝ်ႉ မႅင်းၸၢင်ႈၶဝ်ႈသေ တေယဵၼ်းႁႅင်း။ ပေႃးပဵၼ်ၼၼ်မႃး မၼ်းတေၼဝ်ႈသေ ထိုင်တီႈလႆႈတႅပ်းပႅတ်ႈဢေႃႈ။ မၼ်းဢမ်ႇၸပ်းၵၼ်ငၢႆႈၸိူင်ႉၵူၼ်းဝၢၼ်ႈမႆႈၸႂ်ၼၼ်ႉၶႃႈ။ ”- ဝႃႈၼႆ။
မိူဝ်ႈလဵဝ် ၼၢင်းမႃႇၼေး မီးဝႆ့တီႈႁူင်းယႃလူင် ဝဵင်းတၢင့်ယၢၼ်းၸိုင်ႈတႆး ပွတ်ႁွင်ႇ လႆႈတႅပ်းၼိဝ်ႉတိၼ်ပႅတ်ႈ ၶွၼ်ၼိုင်ႈယဝ့် ။ ၵိုတ်းထႅင်ႈၶွၼ်ႈၼိုင်ႈပေႃးဢမ်ႇယူတ်းယႃလႆႈၶိုတ်းတၼ်းၶၢဝ်းယၢမ်း တေၸၢင်ႈလႆႈ တႅပ်းပႅတ်ႈထႅင်ႈၶွၼ်ၼိုင်ႈ လူဝ်ႇငိုၼ်းၵမ့်ၸွႆႈတႃႇယူတ်းယႃဝႆးဝႆး- လူၺ်းဢေးလူႇ လၢတ်ႈၼင်ႇၼႆ။
ပေႃးမီး ၽူႈၵူၼ်းလီ ၵေႃ့လႂ်ၶႂ်ႈၸွႆႈထႅမ် ၼႆ ၵပ်းသိုပ်ႇ တွင်ႈထၢမ်တီႈ လူၺ်းဢေးလူႇ၊ မၢႆၾူၼ်း 09 454 122 689 ယဝ်ႉၸင်ႇသူင်ႇငိုၼ်းၵမ့်ၸွႆႈမၢႆၶေႇပေး 09-899 826 834 (K-Pay, Wave Pay) – လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ