သိုၵ်းမၢၼ်ႈ ယိုဝ်း လုၵ်ႈဢွၼ်ႇၸၢႆး ၶီႇရူတ်ႉမႃးၸွမ်းၵၼ် 3 ၵေႃႉ၊ သမ်ႉၵႂႃႇတိူဝ်ႉၶိုၼ်းပလိၵ်ႈမၢၼ်ႈ (ယႄး) မၢတ်ႇၸဵပ်း 5 ၵေႃႉ။
မိူဝ်ႈဝႃး ဝၼ်းတီႈ 27/10/2022 ယၢမ်းၵၢင်ၶမ်ႈမွၵ်ႈ 8 မူင်း သိုၵ်းမၢၼ်ႈ ႁႄႉရူတ်ႉၶိူင်ႈ လုၵ်ႈဢွၼ်ႇ ၸၢႆးဢၼ်ၶီႇမႃးၸွမ်းၵၼ် 3 ၵေႃႉ ဢမ်ႇၵိုတ်းလႄႈ သိုၵ်းမၢၼ်ႈ လၢၵ်ႈၵွင်ႈယိုဝ်းသႂ် သမ်ႉၵႂႃႇတိူဝ်ႉ ပလိၵ်ႈမၢၼ်ႈဢၼ်မီးၾၢႆႇပုၼ်ႉတၢင်း မၢတ်ႇၸဵပ်း 5 ၵေႃႉ။ လုၵ်ႈဢွၼ်ႇၸၢႆးၼၼ်ႉတႄႉ မၢၵ်ႇၵွင်ႈ သႅတ်ႈတိူဝ်ႉမၢတ်ႇၸဵပ်း 2 ၵေႃႉ ။
ၵူၼ်းမိူင်းဝဵင်းၵူတ်ႉၶၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈၼႆႉ ယူႇၾၢႆႇပုၼ်ႉတၢင်းလူင် ပလိၵ်ႈမၢၼ်ႈ သမ်ႉ ယူႇၾၢႆႇၼႆႉတၢင်းလူင် ၶဝ်ႁႄႉရူတ်ႉၶိူင်ႈ ဢွၼ်ႇၸၢႆး 3 ၵေႃႉ သွၼ်ႉၵၼ်မႃး လမ်းၼိုင်ႈ ဢမ်ႇၵိုတ်းလႄႈ သိုၵ်းမၢၼ်ႈ လၢၵ်ႈၵွင်ႈယိုဝ်းသႂ်ႇ၊ မၢၵ်ႇၵွင်ႈသဵၼ်ၵႂႃႇတိူဝ်ႉပလိၵ်ႈမၢၼ်ႈ ဢၼ်ပႂ်ႉတၢင်း ၾင်ႇပုၼ်ႉ လႆႈတိူဝ်ႉမၢတ်ႇၸဵပ်းၸွမ်းမွၵ်ႈ 4-5 ၵေႃႉ။ ဢွၼ်ႇၸၢႆး ၸိူဝ်းၼၼ်ႉသမ်ႉ ၺႃးမၢၵ်ႇၵွင်ႈသႅတ်ႈ သႂ်ႇ 2 ၵေႃႉ။ ယၢမ်းလဵဝ် ၸဵမ်ပလိၵ်ႈမၢၼ်ႈ၊ ဢွၼ်ႇၸၢႆး ၸိူဝ်းၼႆႉ သူင်ႇ ယူတ်းယႃ ဝႆႉတီႈႁူင်းယႃ မူတ်း ယဝ်ႉ” – ဝႃႈၼႆ။
ဢွၼ်ႇၸၢႆး 3 ၵေႃႉၼၼ်ႉ ပဵၼ်လုၵ်ႈလၢင်း ပလိၵ်ႈ-သိုၵ်းမၢၼ်ႈ ၼႂ်းဝဵင်းၵူတ်ႉၶၢႆၶိုၼ်း။ တေမီးဢႃယုမွၵ်ႈ 17 ပီၵူၺ်း။ ဢွၼ်ႇ ၸၢႆး 3 ၵေႃႉၼၼ်ႉ တႃႇၵေႃႉၼိုင်ႈ မၢၵ်ႇၵွင်ႈသႅတ်ႈသႂ်ႇ ၼႃႈၽၢၵ်ႇ၊ ထႅင်ႈၵေႃႉၼိုင်ႈ မၢၵ်ႈၵွင်ႈသႅတ်ႈသႂ်ႇ တီႈၼႃႈဢူၵ်းလႄႈ ထႅင်ႈၵေႃႉၼိုင်ႈသမ်ႉ ရူတ်ႉၶိူင်ႈလူမ်ႉသေ လႆႈမၢတ်ႇၸဵပ်းၸွမ်း ၵူၼ်းပိုၼ်ႉတီႈလၢတ်ႈ။
ပလိၵ်ႈမၢၼ်ႈ ဢၼ်ၺႃးယိုဝ်း မၢတ်ႇၸဵပ်းၸွမ်းမွၵ်ႈ 5 ၵေႃႉၼၼ်ႉတႄႉ တိူဝ်ႉၺႃး တီႈလႂ် လၢႆလၢႆ ဢမ်ႇလႆႈႁူႉ။ မိူဝ်ႈၽွင်းၼၼ်ႉ ၾၢႆႇသိုၵ်းမၢၼ်ႈ ယိုဝ်းၵွင်ႈသႂ်ႇ မွၵ်ႈ 20 ၵမ်း ၼႆယဝ်ႉ။