ၶူးဝႃးဝုၼ်းၸုမ်ႉ ယေႃးမုၼ်တႃႇသၢင်ႈၼႃႈၵၢၼ်သႃသၼႃ ၼႂ်းမိူင်းတႆး လၢႆလၢႆတီႈ

မိူဝ်ႈၼႆႉ ဝၼ်းတီႈ 26/10/2022 ယၢမ်းၵၢင်ၼႂ် ၸဝ်ႈသိလ်ထမ်း ၶူးဝႃးဝုၼ်းၸုမ်ႉ  လုၵ်ႉတီႈထမ်ႈလူင် မိူင်းၵႅတ်ႇ ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်းသေ ဢွၵ်ႇၶၢဝ်းတၢင်း ႁွတ်ႇထိုင်  ဝဵင်းၵႃလီႉ၊ ဝၢႆးၼၼ်ႉတေသိုပ်ႇယေႃးမုၼ်ၵႂႃႇတႃႇပွင်သၢင်ႈသႃသၼႃ ၼႂ်းမိူင်းတႆး ဝႃႈၼႆ။

မိူဝ်ႈၼႆႉယၢမ်းၵၢင်ဝၼ်းၶူးဝႃးၸဝ်ႈယေႃးမုၼ်ထိုင် တီႈဢိူင်ႇမိူင်းပူးဢွၼ်ႇ ၸႄႈဝဵင်း မိူင်းပဵင်း  ၊ ထိုင်ၶၢဝ်းယၢမ်းႁူဝ်ၶမ်ႈ 5 မူင်းၼႆႉၶူးဝႃးၸဝ်ႈႁွတ်ႈထိုင်ၵႃလီႉ ။

ၸဝ်ႈၶူးလူင် ၺႃႇၼသီႇရိ ႁူဝ်ပဝ်ႈၵိင်ႇၽႄငဝ်ႈငုၼ်းမုၵ်ႉၸုမ်းလူင် သင်ႇၶႃႇၸိုင်ႈ တႆးပွတ်းဢွၵ်ႇၶူင်းလၢတ်ႈဝႃႈ – “  ၶူးဝႃးပေႃႈ လုၵ်ႉထမ်ႈမိူင်းၵႅတ်ႇ ဢွၵ်ႇၶၢဝ်းတၢင်းထိုင် တီႈထၢတ်ႈၸွမ်မၢတ်ႇ မိူင်းပူးဢွၼ်ႇ။ ထိုင်ႁူဝ်ၶမ်ႈ ႁွတ်ႈထိုင်ၵႃလီႉ။    ပိုၼ်ႉတီႈမၢင်ဢၼ် မိူဝ်ႈၶူးဝႃးပေႃႈ ယူႇၼႂ်းထမ်ႈ ၼၼ်ႉၵေႃႈ မၼ်းၸဝ်ႈၵႆႉလၢတ်ႈမႃးတၵ်ႉမႃးလႄႈ ၸဝ်ႈတေမီးၶၢဝ်းတၢင်းမႃးထိုင်။ တေထိုင် တီႈလႂ်လၢႆလၢႆၼႆၵေႃႈ လုၵ်ႈသိတ်ႇတ ပေးၶိုၼ်းပွင်ႇၵၼ်ဝႆႉ ႁၢင်ႈႁႅၼ်းဝႆႉ၊  ၵူၺ်းၵႃႈ  တေၽႅဝ်ဝၼ်းလႂ်ၼႆ တႅပ်းတတ်းပႆႇလႆႈၼင်ႇၵဝ်ႇ”- ဝႃႈၼႆ။

တႄႇဢဝ် ဝၼ်းတီႈ 13/10/2022 ၼႆႉမႃး ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢွၵ်ႇၶၢဝ်းတၢင်း လုၵ်ႉဢဝ်တီႈမိူင်းၽူင်း ဝဵင်းတႃႈၶီႈလဵၵ်း မႃးထိုင်မိူင်းၽျၢၵ်ႈ – ၵဵင်းတုင် – မိူင်းပဵင်း။ ဝၼ်းတီႈ 14 ၼႆႉသမ်ႉ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ႁွတ်ႈ ထိုင်ထမ်ႈမိူင်းၵႅတ်ႇ။

ၸဝ်ႈတူၼ်ၶူး လၢႆၸဝ်ႈလၢတ်ႈဝႃႈ ၽႅၼ်ၵၢၼ်ၶၢဝ်းတၢင်း ၸဝ်ႈသိလ်ထမ်းၶူးဝႃး ဝုၼ်းၸုမ်ႉ ပွၵ်ႈၼႆႉ တေလုၵ်ႉတင်း မိူင်း တႆးပွတ်းၸၢၼ်း ပွတ်းၵႃလိ၊ ၵုၼ်ႁဵင် တေႁွတ်ႈထိုင် မိူင်းတႆးပွတ်းႁွင်ႇ တင်းထုင်ႉဝဵင်းတၢင်ႉယၢၼ်းသေ တေပွၼ်ႈထမ်း တြႃးပၼ်ၵူၼ်းဝၢၼ်ႈၵူၼ်းမိူင်းၵႂႃႇ ၼႆယဝ်ႉ။