သိုၵ်းမၢၼ်ႈလႄႈ သိုၵ်း MNDAA ၵဝ်ႈၵၢင်ႉ ယိုဝ်းၵၼ်တီႈ ၼႂ်းဢိူင်ႇမိူင်းပေႃႈ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၊ သိုၵ်းမၢၼ်ႈ ယိုဝ်းၵွင်ႈလူင်ဢမ်ႇထၢတ်ႇ ၵူၼ်းမိူင်းတူၵ်းၸႂ်။
မိူဝ်ႈၼႆႉဝၼ်းတီႈ 24/10/2022 ယၢမ်းဝၢႆးဝၼ်း 4 မူင်းၶိုင်ႈ သိုၵ်းမၢၼ်ႈလႄႈ သိုၵ်းၵဝ်ႈၵၢင်ႉ ယိုဝ်းၵၼ်တီႈ ႁူဝ်ဝႃး ႁိမ်းဝၢၼ်ႈၵွင်း ။
ၽူႈၸၢႆး မွၵ်ႈဢႃယု 30 ၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ယိုဝ်းၵၼ်ၸဵမ်မိူဝ်ႈ 4 မူင်းၶိုင်ႈ။ ပဵၼ်သိုၵ်းမၢၼ်ႈ ၶမရ 355 လႄႈ သိုၵ်းၵဝ်ႈၵၢင်ႉ တပ်ႉၵွင် 505။ တေႃႇထိုင်မွၵ်ႈႁူဝ်ၶမ်ႈ 6 မူင်းၼႆႉလႆႈယိၼ်းသဵင်ၵွင်ႈလဵၵ်ႉ-ယႂ်ႇဢမ်ႇထၢတ်ႇ”- ဝႃႈၼႆ။
ပၢင်တိုၵ်းၼႆႉယၢၼ်ၵႆၵၼ်တင်းဝၢၼ်ႈၵွင်းမွၵ်ႈ 1 လၵ်းပၢႆၵူၺ်းလႄႈ ႁဵတ်းႁႂ်ႈၵူၼ်းဝၢၼ်ႈၵွင်းတူၵ်းၸႂ်။ လိူဝ်ၼၼ်ႉသိုၵ်းမၢၼ်ႈတီႈမိူင်းပေႃႈ ယိုဝ်းၵွင်ႈလူင်ၵႂႃႇတၢင်းလွႆႁူဝ်ဝႃးၸွႆႈဢမ်ႇထၢတ်ႇ။
ၵူၼ်းပိုၼ်ႉတီႈလၢတ်ႈထႅင်ႈဝႃႈ-“သိုၵ်းမၢၼ်ႈၼႆႉ ထႅမ်ႁႅင်းသိုၵ်းၶိုၼ်ႈမႃးၸဵမ်မိူဝ်ႈၼႂ်ၵႆႈၼႆႉၶႃႈၼေႈ။ ၶဝ်ႈမႃးၼႂ်းဝၢၼ်ႈၵွင်းဢဵၼ်ႁႅင်းမွၵ်ႈ 50 ၼႆႉ။ ၵူၼ်းဝၢၼ်ႈပေႃးတူၵ်းၸႂ်သေၾၢင်ႉဝႆႉၸဵမ်မိူဝ်ႈၼၼ်ႉယဝ်ႉ။ ထိုင်ႁူဝ်ၶမ်ႈၵေႃႈသဵင်ႈၵွင်ႈဢွၵ်ႇယဝ်ႉ”-ဝႃႈၼႆ။
ၼွၵ်ႈလိူဝ်ၼၼ်ႉ သိုၵ်းမၢၼ်ႈဢၼ်မီးတီႈ ၵုင်းပိဝ်ႇႁႃႇ တီႈဝၢၼ်ႈတူင်ႈၶၢၼ်ၵေႃႈ ၸွႆႈယိုဝ်းမၢၵ်ႇလူင်ၵႂႃႇတၢင်းပဵၼ်ပၢင်တိုၵ်း- ၵူၼ်းပိုၼ်ႉတီႈလၢတ်ႈၼင်ႇၼႆ။
တေႃႇထိုင်ယၢမ်းလဵဝ်လွင်ႈမၢတ်ႇၸဵပ်းလူႉတၢႆ ယင်းပႆႇႁူႉတႅတ်ႈတေႃး။ သဵင်ယိုဝ်းၵၼ်ယဵၼ်ၵႂႃႇယဝ်ႉသေတႃႉယူႇယူႇသဵင်ၵွင်ႈတိုၵ်ႉဢွၵ်ႇယူႇလႄႈၵူၼ်းဝၢၼ်ႈမႆႈၸႂ်တႃႇၵႂႃႇႁဵတ်းၵၢၼ်ႁႃၵိၼ်လဵင်ႉတွင်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ