ၸွမ်းၵဵတ်ႉတၢင်းၶဝ်ႈဢွၵ်ႇဝဵင်း ၼိူဝ်သဵၼ်ႈတၢင်းလူင် လၢႆးၶႃႈ – တူၼ်ႈတီး ၸိူဝ်းၼႆႉ သိုၵ်းမၢၼ်ႈ ပႂ်ႉၵူတ်ႇ ထတ်းၸႅတ်ႈထၢမ်ႁၢဝ်ႈႁႅင်း လုၵ်ႈႁဵၼ်းၵေႃႈဢမ်ႇဝႆႉ ၵူတ်ႇထတ်းယွၼ်းငိုၼ်းပႃးထႅင်ႈ။

ယၢမ်းလဵဝ် ၸွမ်းၵဵတ်ႉတၢင်းၶဝ်ႈဢွၵ်ႇဝဵင်း ၼိူဝ်သဵၼ်ႈတၢင်းလူင် လၢႆးၶႃႈ – တူၼ်ႈတီး ၶွင်ႇသီႇသိုၵ်းမၢၼ်ႈ ယိုတ်းမိူင်း ပႂ်ႉၵူတ်ႇ ထတ်း ၵူၼ်းၵႂႃႇမႃးႁၢဝ်ႈႁႅင်းသေဢမ်ႇၵႃး ယဝ်ႉၵေႃႈ လုၵ်ႈႁဵၼ်းၸိူဝ်းၼႆႉၵေႃႈ ဢမ်ႇဝႆႉ ၵူတ်ႉထတ်းၵဵပ်းငိုၼ်းပႃးထႅင်ႈ တီႈဢေႇ သုတ်း လႆႈပၼ် 6,000 ပျႃး ၼႆယဝ်ႉ။

လုၵ်ႈႁဵၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶႃႈၵႂႃႇၶိုၼ်းၵျွင်း တီႈတူၼ်ႈတီးသေ ပွၵ်ႈမႃး ၼႂ်းၵႄႈတူၼ်ႈတီး – လၢႆးၶႃႈ ၸွမ်းၵဵတ်ႉၶဝ်ႈဢွၵ်ႇဝဵင်း မွၵ်ႈ 3 တီႈၼႆႉ ၶဝ်ၵူတ်ႇထတ်းသေဢမ်ႇၵႃး   လႆႈပၼ်ပႃးငိုၼ်း 6,000 ပျႃးထႅင်ႈ။ ၵူၼ်း ဢွၵ်ႇတၢင်းမၢင်ၵေႃႉ လႆႈပၼ်ၼမ်လိူဝ်ၼႆႉထႅင်ႈၶႃႈဢေႃႈ။ ငိုၼ်းၵေႃႈယွၼ်း ၵူတ်ႇထတ်းၵေႃႈပႃး ႁဵတ်းၼႆၶႃႈ”- ဝႃႈၼႆ။

ၵူႈပွၵ်ႈ ၵဵတ်ႉတၢင်းၶဝ်ႈဢွၵ်ႇဝဵင်း ၵႂႃႇမႃးၸိူဝ်းၼႆႉ ၵႂႃႇမႃးထၢင်ႇႁၢင်ႈလီ ဢမ်ႇလႆႈပၼ်ငိုၼ်းသင်သေပျႃး ယၢမ်းလဵဝ် ၵူတ်ႇထတ်း ပႃးသေဢမ်ႇၵႃး ပၢႆယွၼ်းပႃးငိုၼ်းထႅင်ႈ။

  ၸဝ်ႈၵုၼ်ႇၵႃႉၶၢႆ  ယၢပ်ႇၽိုတ်ႇၵိၼ်းၸႂ်  လွင်ႈၵၢၼ်တေႃႉသူင်ႇၶူဝ်းၵုၼ်ႇ ၸိူဝ်း ၼႆႉ  လႆႈပၼ်ၸွမ်းၵဵတ်ႉၼမ်လႄႈ ဢမ်ႇလႆႈ ၼမ်ႉတွၼ်းသင် ဝႃႈၼႆ။

ၵူၼ်းၵႃႉၶၢႆ ၶူဝ်းၵုၼ်ႇ တီႈဝဵင်းလၢႆးၶႃႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢမ်ႇလႆႈၼမ်ႉ တွၼ်းသင်ၶႃႈ။ ၵုမ်ႇ လႆႈပၼ် ၸွမ်းၵဵတ်ႉၵူၺ်း။ မိူဝ်ႈၽွင်းၵႂႃႇတေႃႉၶူဝ်းၵုၼ်ႇတီႈတူၼ်ႈတီးၼၼ်ႉ ၵႂႃႇၵေႃႈလႆႈပၼ်၊ မႃးၵေႃႈလႆႈပၼ်။ ၼိုင်ႈတီႈလႂ် လႆႈပၼ်မွၵ်ႈ 10,000 ပျႃးၼႆႉ ယဝ်ႉၵေႃႈ ၼမ်ႉမၼ်း၊ ၵႃႈၵႃး ၸိူဝ်းၼႆႉၵေႃႈ ၵႃႈႁႅင်း ပေႃးမႃးသွၼ်ႉတူၺ်းတင်းမူတ်း ဢမ်ႇလႆႈ ၼမ်ႉမႅတ်ႈသင်ၶႃႈ”- ဝႃႈၼႆ။

ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ ၵဵတ်ႉ/ လၢၼ်ႇ တၢင်းၶဝ်ႈဢွၵ်ႇဝဵင်း ၸိူဝ်းၼႆႉ ၶဝ်ပႂ်ႉၵူတ်ႇထတ်းၸႅတ်ႈထၢမ် ယွၼ်းငိုၼ်း ၵူၼ်း ၵႂႃႇမႃးႁၢဝ်ႈႁႅင်း။ ယဝ်ႉၵေႃႈ သင်မီးလွင်ႈထၢင်ႇထိူမ် ၵေႃႈ တီႉၺွပ်း ။