ပီၼႆႉ  ပၢႆးယူႇလီ ၸဝ်ႈပေႃႈသိလ်ထမ်း ၶူးဝႃးဝုၼ်းၸုမ်ႉ ဢမ်ႇပေႃးတဵမ်ထူၼ်ႈ၊ ၵမ်းၵမ်းလႆႈၵႂႃႇၸူးမေႃယႃၵူတ်ႇထတ်းၶိုၼ်းလႄႈ ဝၢႆးလင်ဢွၵ်ႇဝႃႇသႃ ၸင်ႇတေၸၢင်ႈတိုဝ်းၵမ်သိလ်ထမ်းလီလီ  – ၸဝ်ႈၶူးလူင် ၺႃႇၼသီႇရိလၢတ်ႈ။

တႄႇဢဝ် ႁၢင်လိူၼ်သႅပ်ႊထႅမ်ႊပိူဝ်ႊမႃး တေႃႇထိုင်ယၢမ်းလဵဝ် ၸဝ်ႈသိလ်ထမ်း ၶူးဝႃးဝုၼ်းၸုမ်ႉ လႆႈလိုဝ်ႈသေလုမ်းလႃးပၢႆးယူႇလီဝႆႉ တီႈဝတ်ႉၽရ ထၢတ်ႈ သီၻွၼ်ႊႁိူင်း ဢိူင်ႇမိူင်းၽူင်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း  ။ မေႃယႃၾင်ႇမိူင်းထႆးသမ်ႉ ၼတ်ႉ/ၶိၼ်း ၵႂႃႇၵူတ်ႇထတ်းပၢႆးယူႇလီၶိုၼ်းလႄႈ ဢမ်ႇၸၢင်ႈတိုဝ်းၵမ်သိလ်ထမ်းလႆႈလီဝႃႈၼႆ။

ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈၵိင်ႇၽႄ ငဝ်ႈငုၼ်းမုၵ်ႉ ၸုမ်းလူင်သင်ႇၶႃႇ ၸိုင်ႈတႆး ပွတ်းဢွၵ်ႇ ၶူင်း လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၸဝ်ႈ လၢမ်းဝႆႉတႄႉ တေပဵၼ်မွၵ်ႈဝၢႆးဢွၵ်ႇဝႃႇသႃၼႆႉ ၶူးဝႃးပေႃႈ ၸင်ႇတေၶဝ်ႈတိုဝ်း ၵမ်ၶိုၼ်း၊  ယွၼ်ႉဝႃႈၼႂ်းၵႄႈၼႆႉ ၶူးဝႃးပေႃႈ တေထူပ်းမေႃယႃထႅင်ႈၵမ်းၼိုင်ႈလႄႈ ပေႃးဝၢႆးဢွၵ်ႇဝႃႇသႃၼႆႉ တေၶဝ်ႈတိုဝ်းၵမ် ထႅင်ႈလိူၼ်ၼိုင်ႈ တေႃႇထိုင်လိူၼ် 12 မူၼ်း(ၾၢႆႇတႆး) ၸင်ႇတေဢွၵ်ႇ”- ဝႃႈၼႆ။

ယၢမ်းလဵဝ် ပၢႆးယူႇလီ ၸဝ်ႈသိလ်ထမ်း ၶူးဝႃးဝုၼ်းၸုမ်ႉတႄႉ  လီမႃး တင်းၼမ်ယဝ်ႉ။ ၾၢႆႇၼိုင်ႈ တၢင်းမေႃယႃ လဝ်ႈမႃးဝႃႈ ႁႂ်ႈလွင်ႈၵိၼ်သုင်းလႄႈ လိုဝ်ႈၼွၼ်းတဵမ်ထူၼ်ႈၸင်ႇတေၸၢင်ႈမီးႁႅင်းၵမ်ႉတူဝ်ၶိုၼ်း-ဝႃႈၼႆ။

“ၵူႈပီတႄႉ ပေႃးၼႂ်းဝႃႇသႃၸိုင် ၶူးဝႃးပေႃႈ တေၶဝ်ႈတိုဝ်းၵမ် တေဢမ်ႇလၢတ်ႈၵႂၢမ်း ။ တိုဝ်းၵမ်သိလ်ႁင်းၵူၺ်း တေႃႇပေႃးဢွၵ်ႇ ဝႃႇသႃၶိုၼ်း။ ပီၼႆႉ ဢိင်ၼိူဝ် ငဝ်းလၢႆးတၢင်းပဵၼ်ၸဝ်ႈႁဝ်းသေ ဢမ်ႇၸၢင်ႈၶဝ်ႈတိုဝ်းၵမ် မိူၼ်မိူဝ်ႈၵူႈပီပူၼ်ႉ၊ ယၢမ်းလဵဝ် ပၢႆး ယူႇလီၸဝ်ႈႁဝ်းၶႃႈတႄႉ ယူႇလီၶိုၼ်ႈမႃးတင်းၼမ်ယဝ်ႉ”- ၸဝ်ႈၶူးလူင် ၺႃႇၼသီႇရိ သိုပ်ႇလၢတ်ႈၼႄၼင်ႇၼႆ။

ဝၢႆးၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢွၵ်ႇထမ်ႈလူင် တီႈမိူင်းၵႅတ်ႇ ၸႄႈဝဵင်းမိူင်းသၢတ်ႇမႃး တၼ်းလႆႈလၢႆဝၼ်း ယွၼ်ႉၸပ်း တၢင်းပဵၼ်ၼၢဝ်ၼူၵ်ႉလႄႈ လႆႈၶဝ်ႈယူတ်းယႃတူဝ် တီႈႁူင်းယႃလူင်ၵုင်းထဵပ်ႈ (မိူင်းၵွၵ်ႇ) ၸိုင်ႈထႆး မိူဝ်ႈဝၼ်းတီႈ 10/8/2022 ပူၼ်ႉမႃးၼၼ်ႉ တေႃႇထိုင် ဝၼ်းတီႈ 18/8/2022 ၸင်ႇလူင်းႁူင်းယႃ။