သင်ၶၸဝ်ႈတင်း ၵူၼ်းမိူင်းပိုၼ်ႉတီႈ ႁူမ်ႈဢဵၼ်ႁႅင်းၵၼ်သေ သိူဝ်ႇသဵၼ်ႈတၢင်း ၶဝ်ႈဝဵင်းတႃႇ 11 လၵ်း။ တွၼ်ႈတႃႇပီႈၼွင်ႉ ဢိူင်ႇၼွင်လူင်၊ ဢိူင်ႇႁၢႆးၵူၺ်ႈ လႄႈ ဢိူင်ႇဝၢၼ်ႈၸိတ်ႇ ၶဝ်ၵႂႃႇမႃးငၢႆႈလူမ် ဝႃႈၼႆ။
တႄႇဢဝ် ႁူဝ်ပီ 2018 ၼႆႉမႃး သင်ၶၸဝ်ႈ၊ ၵူၼ်းမိူင်းပိုၼ်ႉတီႈ၊ ၶွမ်ႊပၼီႊသူၺ်ႇၵျႃးဢိင်ႇတင်း လုမ်းၽွင်းငမ်းၸႄႈ တွၼ်ႈလၢင်းၶိူဝ်း ႁူမ်ႈၵၼ်ၵဵပ်းငိုၼ်းလူႇတႃႇသိူဝ်ႇသဵၼ်ႈတၢင်း ဢၼ်တေၶဝ်ႈဝဵင်း ၾၢႆႇႁွင်ႇဝဵင်းလၢင်းၶိူဝ်း ၸိုင်ႈတႆး ပွတ်းၸၢၼ်း။
ၸဝ်ႈၶူးရႃႇသဝၼ်ႇၼ (ၸဝ်ႈငဝ်းလိူၼ်) ၽူႈပွင်ၵၢၼ် ဢွၼ်ပွင်သၢင်ႈၸဝ်ႈၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ ႁဝ်း ၸဝ်ႈဢွၼ်ၵူၼ်းဝၢၼ်ႈၼႂ်းပိုၼ်ႉတီႈသေ တေသိူဝ်ႇၵႂႃႇတၢင်းဢိူင်ႇၼွင်လူင်၊ ႁၢႆးၵူၺ်ႈလႄႈ ဢိူင်ႇဝၢၼ်ႈၸိတ်ႇ တၢင်းယၢဝ်း သဵၼ်ႈတၢင်း တေမီး 11 လၵ်း ၵူၺ်းၵႃႈ ၼႂ်း 11 လၵ်းၼၼ်ႉ ႁဝ်းတေႁဵတ်းသၢမ်တွၼ်ႈသေ သိူဝ်ႇၵႂႃႇ။ သဵၼ်ႈတၢင်းဢၼ်ႁဝ်းၸဝ်ႈၶဝ်သိူဝ်ႇၼႆႉ တေပဵၼ်သဵၼ်ႈတၢင်းပုၼ် (ၵုၼ်ႇၵရိတ်ႉ)” ဝႃႈၼႆ။
သဵၼ်ႈတၢင်းၵပ်းသိုပ်ႇၵႂႃႇၸူး ဢိူင်ႇၼွင်လူင်၊ ႁၢႆးၵူၺ်ႈလႄႈ ဝၢၼ်ႈၸိတ်ႇၼႆႉ ပဵၼ်တၢင်းဢၼ်လမ်ႇလွင်ႈ တႃႇၵူၼ်း ဝၢၼ်ႈၵူၼ်းမိူင်းၼႂ်းပိုၼ်ႉတီႈ။ တႃႇၵႂႃႇမႃးၵႃႉၶၢႆ တႃႇၵူၼ်းဝၢၼ်ႈ ပေႃးတေၸၢင်ႈဢဝ်ၶူဝ်းသူၼ်ၼႂ်းႁႆႈ မႃးၶၢႆၼႂ်း ဝဵင်း ဝႃႈၼႆ။
ၸဝ်ႈၶူး ရႃႇသဝၼ်ႇၼ လၢတ်ႈဝႃႈ သဵၼ်ႈတၢင်းသဵၼ်ႈၼႆႉ မၼ်းလမ်ႇလွင်ႈတႃႇၵူၼ်းမိူင်းႁဝ်းၸိူင်ႉႁိုဝ်ၼႆ ပေႃးဢဝ် ပၢႆးမၢၵ်ႈမီးဝဵင်းလၢင်းၶိူဝ်းဝႃႈၸိုင် မိူၼ် မၢၵ်ႇမူႇ၊ ၵူၺ်ႈ၊ ၼမ်ႉဢွႆႈ၊ ငႃး၊ ထူဝ်ႈ ၸဵမ်ၸိူဝ်းၼႆႉ မၼ်းတေဢွၵ်ႇၼႂ်း 3 ဢိူင်ႇၼႆႉ ၵမ်ႈၼမ်၊ ပေႃးဢဝ်ပႃႊသိူၼ်ႊမၼ်းဝႃႈၸိုင် 100 ပႃႊသိူၼ်ႊ ၼႂ်း 3 ဢိူင်ႇၼႆႉ ၶူဝ်းၼႂ်းသူၼ်/ ႁႆႈ တေ ဢွၵ်ႇၼမ် လိူဝ်ပိူၼ်ႈ တေမီး 80 ပႃႊသိူၼ်ႊမွၵ်ႈၼႆႉၶႃႈယဝ်ႉ ဝႃႈၼႆ။
ၼင်ႇႁိုဝ် တေပဵၼ်မႃး သဵၼ်ႈတႃႈသၢႆတၢင်း ပေႃးတေၶႅမ်ႉလႅပ်လီတႃႇၵူၼ်းမိူင်း ပႆၵႂႃႇမႃးလႆႈလီၼၼ်ႉ ၸင်ႇလႆႈ ႁူမ်ႈၵၼ် ၶၢမ်ႇၵဵပ်းငိုၼ်းလူႇၵၼ် ၵေႃႉဢိတ်းၵေႃႉဢွတ်းသေ လႆႈငိုၼ်းမႃး မွၵ်ႈ 170 သႅၼ်ပျႃး ဝႃႈၼႆ။
ၸဝ်ႈၶူးရႃႇသဝၼ်ႇၼ ဝႃႈ ငိုၼ်းဢၼ်လူႇၶၢမ်ႇသေ လႆႈမႃး မွၵ်ႈ 170 သႅၼ်ပျႃးၼႆႉ တေဝႃႈ ႁႂ်ႈၵုမ်ႇထူၼ်ႈ တႃႇသိူဝ်ႇပူတၢင်း ႁႂ်ႈၵုမ်ႇထူၼ်ႈၼႆ ပေႃးလၢတ်ႈသိုဝ်ႈ မၼ်းဢမ်ႇၵုမ်ႇ၊ ၵူၺ်းၵႃႈ တေႁဵတ်းၵႂႃႇၵမ်းဢိတ်းဢိတ်း ပေႃး ငိုၼ်းမူတ်းၵႂႃႇၵေႃႈ တေၶိုၼ်းလူႇၶၢမ်ႈ တီႈတၵ်ႉၵႃႇသတ်ႉထႃး ႁဵတ်းၼႆၵႂႃႇထႅင်ႈၵူၺ်း ဝႃႈၼႆ။
