ဝၼ်းတီႈ 29/9/2022 ယၢမ်းႁူဝ်ၶမ်ႈ မွၵ်ႈ 6:15 မူင်းၼၼ်ႉ ၵႃးသိုၵ်းမၢၼ်ႈ သီၶၢဝ် လမ်းၼိုင်ႈ မၢၵ်ႇတႅၵ်ႇၼႂ်းၵႃး တီႈ ပွၵ်ႉႁူဝ်ၼွင် ၼိူဝ်သဵၼ်ႈတၢင်းလူင် ၼမ်ႉၶမ်း – မိူင်းဝီး ၼႂ်းဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ။ တၢႆ ၵိုၵ်းၵႃး 3 ၵေႃႉ။ ပဵၼ်ၽူႈမီးၸၼ်ႉ ၸၼ်ႉၸဝ်ႈႁၢၼ် တင်း 3 ၵေႃႉ ၾၢႆႇမေႃယႃသိုၵ်း (ဆေးမှူး)၊ ၵေႃႉၶႃပုတ်းၼၼ်ႉသမ်ႉ ပဵၼ်ၽူႈမီးၸၼ်ႉၾၢႆႇမေႃယႃသိုၵ်း ၵေႃႉ ၵဝ်ႇ ။ ပဵၼ်သိုၵ်းမၢၼ်ႈတီႈသၶၢၼ်းတိတ်ႉၵူင်းတင်းမူတ်း ။
ၵူၼ်းဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်တေၵႂႃႇၵိၼ်လဵင်ႉ သူင်ႇသင်ႇၵေႃႉၵဝ်ႇ ႁပ်ႉတွၼ်ႉၵေႃႉမႂ်ႇ မေႃယႃသိုၵ်း ၶဝ် ၼၼ်ႉဢေႃႈ။ ၵေႃႉမႃးမႂ်ႇတႄႉ တၢႆၵိုၵ်းၵႃးၵမ်းလဵဝ်။ ၵေႃႉၶႃပုတ်းၼၼ်ႉ ပဵၼ်ၵေႃႉၵဝ်ႇ။ ယဝ်ႉၵေႃႈ ၽူႈမီးၸၼ်ႉ ၸဝ်ႈႁၢၼ် ထႅင်ႈၵေႃႉၼိုင်ႈ တိူဝ်ႉၺႃးမၢတ်ႇၸဵပ်း တီႈၼႃႈဢူၵ်း။ မိူဝ်ႈဝၼ်းၼၼ်ႉ ပဵၼ်ယဝ်ႉ သိုၵ်းမၢၼ်ႈၶဝ် ၵႂႃႇဢဝ်ႁူမ်ႇလူမ်ႈတီႈႁူင်းယႃ ၼမ်ႉၶမ်းၼၼ်ႉ ၼႅၼ်ႈၼႃမူတ်း။ ထိုင်မႃးဝၼ်းတီႈ 30 ယၢမ်းၵၢင်ၼႂ်ၸဝ်ႉ ၶဝ်ဢဝ်သူင်ႇၽႃႇတတ်းယူတ်းယႃ တီႈဝဵင်းလႃႈ သဵဝ်ႈ ၵမ်းလဵဝ်”- ဝႃႈၼႆ။
သိုၵ်းမၢၼ်ႈ 3 ၵေႃႉ ဢၼ်မၢတ်ႇၸဵပ်းလူႉတၢႆၼၼ်ႉ ၸိုဝ်ႈဝႃႈႁိုဝ်၊ ဢႃယု မီးၵႃႈႁိုဝ်လႄႈ ၸၼ်ႉၵၢၼ် ၸိူဝ်းၼႆႉ တႄႉ ပႆႇႁူႉ ႁူဝ်ယွႆႈမၼ်း ၼႆယဝ်ႉ။
“ၶဝ်ဝႃႈ ပဵၼ်ပိူၼ်ႈႁဵတ်းတေႃႇၶဝ်ၼႆဝႃႇ မိူဝ်ႈၽွင်းၾႆးမႆႈၵႃးၶဝ်ယူႇၼၼ်ႉ ၼႂ်းၵႃးၶဝ် လႆႈငိၼ်းသဵင်တႅၵ်ႇဢွၵ်ႇမႃး ပွၵ်းပွၵ်း ပႅပ်းပႅပ်း ႁဵတ်းၼႆဝႆႉၶႃႈဢေႃႈ။ ၵူၼ်းမိူင်းဢၼ် ၵႂႃႇၸွႆႈဢဝ်ဢွၵ်ႇမႃးၼၼ်ႉ ၶဝ်ပဵၼ်ၵူၼ်းမိူင်းႁႃႉ ၵူၼ်းသိုၵ်းႁႃႉ ဢမ်ႇႁူႉ။ ဝၢႆး မႃး ၸင်ႇႁူႉဝႃႈ ပဵၼ်ၵူၼ်းသိုၵ်းမၢၼ်ႈ သႂ်ႇၶူဝ်းၵူၼ်းမိူင်း။ ၵႃးသမ်ႉ ပဵၼ်ၵႃးၵူၼ်းမိူင်း။ ပဵၼ်ၵူၼ်းသိုၵ်းမၢၼ်ႈ ၶီႇမႃးႁဵတ်းၼႆ ၶႃႈ”- ၵူၼ်းဝဵင်းၼမ်ႉၶမ်း သိုပ်ႇလၢတ်ႈၼႄ ၼင်ႇၼႆ။
ၵဵဝ်ႇၵပ်း လူၺ်ႈလွင်ႈမၢၵ်ႇတႅၵ်ႇ ၾႆးမႆႈၵႃးၼႆႉ ယူႇတီႈၵူၼ်းမိူင်းလႄႈ ၾၢႆႇၶႄၾႆး ဢွၼ်ၵၼ်ၶဝ်ႈၸွႆႈၶႄ တေႁိုင်မွၵ်ႈ 20 မိ ၼိတ်ႉၼႆႉ ဝႃႈၼႆ။
