ဢူးယီႈသေး ဢႃယု 75 ပီ ၽူႈၵွၼ်းတပ်ႉသိုၵ်းပျီႇတူႉၸိတ်ႉလႃးႁူႇ ဢိူင်ႇလွႆတေႃႇၶမ်း ၸႄႈဝဵင်းတႃႈၶီႈလဵၵ်း လူႉသဵင်ႈ ၽွင်းတေၵႂႃႇယႃတူဝ်။
မိူဝ်ႈဝၼ်းတီႈ 14.9.2022 ယၢမ်းႁူဝ်ၶမ်ႈ ဢူးယီႈသေး ဢမ်ႇယူႇလီလႄႈ လုၵ်ႉတီႈ ဝၢၼ်ႈယေႇပူႇၸၢၼ်း ဢိူင်ႇလွႆတေႃႇၶမ်း ၸႄႈဝဵင်းတႃႈၶီႈလဵၵ်း ဢၢၼ်းတေၵႂႃႇယႃတူဝ်တီႈႁူင်းယႃလူင်ဝဵင်းတႃႈၶီႈလဵၵ်း၊ ဢမ်ႇတၼ်းထိုင်ႁူင်းယႃသေ လူႉသဵင်ႈပႅတ်ႈပွတ်းတၢင်း ။
ၵူၼ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ မၼ်းဢမ်ႇယူႇလီမႃး လၢႆဝၼ်းယဝ်ႉၼင်ႇၵဝ်ႇ။ ၵမ်းၼႆႉတၢင်းပဵၼ် ၶႂ်ႈလိူဝ်ၸႂ်မႃးလႄႈ ၽွင်းဢဝ်တူဝ်သူင်ႇႁူင်းယႃၼၼ်ႉ ၵႂႃႇသဵင်ႈပႅတ်ႇၸွမ်းတၢင်းဢေႃႈ။ လီသေးလၢႆယူႇဢေႃႈ မၼ်းမေႃၸွႆႈထႅမ် ပၢႆးပၺ်ႇၺႃႇလုၵ်ႈဢွၼ်ႇ ပႃးၸဵမ်လွင်ႈပၢႆးပိူင်ၵူၼ်းၸိူဝ်းၼႆႉ “ ဝႃႈၼႆ။
ပၢင်ၸႃႉပၼ ဢူးယီႈသေး ဢၢၼ်းတေၸတ်းႁဵတ်းတီႈ ၵျွင်းၶရိတ်ႉယၢၼ်ႇ ဝၢၼ်ႈယေႇပူႇၸၢၼ်း ဢိူင်ႇလွႆတေႃႇၶမ်း ၸႄႈဝဵင်းတႃႈၶီႈလဵၵ်း ၊ တေပူၼ်ႉၶၢပ်ႈတူဝ် ဝၼ်းတီႈ 17.9.2022 ၸွမ်းၼင်ႇၾိင်ႈၸၢဝ်းၶရိတ်ႉယၼ်ႇ ဝႃႈၼႆ။
ၵဵဝ်ႇၵပ်းဢူးယီႈသေးၼႆႉသေ ၸဝ်ႈၶိုၼ်းသႂ်ၸႂ်ယဵၼ် ၽူႈၵွၼ်းႁွင်ႈၵၢၼ်ပျီႇထွင်ႇၸု ဢိၼ်ႇသတီႈၵျုတ်ႉ လၢတ်ႈဝႃႈ -“ မၼ်းၼႆႉ မိူဝ်ႈပၢၼ် MTA ၼၼ်ႉ ပဵၼ်ၾၢႆႇၽွင်းငမ်းပိုၼ်ႉတီႈ။ 1996 ၽိူဝ်ႇ MTA ဝၢင်းၶိူင်ႈယဝ်ႉ မၼ်းၵေႃႈၵႂႃႇႁဵတ်း ႁူဝ်ၼႃႈပျီႇတူႉၸိတ်ႉ တီႈဝၢၼ်ႈပုင်ႇတႃႈၶီႈလဵၵ်းပႅတ်ႈ။ ဝၢႆးၼၼ်ႉမၼ်းၶဝ်ႈၵႂႃႇယူႇမိူင်းထႆး။ ထိုင်ပီ 2013 တၢင်းမိူင်းထႆး ၼႄးမၼ်းၵဵဝ်ႇၶွင်ႈယႃမဝ်းၵမ်သေ မၼ်းၵေႃႈၶိုၼ်းမိူဝ်းယူႇတႃႈၶီႈလဵၵ်းၼၼ်ႉၼႃႇ”ဝႃႈၼႆ။
ၽွင်းပီ 2013 ၼၼ်ႉ ထႆးပိုၼ်ၽၢဝ်ႇတီႉၺွပ်း ဢူးယီႈသေး လႄႈ ၼေႃႇၶမ်း ၊ ပိုၼ်ၽၢဝ်ႇပႃးဝႃႈ သင်ၽႂ်ပၼ်ၶၢဝ်ႇဢမ်ႇၼၼ်တီႉၺွပ်းလႆႈၸိုင် တေပၼ်ငိုၼ်းသူး 5 လၢၼ်ႉဝၢတ်ႇ ၼႆသေ ၶဝ်ႈယိုတ်းပႃးႁိူၼ်း ဢူးယီႈသေး ဢၼ်မီးတီႈ ဝဵင်းသၼ်သၢႆး ၵဵင်းမႆႇ မိူင်းထႆး ။
မိူင်းတႆးပွတ်းဢွၵ်ႇၼႆႉ မီးၸုမ်းပျီႇတူႉၸိတ်ႉၼမ်၊ တင်ႈတႄႇမိူင်းသၢတ်ႇ တေႃႇထိုင်တႃႈၶီႈလဵၵ်း -တႃႈလိူဝ်မိူင်းလဵၼ်း ၸုမ်းပျီႇတူႉၸိတ်ႉတင်းမူတ်းတေမီးမွၵ်ႈ 35 ၸုမ်း ၵူၼ်းပိုၼ်ႉတီႈလၢတ်ႈၼင်ႇၼႆ။
