သိုၵ်းမၢၼ်ႈလႄႈသိုၵ်းၶၢင် KIA သိုပ်ႇပိုတ်းယိုဝ်းၵၼ်ၼႂ်းၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ၊ သိုၵ်းမၢၼ်ႈထႅမ်ႁႅင်းသိုၵ်း ၶဵင်ႈၶႅင်ၵၢၼ်သိုၵ်းၵၼ်ယူႇ။
ဝၼ်းတီႈ 9/9/2022 တင်ႈတႄႇႁူဝ်ၶမ်ႈတေႃႇ 7မူင်းပၢႆ ပိုတ်းယိုဝ်းၵၼ်တီႈ တၢင်းၽႄၼမ်ႉပႃၶီး ၊ သိုၵ်းမၢၼ်ႈယိုဝ်းၵွင်ႈလူင်ၵွင်ႈဢွၼ်ႇ ဢမ်ႇၵိုတ်းဢမ်ႇထၢတ်ႇၵူၼ်းမိူင်းတူၵ်းၸႂ်ၵူဝ်ႁႄ။
ၽူႈၸၢႆးၵူၼ်းၵူတ်ႉၶၢႆၵေႃႈၼိုင်ႈလၢတ်ႈဝႃႈ – “သိုၵ်းမၢၼ်ႈ လုၵ်ႉတၢင်းသႅၼ်ဝီမႃး မႃးၺႃးသိုၵ်း KIA တီႈတၢင်းၽႄ ၼမ်ႉပႃၶီး။ ယိုဝ်းၵၼ်ႁိုင်မွၵ်ႈ 1 ၸူဝ်ႈမူင်းယဝ်ႉၵိုတ်းၵႂႃႇၵမ်းၼိုင်ႈသေ ၶိုၼ်းၵႂႃႇယိုဝ်းၵၼ်တင်း တူဝ်ႊၵဵတ်ႉဢေးသျႃႊဝေႃႊ ထႅင်ႈ။ ” – ဝႃႈၼႆ။
ပၢင်တိုပ်းတီႈဝဵင်းၵူတ်ႉၶၢႆၼႆႉ ၾၢႆႇသိုၵ်းမၢၼ်ႈမၢတ်ႇၸဵပ်းလူႉတၢႆၼမ်။ ၾၢႆႇသိုၵ်း KIA ၵေႃႈ မၢတ်ႇၸဵပ်းမီးၽွင်ႈ ၵူၼ်းပိုၼ်ႉတီႈလၢတ်ႈ။
တီႈပၢင်တိုၵ်း တၢင်းၽႄၼမ်ႉပႃၶီးၼၼ်ႉ သိုၵ်းမၢၼ်ႈယိုဝ်းၵွင်ႈလူင်၊ ၶိုၼ်းတိူဝ်ႉၺႃးၵႃးသိုၵ်းၶဝ်လႄႈ မီးလွင်ႈမၢတ်ႇၸဵပ်းလူႉတၢႆၼမ်ၼင်ႇၵဝ်ႇ ၵူၼ်းပိုၼ်ႉတီႈလၢတ်ႈၼင်ႇၼႆ။
တီႈဝဵင်းၵူတ်ႉၶၢႆၼႆႉ သိုၵ်းမၢၼ်ႈလႄႈ KIA ယိုဝ်းၵၼ်မႃးတင်ႈတႄႇ ႁူဝ်လိူၼ်ၼႆႉ တေႃႇထိုင်မိူဝ်ႈဝႃးၵၢင်ၶမ်ႈၵေႃႈ သဵင်ၵွင်ႈပၢႆႇထၢတ်ႇ ယူႇယူႇမႃးပဵၼ်ၵမ်း။ ၵူၼ်းမိူင်းဢမ်ႇၸၢင်ႈၵႂႃႇႁဵတ်းၵၢၼ်ႁႆႈၵၢၼ်သူၼ် ၊ ဢမ်ႇႁတ်းၵႂႃႇႁႃသိုဝ်ႉၶၢႆ ႁႃၵိၼ်လဵင်ႉတွင်ႉ ။
