မိူဝ်ႈၼႆႉ ဝၼ်းတီႈ 9/9/2022 ယၢမ်းဝၢႆးဝၼ်း ၵႃးတင်း ရူတ်ႉၶိူင်ႈ ၽႃႇၵၼ် တီႈႁိမ်းတူဝ်းၵဵၵ်ႉ တၢင်းၶဝ်ႈၵဵင်းတုင် ၼိူဝ်သဵၼ်ႈ တၢင်းလူင် တႃႈၶီႈလဵၵ်း – ၵဵင်းတုင် ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ၵူၼ်းၼုမ်ႇ 2 ၵေႃႉ သွၼ်ႉရူတ်ႉၶိူင်ႈမႃး ၸွမ်းၵၼ်ၼၼ်ႉ ပဵၼ်ၽေးဢုပၢတ်ႈသေ လူႉတၢႆထင်တီႈ။
ၵူၼ်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၵႃးတင်း ရူတ်ႉၶိူင်ႈၽႃႇၵၼ် ဢၼ်လႆႈလူႉတၢႆၵႂႃႇ ထင်တီႈၼၼ်ႉ ပဵၼ်လုၵ်ႈဢွၼ်ႇၸၢႆးတင်း ဢွၼ်ႇယိင်း ၼႆၶႃႈဢေႃႈ”- ဝႃႈၼႆ။
ၵူၼ်းၼုမ်ႇဢၼ်သွၼ်ႉရူတ်ႉၶိူင်ႈမႃးၸွမ်းၵၼ် 2 ၵေႃႉၼၼ်ႉ လုၵ်ႉတၢင်း တႃႈၶီႈလဵၵ်းမႃး ၊ ႁေႃႈရူတ်ႉမႃးဝႆးႁႅင်းသေ ၶၢမ်ႈၵႃးတင်းၼႃႈ၊ သမ်ႉၵႂႃႇတမ်ၽႃႇသႂ်ႇ ၵႃး Crown ဢၼ်လုၵ်ႉတၢင်းၵဵင်းတုင် ဢွၵ်ႇမႃးၼၼ်ႉလႄႈ ၸင်ႇလႆႈတၢႆထင်တီႈ။ ၵူၼ်းၼုမ်ႇ 2 ၵေႃႉၼၼ်ႉ ပဵၼ်ၵူၼ်းပွၵ်ႉ 3 သိုဝ်ႇၶၢဝ်ႇ ၼႂ်းပိုၼ်ႉတီႈ ၵဵင်း တုင် ဢွၵ်ႇဝႆႉၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 6/9/2022 ၼၼ်ႉၵေႃႈ ၵူၼ်းၸၢႆးသွင်ၵေႃႉ ၶီႇရူတ်ႉၶိူင်ႈ သွၼ်ႉၵၼ် လုၵ်ႉတၢင်းတႃႈၶီႈလဵၵ်း မုင်ႈ ၸူးၵဵင်းတုင် လေႃႇတမ်ၽႃႇၺႃး ၵႃးသိပ်းသွင်လေႃႉတီႈလွႆပၢင်ၵႂၢႆးလႄႈ ၵူၼ်းႁေႃႈရူတ်ႉၶိူင်ႈ လူႉတၢႆထင်တီႈ၊ ၵူၼ်းၶီႇ ၸွမ်းတၢင်းလင် လႆႈမၢတ်ႇၸဵပ်း ႁၢဝ်ႈႁႅင်းဝႆႉ ဝႃႈၼႆ။
