ၾၢႆႇၾႆးၾႃႉတႂ်ႈ သိုၵ်းမၢၼ်ႈၵုမ်းၵမ် ပိုၼ်ၽၢဝ်ႇဝႃႈ ၾႆးၾႃႉတေမွတ်ႇၶၢတ်ႇတီႈဝဵင်းမူႇၸေႊ ၶၢဝ်းတၢင်း 6 ဝၼ်း ဝၼ်းတီႈ 8 ထိုင် 13 လိူၼ်သႅပ်ႇထႅမ်ႇပိူဝ်ႇၼႆႉ ၊ ၵူၼ်းမိူင်းမူႇၸေႊ ထူပ်းတၢင်းယၢပ်ႇၽိုတ်ႇ။
ၾၢႆႇၾႆးၾႃႉ ပိုၼ်ၽၢဝ်ႇဝႃႈ တေပုတ်ႈၸၢၵ်ႈၾႆး ထရၼ်ႊသၾွမ်ႊမိူဝ်ႊယႂ်ႇ တီႈႁူင်းၸၢၵ်ႈၾႆးၾႃႉႁႅင်းၼမ်ႉမၢဝ်းမၢႆ 6 လႄႈ တေၵိုတ်းလွင်ႈၸႅၵ်ႇၸၢႆႇၾႆးၾႃႉပၼ်ၵူၼ်းမိူင်းၸူဝ်ႈၵႅပ်ႉဝႃႈၼႆ။
ပေႃးၾႆးၾႃႉၶၢတ်ႇ ၵူၼ်းမိူင်းတေယၢပ်ႇၽိုတ်ႇတႃႇႁႃႈၵိၼ်လဵင်ႉတွင်ႉ ၊ တေလႆႈၵိုတ်းၵၢၼ်ၵိုတ်းငၢၼ်းဝႆႉတင်းမူတ်းလႄႈပဵၼ်ဢၼ်ယၢပ်ႇၵိၼ်းၸႂ်တႄႉၼႆ ၸဝ်ႈၶွင်ႁၢၼ်ႉၶဝ်ႈမုၼ်းၵေႃႉၼိုင်ႈ တီႈမူႇၸေႊလၢတ်ႈၼင်ႇၼႆ။
“ၵၢၼ်တေလႆႈၵိုတ်းဝႆႉမူတ်လႄႈ တေဢမ်ႇမီးငိုၼ်းၶဝ်ႈယဝ်ႉယၢမ်းလဵဝ်။ တေမီးငိုၼ်းဢွၵ်ႇၵူၺ်းယဝ်ႉၶႃႈ။ ပေႃးတေၸႂ်ႉၸၢၵ်ႇၾႆးသမ်ႉ ဢမ်ႇၶူပ်းၶႃႈၼေႈ ၵႃႈၼမ်ႉမၼ်းသုင်ၼႃႇၶႃႈလူး။ ၼႂ်း 4-5 ဝၼ်းၼႆႉတႄႉ တေလႆႈဢဝ်ၶဝ်ႈမုၼ်းၸိူဝ်းၵိုတ်းဝႆႉၸိူဝ်းၼၼ်ႉ ဢွၵ်ႇၶၢႆၵူၺ်းယဝ်ႉၶႃႈ”
ၾႆးၾႃႉၶၢတ်ႇၼႆႉ ယၢပ်ႇၸႂ်တႃႇၸဝ်ႈပၢႆးမၢၵ်ႈမီးၵူၺ်းဢမ်ႇၵႃး ဢၼ်တုမ်ႉတိူဝ်ႉၵမ်းသိုဝ်ႈတႄႉပဵၼ်မႄႈၸဝ်ႈႁိူၼ်း ။ ယၢပ်ႇၽိုတ်ႇတႃႇႁူင်ၶဝ်ၼမ်ႉတၢင်းၵိၼ်လႄႈလွင်ႈၵၢၼ်ႁိူၼ်းၵၢၼ်ယေး။
“ၵၢၼ်တေလိူဝ်မႃးထႅင်ႈဢေႃႈ။ လႆႈႁုင်တင်းၵႅတ်ႉသ် တင်းထၢၼ်ႇ တင်းၽိုၼ်းၼႆႉ တေလႆႈၼင်ႈပႂ်ႉတူၺ်းၶႃႈလႄႇၼေႃႈ။ ဢမ်ႇၸၢင်ႈပွႆႇဝႆႉသေၵႂႃႇႁဵတ်းတၢင်ႇမဵဝ်းလႆႈမိူၼ်ၸိူင်ႉႁဝ်းႁုင်တင်းမေႃႈၾႆးၾႃႉၶႃႈလူးၼေႃႈ။ ”
ပေႃးၾႆးၾႃႉၶၢတ်ႇတႃႇတၢင်ႇၼမ်ႉၸႂ်ႉၼႂ်းၼႃႈႁိူၼ်းၵေႃႈတၵ်းလႆႈပၼ်ႇၸၢၵ်ႈၾႆး။ ယၢမ်းလဵဝ်ၵႃႈၼမ်ႉမၼ်းသမ်ႉၶၼ်သုင်။ တေပၼ်ႇၸၢၵ်ႈတၢင်ႇၼမ်ႉတၢင်ႇၼွင်ၵူႈဝၼ်းၵေႃႈယၢပ်ႇ။ ၵႃႈတေလႆႈလူင်းၵႂႃႇဢၢပ်ႇတီႈတႃႈမၼ်းၵူၺ်းယဝ်ႉ မႄႈၸဝ်ႈႁိူၼ်းၵေႃႈၼိုင်ႈလၢတ်ႈၼင်ႇၼႆ။
ၸုမ်းပွင်ၵၢၼ်ၼႂ်းပွၵ်ႉယွမ်ႇတႄႉလၢတ်ႈဝႃႈ ၾႆးၾႃႉမွတ်ႇႁိုင်ၸိူင်ႉၼႆတႄႉ မိူၼ်ပၼ်တိုဝ်ႉတင်းၶီႈလၵ်ႉၵူၼ်းၸူၼ်ထၢင်ႇႁၢင်ႈၵူၺ်း။ ၾၢႆႇၼိုင်ႈၵေႃႈ လႆႈမႆႈၸႂ်ၵူဝ်မီးၽေးၽိုၼ်းၽေးၾႆးၵူၺ်းယဝ်ႉ -ဝႃႈၼႆ။
ၵူၼ်းပွၵ်ႉၸၢၼ်းဝဵင်းမူႇၸေႊၵေႃႉၼိုင်ႈၵေႃႈလၢတ်ႈဝႃႈ – လင်သိုၵ်းမၢၼ်ႈယိုတ်းမိူင်းမႃးၼႆႉ ၵႃႈၾႆးၾႃႉၵေႃႈလႆႈပၼ်ၼမ်။ ဢမ်ႇပၼ်ဢမ်ႇလႆႈ ။ လႆႈပၼ်မႃးၵူႈလိူၼ်။ ၵွပ်ႈၼႆလႄႈ သင်ၾၢႆႇၾႆးၾႃႉ တတ်းပွၵ်ႉၼိုင်ႈ ပွႆႇပၼ်ပွၵ်ႉၼိုင်ႈ ၊ ပၼ်ႇပုတ်ႈၵၼ်ၸႂ်ႉၵႂႃႇမိူၼ်ၵူႈပွၵ်ႈၼၼ်ႉယိင်ႈၶႅၼ်းတေလီ – ဝႃႈၼႆ။
